Panchayat Raj Committee:  पंचायत राज समितीच्या दौऱ्याने अधिकारी-कर्मचाऱ्यांची धावपळ!

Panchayat Raj Committee: सन २०२० ते २०२६ या कालावधीत जिल्ह्यात झालेल्या विकासकामांची तसेच विविध विकास आराखड्यांची पाहणी व आढावा घेण्यासाठी विधिमंडळाच्या पंचायत राज समितीचा बुधवार, दि. २ सप्टेंबर रोजी जिल्हा दौरा सुरू झाला आहे. समिती विविध पंचायत समित्यांना भेटी देऊन गावांतील शाळा, आरोग्य केंद्रे, ग्रामपंचायती, विद्युत विभाग, महसूल विभाग तसेच अन्य शासकीय कार्यालयांच्या कामकाजाची पाहणी करणार असल्याची माहिती आहे. त्यामुळे संबंधित विभागांमध्ये हालचालींना वेग आला असून अधिकारी व कर्मचाऱ्यांची धावपळ सुरू झाली आहे.

  विकासकामांची प्रत्यक्ष पाहणी होणार का? पंचायत राज समितीकडे जनतेचे लक्ष

बाळापूर : सन २०२० ते २०२६ या कालावधीत जिल्ह्यात झालेल्या विकासकामांची तसेच विविध विकास आराखड्यांची पाहणी व आढावा घेण्यासाठी विधिमंडळाच्या पंचायत राज समितीचा बुधवार, दि. २ सप्टेंबर रोजी जिल्हा दौरा सुरू झाला आहे. समिती विविध पंचायत समित्यांना भेटी देऊन गावांतील शाळा, आरोग्य केंद्रे, ग्रामपंचायती, विद्युत विभाग, महसूल विभाग तसेच अन्य शासकीय कार्यालयांच्या कामकाजाची पाहणी करणार असल्याची माहिती आहे. त्यामुळे संबंधित विभागांमध्ये हालचालींना वेग आला असून अधिकारी व कर्मचाऱ्यांची धावपळ सुरू झाली आहे.

बाळापूर तालुक्यातील ग्रामपंचायती, शाळा तसेच विविध शासकीय विभागांच्या कामकाजाबाबत नागरिकांकडून वेळोवेळी तक्रारी करण्यात आल्याचे चित्र आहे. त्यामुळे पंचायत राज समितीचा हा दौरा केवळ औपचारिक पाहणीपुरता मर्यादित न राहता, प्रत्यक्ष गावपातळीवरील परिस्थितीची निष्पक्ष आणि वस्तुनिष्ठ तपासणी करणारा ठरावा, अशी अपेक्षा नागरिक व्यक्त करीत आहेत.

विकासकामांची गुणवत्ता, शासकीय निधीचा योग्य वापर, अपूर्ण कामे, विविध योजनांची अंमलबजावणी तसेच पात्र नागरिकांना योजनांचा मिळणारा लाभ याबाबत समितीने गांभीर्याने लक्ष द्यावे, अशी मागणी होत आहे. शासकीय कार्यालयांमध्ये नागरिकांना येणाऱ्या अडचणींचाही समितीने आढावा घ्यावा, अशी अपेक्षा आहे.

पंचायत राज समिती तालुक्यात येणार असल्याची माहिती मिळताच काही शासकीय कार्यालयांमध्ये स्वच्छता, कागदपत्रांची मांडणी आणि कार्यालयीन व्यवस्था सुरळीत करण्याची लगबग सुरू झाल्याचे दिसून येत आहे. मात्र, केवळ कार्यालये स्वच्छ व नीटनेटकी दिसणे पुरेसे नसून, शासकीय कागदपत्रांमध्ये दाखविण्यात आलेली विकासकामे प्रत्यक्षात कितपत झाली आहेत आणि त्यांचा दर्जा कसा आहे, याचीही सखोल तपासणी होणे आवश्यक असल्याची भावना नागरिकांमधून व्यक्त होत आहे.

एखाद्या विकासकामाबाबत अनियमितता, नियमबाह्य काम किंवा निधीच्या गैरवापराबाबत तक्रारी आढळल्यास संबंधित कागदपत्रे, मंजूर आराखडे आणि प्रत्यक्ष कामाची पाहणी करून वस्तुनिष्ठ चौकशी करण्यात यावी, अशी अपेक्षा व्यक्त करण्यात येत आहे. चौकशीत दोष सिद्ध झाल्यास संबंधितांवर नियमानुसार कारवाई व्हावी, अशीही नागरिकांची मागणी आहे.

पंचायत राज समितीचे अध्यक्ष आमदार संतोष दानवे तसेच समितीतील सदस्य पंचायत समिती, ग्रामपंचायती, नगरपरिषद, आरोग्य विभाग, महसूल विभाग, विद्युत विभाग आणि अन्य शासकीय कार्यालयांच्या कामकाजातील त्रुटींची दखल घेतील, अशी अपेक्षा व्यक्त होत आहे.

जनतेची अपेक्षा एकच आहे की, हा दौरा केवळ पाहणीपुरता मर्यादित न राहता प्रशासनातील पारदर्शकता आणि जबाबदारी निश्चित करणारा ठरावा. सरकारी निधीचा योग्य वापर व्हावा, विकासकामांचा दर्जा सुधारावा आणि शासकीय योजनांचा लाभ पात्र नागरिकांपर्यंत प्रभावीपणे पोहोचावा, हीच या दौऱ्याकडून जनतेची प्रमुख अपेक्षा आहे.