Bridge falls :कांचनगंगा पुलाची काही महिन्यांतच दुर्दशा; कठडे तुटले, रस्ता खचला, घाणीचे साम्राज्य

Bridge falls : डोणगाव येथील कांचनगंगा नदीवरील पूल बांधून काही महिने उलटत नाहीत तोच पुलाच्या देखभाल-दुरुस्तीचा प्रश्न निर्माण झाला आहे. पुलाला लावण्यात आलेले कठडे तुटले असून, नदीच्या पुराच्या पाण्यासोबत वाहून आलेली लाकडे आणि मोठ्या प्रमाणातील घाण पुलावरच साचली आहे. तसेच पुलाला जोडणाऱ्या रस्त्यावरील मातीचा भरावही वाहून गेल्याने नागरिकांमध्ये नाराजी व्यक्त होत आहे.

 कांचनगंगा पुलावरील घाण कधी साफ होणार? सार्वजनिक बांधकाम विभागाच्या दुर्लक्षावर नागरिकांचा संताप

डोणगाव : डोणगाव येथील कांचनगंगा नदीवरील पूल बांधून काही महिने उलटत नाहीत तोच पुलाच्या देखभाल-दुरुस्तीचा प्रश्न निर्माण झाला आहे. पुलाला लावण्यात आलेले कठडे तुटले असून, नदीच्या पुराच्या पाण्यासोबत वाहून आलेली लाकडे आणि मोठ्या प्रमाणातील घाण पुलावरच साचली आहे. तसेच पुलाला जोडणाऱ्या रस्त्यावरील मातीचा भरावही वाहून गेल्याने नागरिकांमध्ये नाराजी व्यक्त होत आहे.

डोणगाव ते शेलगाव देशमुख या रस्त्याला जोडणारा कांचनगंगा नदीवरील पूल व्हावा, अशी मागणी परिसरातील नागरिकांकडून गेल्या अनेक वर्षांपासून करण्यात येत होती. अखेर मागील वर्षी पुलाचे बांधकाम पूर्ण झाले आणि पुलावरून वाहतूक सुरू झाली. मात्र, नदीला आलेल्या पुरानंतर पुलाची दुरवस्था समोर आली आहे.

नदीच्या पुराच्या पाण्यासोबत वाहून आलेली मोठमोठी लाकडे पुलावर अडकून पडली आहेत. याशिवाय, एका पावसातच पुलाला लावण्यात आलेले कठडे तुटले असून, पुलाला जोडणाऱ्या रस्त्यावर टाकण्यात आलेला मातीचा भरावही पावसाच्या पाण्याने वाहून गेला आहे. त्यामुळे पुलाच्या बांधकामाच्या दर्जाबाबत नागरिकांकडून प्रश्न उपस्थित केले जात आहेत.

पुलावर मोठ्या प्रमाणात घाण आणि लाकडे साचलेली असतानाही त्याची पाहणी करून साफसफाई करण्याची तसदी ग्रामपंचायत किंवा सार्वजनिक बांधकाम विभागाने घेतलेली नसल्याचा आरोप नागरिकांकडून करण्यात येत आहे. पुलावरील ही घाण आणि तुटलेले कठडे भविष्यात अपघाताला कारणीभूत ठरू शकतात. त्यामुळे संबंधित विभागाने कोणतीही दुर्घटना घडण्यापूर्वी तातडीने उपाययोजना करावी, अशी मागणी होत आहे.

सार्वजनिक बांधकाम विभागाने पुलाची तातडीने पाहणी करून तुटलेल्या कठड्यांची दुरुस्ती करावी. तसेच पुराच्या पाण्यासोबत वाहून आलेली लाकडे व इतर घाण हटवावी आणि रस्त्यावरील वाहून गेलेला मातीचा भराव पूर्ववत करावा, अशी मागणी नागरिकांनी केली आहे.

सार्वजनिक बांधकाम विभागाकडून याकडे दुर्लक्ष होत असल्यास ग्रामपंचायतीने तरी पुलावरील साफसफाईची जबाबदारी पार पाडावी, अशी अपेक्षा व्यक्त होत आहे. तसेच १५व्या वित्त आयोगाच्या निधीतून नदीवरून जाण्यासाठी सिमेंट काँक्रीटचा रस्ता तयार करावा, अशी मागणीही नागरिकांनी केली आहे.

दरम्यान, पुलाच्या बांधकामाची गुणवत्ता, तुटलेले कठडे आणि वाहून गेलेल्या रस्त्याच्या भरावाची चौकशी करण्यात यावी. या कामात दोष आढळल्यास संबंधित ठेकेदारावर योग्य ती कारवाई करावी, अशी मागणी नागरिकांकडून होत आहे. काही महिन्यांतच पुलाची झालेली दुरवस्था पाहता सार्वजनिक बांधकाम विभागाने या प्रकरणाची गांभीर्याने दखल घेऊन तातडीने कार्यवाही करावी, अशी अपेक्षा नागरिक व्यक्त करत आहेत.