drinking alcohol : जिल्ह्यात कायदा व सुव्यवस्था अबाधित राहावी आणि नागरिकांना सुरक्षित, शांततामय वातावरण मिळावे यासाठी पोलिस अधीक्षक अर्चित चांडक यांच्या मार्गदर्शनाखाली अकोला पोलिसांनी आकस्मिक नाकाबंदी मोहीम राबवून सार्वजनिक ठिकाणी दारू पिणाऱ्यांवर व बेशिस्त वाहनचालकांवर कठोर कारवाई केली.
अकोला पोलिसांची धडक कारवाई : विशेष पथकांच्या माध्यमातून जिल्हाभरात मोहिम
अकोला : जिल्ह्यात कायदा व सुव्यवस्था अबाधित राहावी आणि नागरिकांना सुरक्षित, शांततामय वातावरण मिळावे यासाठी पोलिस अधीक्षक अर्चित चांडक यांच्या मार्गदर्शनाखाली अकोला पोलिसांनी आकस्मिक नाकाबंदी मोहीम राबवून सार्वजनिक ठिकाणी दारू पिणाऱ्यांवर व बेशिस्त वाहनचालकांवर कठोर कारवाई केली.
७ फेब्रुवारी २०२६ रोजी सायंकाळी ७ ते रात्री ११ वाजेदरम्यान विशेष पथके तयार करून जिल्हाभर आकस्मिक नाकाबंदी करण्यात आली. या वेळी सार्वजनिक ठिकाणी दारू पिऊन गोंधळ घालणे, शांतता भंग करणे व कायद्याचे उल्लंघन करणाऱ्या ४४ इसमांविरुद्ध मुंबई पोलीस अधिनियमांतर्गत कारवाई करण्यात आली.
नाकाबंदी दरम्यान जिल्ह्यातील ३५ तपासणी नाक्यांवर एकूण १,०१९ वाहनांची तपासणी करण्यात आली. मोटार वाहन कायद्यान्वये १५५ प्रकरणांत कारवाई करून वाहनचालकांकडून एकूण ८०,४०० रुपयांचा दंड वसूल करण्यात आला. या मोहिमेदरम्यान सर्व उपविभागीय पोलिस अधिकाऱ्यांनी नाकाबंदी स्थळांना भेटी देत देखरेख ठेवली, तर ठाणे प्रभारी अधिकाऱ्यांनी सक्रिय सहभाग नोंदवून प्रभावी कारवाई केली.
बेकायदेशीर कृत्यांपासून नागरिकांनी दूर राहावे तसेच कोणतीही अनुचित घटना घडल्यास तात्काळ पोलिस नियंत्रण कक्षाशी संपर्क साधावा, असे आवाहन पोलिस अधीक्षक अर्चित चांडक यांनी केले. कायदा मोडणाऱ्यांवर कोणतीही सहानुभूती दाखवली जाणार नसून प्रतिबंधात्मक उपाययोजना अधिक तीव्रतेने राबवण्यात येणार असल्याचेही त्यांनी स्पष्ट केले.
शहरातील शांतता व सुव्यवस्था राखण्यासाठी नागरिकांच्या सहकार्याची आवश्यकता असून कायद्याचे पालन करून सर्वांनी सुरक्षित वातावरण निर्माण करण्यास हातभार लावावा, असे आवाहनही पोलिस प्रशासनाने केले आहे.
