The human body :मानवी देहाला विचारांची गरज; संतच देतात विचारांची शिदोरी’

The human body : मानवी जीवनातील अंधकार आणि अहंकार दूर करायचा असेल, तर मानवी देहाला योग्य विचारांची गरज असते. हे विचार साधू-संत देत असतात. त्यामुळे गुरूचरणी नतमस्तक होऊन संतविचारांची शिदोरी घेऊन जीवन जगण्याची सवय प्रत्येकाने लावून घेतली पाहिजे, असे प्रबोधन मठाधिपती सिद्धचैतन्य शिवाचार्य महाराज यांनी केले.

मठाधिपती सिद्धचैतन्य शिवाचार्य महाराज यांचे प्रबोधन; तीन दिवसीय स्मृती महोत्सवाची महाप्रसादाने सांगता

साखरखेर्डा : मानवी जीवनातील अंधकार आणि अहंकार दूर करायचा असेल, तर मानवी देहाला योग्य विचारांची गरज असते. हे विचार साधू-संत देत असतात. त्यामुळे गुरूचरणी नतमस्तक होऊन संतविचारांची शिदोरी घेऊन जीवन जगण्याची सवय प्रत्येकाने लावून घेतली पाहिजे, असे प्रबोधन मठाधिपती सिद्धचैतन्य शिवाचार्य महाराज यांनी केले.

श्रीमज्जगद्गुरु पलसिद्ध महास्वामीजी यांच्या ९६८ व्या स्मृती महोत्सवाचे तीन दिवसीय आयोजन साखरखेर्डा येथे करण्यात आले होते. या महोत्सवाला विविध गावांतील लाखो भाविकांनी उपस्थिती लावत भक्तिभावाने सहभाग घेतला. बुधवार, दि. २ सप्टेंबर रोजी महोत्सवाची सांगता झाली.

समारोपप्रसंगी ‘गुरुप्रसादाची चोरी’ या अभंगावर आधारित कीर्तनातून उपस्थितांना प्रबोधन करण्यात आले. मानवी जीवनाचे कल्याण व्हावे, जीवभावातून शिवभावाकडे वाटचाल व्हावी, यासाठी सद्गुरूंचा प्रसाद आणि त्यांचे मार्गदर्शन अत्यंत महत्त्वाचे आहे. सद्गुरूंच्या ज्ञानाशिवाय मानवी जीवनाचे खरे कल्याण होऊ शकत नाही. त्यामुळे भारतीय परंपरेनुसार सद्गुरूंच्या प्रसादाने या धार्मिक सोहळ्याची सांगता होत असल्याचे शिवाचार्य महाराज यांनी सांगितले.

जगात सर्वाधिक पूजनीय आणि सर्वप्रिय व्यक्ती होण्यासाठी नम्रता हा सर्वात महत्त्वाचा अलंकार आहे. ज्या साधकाजवळ नम्रता असते, त्याचे व्यक्तिमत्त्व समाजमान्य होते. मानवी देहाला विविध विकार जडतात आणि हे विकार माणसाला माणूस म्हणून जगण्यापासून दूर नेतात. या षड्विकारांचा प्रमुख म्हणजे अहंकार. अहंकारामुळे माणूस ना खऱ्या अर्थाने माणूस राहतो, ना सज्जन होतो, ना संतत्वाच्या मार्गावर जाऊ शकतो. त्यामुळे मानवी जीवनाला योग्य विचारांची गरज असून, हे विचार देण्याचे कार्य साधू-संत करतात.

संतांचे विचार आत्मसात करण्यासाठी अशा पवित्र तीर्थक्षेत्री एकत्र येणे आवश्यक आहे. सद्गुरूंकडून मिळालेले ज्ञान माणसातील अहंकार नष्ट करून त्याला देवत्वाच्या मार्गावर नेते. त्यामुळे प्रत्येकाने संतसंगतीचा लाभ घेत देवत्वाकडे वाटचाल करावी, असे आवाहनही त्यांनी केले.

‘संतसंग ज्यांना लाभला, तिन्ही लोकी मान्य झाला’ या संतवचनाप्रमाणे संतांची संगती ही मानवी जीवनाला योग्य दिशा देणारी असते. भगवान शिवाचा महान भक्त असलेला रावण धन, ज्ञान आणि शक्तीने संपन्न होता; मात्र अहंकारामुळे त्याचा विनाश झाला. त्यामुळे अहंकार हा माणसाच्या विनाशाचा मार्ग असून, माणसाने माणसाशी माणुसकीने वागावे, हीच संतांची शिकवण आहे.

महोत्सवाच्या यशस्वी आयोजनासाठी विविध गावांतील महिला सेवाधारी, भाविक, तरुण-तरुणी आणि स्वयंसेवकांनी शिस्तबद्ध नियोजन केले. मोठ्या संख्येने भाविक उपस्थित असतानाही सर्व कार्यक्रम नियोजनबद्ध आणि उत्साहपूर्ण वातावरणात पार पडले. विविध जबाबदाऱ्या सांभाळणाऱ्या महिला, पुरुष आणि युवकांनी दिलेल्या सहकार्याबद्दल आयोजकांनी कृतज्ञता व्यक्त केली.

कीर्तन आणि मठाधिपती सिद्धचैतन्य शिवाचार्य महाराज यांच्या आशीर्वचनाने तीन दिवसीय स्मृती महोत्सवाची सांगता झाली. त्यानंतर भाविकांसाठी महाप्रसादाचे आयोजन करण्यात आले.