six people killed :दसरा-दिवाळीसाठी गावाकडे निघालेल्या कुटुंबावर काळाचा घाला! भीषण अपघातात सहा जणांचा मृत्यू

six people killed : दसरा-दिवाळीच्या सणासाठी आपल्या गावी परतणाऱ्या एका कुटुंबाचा प्रवास गुरुवारी मृत्यूच्या दरीत संपला. जामनेर-बोदवड रस्त्यावरील मलदाभाडी गावाजवळ पेट्रोल पंपासमोर ट्रक आणि दुचाकीची समोरासमोर भीषण धडक होऊन एकाच दुचाकीवरील सहा जणांचा मृत्यू झाला. मृतांमध्ये पती-पत्नी, भाऊ आणि तीन मुलांचा समावेश असल्याने परिसरात हळहळ व्यक्त होत आहे.

  जामनेर-बोदवड रस्त्यावर ट्रक-दुचाकीची समोरासमोर धडक; पती-पत्नी, भाऊ आणि तीन चिमुकल्यांचा दुर्दैवी अंत

जळगाव : दसरा-दिवाळीच्या सणासाठी आपल्या गावी परतणाऱ्या एका कुटुंबाचा प्रवास गुरुवारी मृत्यूच्या दरीत संपला. जामनेर-बोदवड रस्त्यावरील मलदाभाडी गावाजवळ पेट्रोल पंपासमोर ट्रक आणि दुचाकीची समोरासमोर भीषण धडक होऊन एकाच दुचाकीवरील सहा जणांचा मृत्यू झाला. मृतांमध्ये पती-पत्नी, भाऊ आणि तीन मुलांचा समावेश असल्याने परिसरात हळहळ व्यक्त होत आहे.

समोरासमोर धडक; सहा जणांचा जागीच मृत्यू

मिळालेल्या माहितीनुसार, गुरुवारी दुपारी सुमारे ४ वाजण्याच्या सुमारास ट्रक क्रमांक HR 55 AK 5232 जामनेरच्या दिशेने येत होता, तर पल्सर दुचाकी क्रमांक MP 12 EF 3040 बोदवडच्या दिशेने जात होती. मलदाभाडी गावाजवळील पेट्रोल पंप परिसरात या दोन्ही वाहनांची समोरासमोर जोरदार धडक झाली. धडक इतकी भीषण होती की दुचाकीवरील सहाही जणांचा मृत्यू झाल्याची माहिती समोर आली आहे.

एकाच कुटुंबातील सहा जणांचा दुर्दैवी अंत

या अपघातात  चंपालाल रेवलसिंग भिलाली — पती, जमुना चंपालाल भिलाली — पत्नी, सुनील रेवलसिंग भिलाली भाऊ, सारा चंपालाल भिलाली — मुलगी, चारू चंपालाल भिलाली — मुलगी, एक मुलगा यांचा मृत्यू झाला. हे सर्वजण मध्य प्रदेशातील बुऱ्हाणपूर जिल्ह्यातील शहापूर तालुक्यातील मालवी तांडा येथील रहिवासी असल्याची माहिती आहे.

मजुरीसाठी पाचोरा तालुक्यात; सणासाठी निघाले होते गावी

मृत कुटुंब मजुरीच्या कामासाठी जळगाव जिल्ह्यातील पाचोरा तालुक्यातील कोकणी तांडा येथे वास्तव्यास होते. दसरा-दिवाळीच्या सणासाठी आपल्या मूळ गावी परतत असताना त्यांच्यावर काळाने घाला घातला. सणाच्या आनंदात कुटुंबीयांना भेटण्याची आस घेऊन निघालेल्या या सहा जणांचा प्रवास अपघातामुळे कायमचा थांबला. या घटनेने त्यांच्या कुटुंबीयांवर दुःखाचा डोंगर कोसळला आहे.

मदतकार्य; मृतदेह उपजिल्हा रुग्णालयात

अपघाताची माहिती मिळताच आरोग्यदूत जालमसिंग राजपूत यांनी घटनास्थळी धाव घेतली आणि सर्व मृतदेह जामनेर येथील उपजिल्हा रुग्णालयात दाखल केले. घटनेचे वृत्त समजताच नगराध्यक्षा साधना महाजन, पोलीस निरीक्षक निवृत्ती बोराडे, जितेंद्र पाटील, नाना बाविस्कर, दीपक तायडे आणि तेजस पाटील यांनी तातडीने रुग्णालयात धाव घेऊन मदतकार्य केले.

जामनेर पोलिसांकडून तपास सुरू

या भीषण अपघातामुळे जामनेर-बोदवड मार्गावरील परिसरात शोककळा पसरली आहे. अपघाताची नेमकी कारणे आणि इतर तपशील तपासातून स्पष्ट होतील. पोलीस निरीक्षक निवृत्ती बोराडे यांच्या मार्गदर्शनाखाली जामनेर पोलीस पुढील तपास करीत आहेत.