Sakharkherda: साखरखेर्ड्यात घरात घुसून ६० वर्षीय महिलेवर जीवघेणा हल्ला; आरडाओरड ऐकताच नागरिक धावले, सराईत गुन्हेगार जेरबंद!

Sakharkherda: घरात एकटी असलेल्या ६० वर्षीय महिलेच्या घरात तोंडाला काळा रुमाल बांधून घुसणे, दरवाजा आतून बंद करणे, मारहाण करून गळा दाबण्याचा प्रयत्न करणे आणि अंगावरील दागिने काढून घेण्याचा प्रयत्न केल्याची धक्कादायक घटना साखरखेर्डा येथील वार्ड क्रमांक सहामध्ये गुरुवार, १५ ऑक्टोबर रोजी सकाळी घडली. महिलेने आरडाओरड केल्यानंतर परिसरातील महिला आणि युवक मदतीसाठी धावून आले. त्यांनी पळून जाण्याच्या प्रयत्नात असलेल्या संशयित आरोपीला पकडून पोलिसांच्या ताब्यात दिले. या प्रकरणी पोलिसांनी शेख सोरभ शेख रहीम ऊर्फ शेरा याला अटक केली आहे.

  तोंडाला काळा रुमाल, घराचा दरवाजा बंद अन् महिलेचा गळा दाबण्याचा प्रयत्न; साखरखेर्ड्यात थरार

साखरखेर्डा : घरात एकटी असलेल्या ६० वर्षीय महिलेच्या घरात तोंडाला काळा रुमाल बांधून घुसणे, दरवाजा आतून बंद करणे, मारहाण करून गळा दाबण्याचा प्रयत्न करणे आणि अंगावरील दागिने काढून घेण्याचा प्रयत्न केल्याची धक्कादायक घटना साखरखेर्डा येथील वार्ड क्रमांक सहामध्ये गुरुवार, १५ ऑक्टोबर रोजी सकाळी घडली. महिलेने आरडाओरड केल्यानंतर परिसरातील महिला आणि युवक मदतीसाठी धावून आले. त्यांनी पळून जाण्याच्या प्रयत्नात असलेल्या संशयित आरोपीला पकडून पोलिसांच्या ताब्यात दिले. या प्रकरणी पोलिसांनी शेख सोरभ शेख रहीम ऊर्फ शेरा याला अटक केली आहे.

घरात एकटी महिला असल्याची संधी साधली

साखरखेर्डा येथील श्री प्रल्हाद महाराज संस्थानमध्ये स्वयंपाकी म्हणून काम करणाऱ्या श्रीमती निर्मला रामचंद्र पंचाळ (वय ६०) या स्वयंपाकाचे काम आटोपून घरी परतल्या होत्या. त्यावेळी त्या घरात एकट्याच असल्याची संधी साधून त्याच वार्डातील शेख सोरभ शेख रहीम ऊर्फ शेरा हा तोंडावर काळा रुमाल बांधून घरात घुसल्याची माहिती समोर आली आहे.

आरोपीने घराचा दरवाजा आतून बंद केला. त्यानंतर निर्मला पंचाळ यांना मारहाण करीत घरातील स्वयंपाकघरात नेले. त्यांच्या तोंडात पायपुसणी कोंबून पुन्हा मारहाण केली आणि गळा दाबून जिवे मारण्याचा प्रयत्न केल्याचे तक्रारीत नमूद आहे. या अचानक घडलेल्या प्रकारामुळे महिला भयभीत झाली; मात्र तिने मदतीसाठी आरडाओरड सुरू केली.

आरडाओरड ऐकताच नागरिक धावले

महिलेचा आवाज ऐकून परिसरातील महिला आणि युवक तातडीने त्यांच्या घराकडे धावले. या झटापटीदरम्यान आरोपीने महिलेच्या नाकातील नथ काढली; मात्र झटापटीत ती खाली पडली. नथ उचलण्याच्या प्रयत्नादरम्यान महिलेने दरवाजा उघडला. त्यानंतर आरोपीने पुन्हा महिलेवर हल्ला करून पळून जाण्याचा प्रयत्न केला.

मात्र, घटनास्थळी जमा झालेल्या नागरिकांनी त्याला पकडले आणि पोलिसांच्या ताब्यात दिले. नागरिकांच्या तत्परतेमुळे आरोपीला पळून जाण्याची संधी मिळाली नाही. हा प्रकार गुरुवारी सकाळी ११ ते ११.३० वाजण्याच्या सुमारास घडला.

साखरखेर्डा पोलिसांकडून आरोपीला अटक

महिलेच्या तक्रारीवरून साखरखेर्डा पोलीस ठाण्याचे ठाणेदार युवराज रबडे यांच्या मार्गदर्शनाखाली शेख सोरभ शेख रहीम ऊर्फ शेरा याच्याविरुद्ध भारतीय न्याय संहितेच्या कलम ३३३, २९६, ११५(२) आणि ३५१(३) अन्वये गुन्हा दाखल करण्यात आला असून त्याला अटक करण्यात आली आहे.

यापूर्वीच्या घरफोड्यांशी संबंध आहे का?

दरम्यान, साखरखेर्डा येथील शिक्षक कॉलनी परिसरात यापूर्वी दोन ठिकाणी घरफोडी झाल्याची माहिती आहे. या घरफोडीच्या घटनांमध्ये तोंडाला काळा रुमाल बांधून चोरी करणाऱ्या चार आरोपींचा पोलीस शोध घेत असतानाच, तशाच प्रकारे तोंडावर काळा रुमाल बांधून घरात घुसल्याची ही घटना घडली.

शेख सोरभ शेख रहीम ऊर्फ शेरा याच्याविरुद्ध यापूर्वी जबरी चोरी आणि खुनासारख्या गंभीर गुन्ह्यांची नोंद असल्याचे सांगण्यात येते. मात्र, शिक्षक कॉलनीतील घरफोड्यांशी त्याचा संबंध आहे का, याबाबत अधिकृत तपासातूनच स्पष्टता येईल.

या घटनेमुळे साखरखेर्डा परिसरात खळबळ उडाली असून, नागरिकांच्या सतर्कतेमुळे एका गंभीर प्रसंगात महिलेला मदत मिळाली. पोलिसांकडून या प्रकरणाचा पुढील तपास सुरू आहे.