Bloody conflict :शेतीच्या बक्षीसपत्रावरून रक्तरंजित संघर्ष! सोमठाण्यात एकाच कुटुंबातील तिघांची हत्या

Bloody conflict : तालुक्यातील सोमठाणा येथे शेती बक्षीसपत्राद्वारे नावावर करून देण्याच्या कारणावरून नातेवाइकांमध्ये झालेल्या वादातून तिघांची निर्घृण हत्या करण्यात आल्याची धक्कादायक घटना उघडकीस आली आहे. संजय फत्तेसिंग सुरडकर, त्यांचा मुलगा रंजित संजय सुरडकर आणि सासू सरस्वती फत्तेसिंग सुरडकर अशी मृतांची नावे आहेत. या तिहेरी हत्याकांडप्रकरणी पोलिसांनी तातडीने तपासाची चक्रे फिरवत एका आरोपीला अटक केली असून, दुसरा आरोपी फरार आहे. त्याचा शोध घेण्यासाठी चिखली पोलीस आणि स्थानिक गुन्हे शाखेची स्वतंत्र पथके कार्यरत आहेत.

  सोमठाण्यात तिहेरी हत्याकांडाने खळबळ; एक आरोपी पहाटेच पोलिसांच्या ताब्यात, दुसरा फरार

चिखली : तालुक्यातील सोमठाणा येथे शेती बक्षीसपत्राद्वारे नावावर करून देण्याच्या कारणावरून नातेवाइकांमध्ये झालेल्या वादातून तिघांची निर्घृण हत्या करण्यात आल्याची धक्कादायक घटना उघडकीस आली आहे. संजय फत्तेसिंग सुरडकर, त्यांचा मुलगा रंजित संजय सुरडकर आणि सासू सरस्वती फत्तेसिंग सुरडकर अशी मृतांची नावे आहेत. या तिहेरी हत्याकांडप्रकरणी पोलिसांनी तातडीने तपासाची चक्रे फिरवत एका आरोपीला अटक केली असून, दुसरा आरोपी फरार आहे. त्याचा शोध घेण्यासाठी चिखली पोलीस आणि स्थानिक गुन्हे शाखेची स्वतंत्र पथके कार्यरत आहेत.

पोलिसांनी दिलेल्या माहितीनुसार, या प्रकरणातील फिर्यादी मुक्ता संजय सुरडकर (वय ४०, रा. सोमठाणा, सध्या रा. शेलूद, ता. चिखली, जि. बुलढाणा) यांनी ९ ऑक्टोबर २०२६ रोजी चिखली पोलीस ठाण्यात तक्रार दाखल केली. फिर्यादी आणि आरोपी हे एकमेकांचे नातेवाईक असून, शेती बक्षीसपत्राद्वारे नावावर करून देण्याच्या कारणावरून त्यांच्यात वाद सुरू होता.

८ ऑक्टोबर रोजी सायंकाळी साडेसहा ते सात वाजण्याच्या सुमारास सोमठाणा येथे आरोपी दीपक फत्तेसिंग सुरडकर आणि जगदीश दीपक सुरडकर यांनी त्यांच्या घरासमोर फिर्यादीचे पती संजय फत्तेसिंग सुरडकर, मुलगा रंजित संजय सुरडकर आणि सासू सरस्वती फत्तेसिंग सुरडकर यांच्यावर चाकू तसेच इळदाच्या काठीने हल्ला केल्याचा आरोप तक्रारीत करण्यात आला आहे. या हल्ल्यात तिघेही गंभीर जखमी होऊन त्यांचा मृत्यू झाला.

या घटनेमुळे सोमठाणा परिसरात खळबळ उडाली असून, शेतीच्या बक्षीसपत्रावरून नातेसंबंधांत निर्माण झालेला वाद तिहेरी हत्याकांडापर्यंत पोहोचल्याने परिसरात गंभीर चिंता व्यक्त होत आहे.

पोलीस अधीक्षकांची घटनास्थळाला भेट

घटनेचे गांभीर्य आणि संवेदनशीलता लक्षात घेऊन बुलढाणा जिल्ह्याचे पोलीस अधीक्षक निलेश तांबे यांनी तातडीने घटनास्थळाला भेट दिली. आरोपींचा शोध घेऊन त्यांना अटक करण्याच्या सूचना त्यांनी संबंधित पोलीस अधिकाऱ्यांना दिल्या. त्यानंतर चिखली पोलीस ठाणे आणि स्थानिक गुन्हे शाखा, बुलढाणा यांच्या स्वतंत्र पथकांची नियुक्ती करण्यात आली.

पोलिसांनी शोधमोहीम राबवत आरोपी जगदीश दीपक सुरडकर (वय २१, रा. सोमठाणा, ता. चिखली, जि. बुलढाणा) याला ९ ऑक्टोबर रोजी पहाटे ४ वाजून ४९ मिनिटांनी अटक केली. या प्रकरणातील दुसरा आरोपी दीपक फत्तेसिंग सुरडकर हा फरार असून, विशेष पथकांच्या माध्यमातून त्याचा कसून शोध घेतला जात आहे.

चिखली पोलीस ठाण्यात गुन्हा दाखल

या प्रकरणी चिखली पोलीस ठाण्यात गुन्हा क्रमांक ८९५/२०२६ अन्वये भारतीय न्याय संहिता (BNS) कलम १०३(१), ३३३, ३५१(२) आणि ३(५) अंतर्गत गुन्हा दाखल करण्यात आला आहे. अटकेतील आरोपीविरुद्ध पुढील कायदेशीर कार्यवाही सुरू असून, फरार आरोपीला पकडण्यासाठी पोलिसांची शोधमोहीम सुरू आहे.

पोलीस अधीक्षक निलेश तांबे यांच्या मार्गदर्शनाखाली अपर पोलीस अधीक्षक अमोल गायकवाड, उपविभागीय पोलीस अधिकारी सोहन माछरे (मलकापूर प्रभार, बुलढाणा) आणि चिखली पोलीस ठाण्याचे पोलीस निरीक्षक भूषण गावंडे पुढील तपास व कार्यवाही करीत आहेत.

शेतीच्या बक्षीसपत्रावरून निर्माण झालेल्या वादातून एकाच कुटुंबातील तिघांचा बळी गेल्याने या घटनेने परिसरात हळहळ व्यक्त होत आहे. फरार आरोपीला अटक करणे आणि या हत्याकांडामागील नेमकी पार्श्वभूमी स्पष्ट करणे, हे आता पोलिसांसमोरील महत्त्वाचे आव्हान आहे.