Vasantrao Naik Vidyalaya: वसंतराव नाईक विद्यालयाच्या संघाचा तालुकास्तरीय क्रिकेट स्पर्धेत दणदणीत विजय; विजेतेपदावर कोरले नाव!

Vasantrao Naik Vidyalaya: जिल्हा क्रीडा कार्यालय, बुलढाणा यांच्या वतीने आयोजित तालुकास्तरीय विविध क्रीडा स्पर्धांमध्ये बीबी येथील वसंतराव नाईक विद्यालय व कनिष्ठ महाविद्यालयाच्या १९ वर्षांखालील मुलांच्या क्रिकेट संघाने उत्कृष्ट कामगिरी करत प्रथम क्रमांक पटकावला. या विजयासह संघाने जिल्हास्तरीय क्रिकेट स्पर्धेसाठी आपली पात्रता सिद्ध केली आहे.

  शिवांग नागरे अन् प्रेम दराडे यांची धडाकेबाज फलंदाजी; बीबीच्या संघाची जिल्हास्तरीय स्पर्धेसाठी पात्रता

रमेश खंडागळे

बीबी  : जिल्हा क्रीडा कार्यालय, बुलढाणा यांच्या वतीने आयोजित तालुकास्तरीय विविध क्रीडा स्पर्धांमध्ये बीबी येथील वसंतराव नाईक विद्यालय व कनिष्ठ महाविद्यालयाच्या १९ वर्षांखालील मुलांच्या क्रिकेट संघाने उत्कृष्ट कामगिरी करत प्रथम क्रमांक पटकावला. या विजयासह संघाने जिल्हास्तरीय क्रिकेट स्पर्धेसाठी आपली पात्रता सिद्ध केली आहे.

तालुकास्तरीय क्रिकेट स्पर्धेत वसंतराव नाईक विद्यालयाच्या संघाने प्रथम फलंदाजी करताना अवघ्या पाच षटकांत ८४ धावांचे आव्हान उभे केले. संघाच्या या आक्रमक फलंदाजीत शिवांग नागरे आणि प्रेम दराडे यांनी विशेष चमक दाखवली. त्यांच्या धडाकेबाज फलंदाजीमुळे संघाला प्रतिस्पर्ध्यांसमोर मोठे आव्हान उभे करता आले.

८४ धावांच्या लक्ष्याचा पाठलाग करताना जनता विद्यालय, अंजनी खुर्दच्या संघाला केवळ ३४ धावांपर्यंतच मजल मारता आली. परिणामी, वसंतराव नाईक विद्यालयाच्या संघाने तब्बल ५० धावांनी दणदणीत विजय मिळवत तालुकास्तरीय स्पर्धेचे विजेतेपद पटकावले.

या उल्लेखनीय यशासाठी विद्यालयाचे प्राचार्य, उपप्राचार्य, पर्यवेक्षक, सर्व शिक्षक व शिक्षकेतर कर्मचारी तसेच क्रीडाशिक्षक यांनी खेळाडूंना मार्गदर्शन आणि प्रोत्साहन दिले. विद्यार्थ्यांनी मिळवलेल्या या यशाबद्दल सर्व स्तरांतून त्यांचे कौतुक होत आहे.

संघाच्या या यशाबद्दल संस्थेचे सचिव श्री. अभय भाऊ चव्हाण यांनी सर्व खेळाडूंचे अभिनंदन केले. तसेच आगामी जिल्हास्तरीय क्रिकेट स्पर्धेसाठी संघाला मनःपूर्वक शुभेच्छा दिल्या.

वसंतराव नाईक विद्यालय व कनिष्ठ महाविद्यालय, बीबीच्या १९ वर्षांखालील क्रिकेट संघाने मिळवलेल्या या दिमाखदार विजयामुळे विद्यालयाच्या क्रीडा क्षेत्रातील लौकिकात आणखी एका मानाच्या तुऱ्याची भर पडली आहे. आता जिल्हास्तरीय स्पर्धेतही दमदार कामगिरी करण्यासाठी संघ सज्ज झाला आहे.