Banned gutkha : अन्न व औषध प्रशासन आणि पोलिसांच्या संयुक्त कारवाईत मोताळा तालुक्यातील वाघजाळ येथे प्रतिबंधित सुगंधी गुटखा व पानमसाल्याचा मोठा साठा जप्त करण्यात आला. या कारवाईत कारसह एकूण ४ लाख ४५ हजार २०० रुपयांचा मुद्देमाल हस्तगत करण्यात आला असून तिघांविरुद्ध विविध कलमांन्वये गुन्हा दाखल करण्यात आला आहे.
कारमधून सुरू होती गुटख्याची वाहतुक; अन्न सुरक्षा विभागाच्या कारवाईने उघड झाले रॅकेट
मोताळा : अन्न व औषध प्रशासन आणि पोलिसांच्या संयुक्त कारवाईत मोताळा तालुक्यातील वाघजाळ येथे प्रतिबंधित सुगंधी गुटखा व पानमसाल्याचा मोठा साठा जप्त करण्यात आला. या कारवाईत कारसह एकूण ४ लाख ४५ हजार २०० रुपयांचा मुद्देमाल हस्तगत करण्यात आला असून तिघांविरुद्ध विविध कलमांन्वये गुन्हा दाखल करण्यात आला आहे.
या प्रकरणी अन्न सुरक्षा अधिकारी अक्षय संजय भोपाळे (वय २५, बुलढाणा) यांनी बोराखेडी पोलीस ठाण्यात फिर्याद दिली. त्यानुसार योगेश गणेश गाडेकर (रा. वाघजाळ), वाहन मालक आकाश गाडेकर (रा. वाघजाळ) आणि कथित पुरवठादार निलेश राठी (रा. खामगाव) यांच्याविरुद्ध गुन्हा नोंदविण्यात आला आहे.
माहितीनुसार, २१ जून रोजी पहाटे वाघजाळ येथील राजेंद्र शिंबरे यांच्या घराजवळील मोकळ्या जागेत उभी असलेल्या एमएच-१९ एपी-२७१५ क्रमांकाच्या मारुती सुझुकी कारची तपासणी करण्यात आली. तपासणीदरम्यान वाहनात मोठ्या प्रमाणावर प्रतिबंधित सुगंधी गुटखा व पानमसाल्याचा साठा आढळून आला. महाराष्ट्रात विक्रीस बंदी असलेल्या या तंबाखूजन्य पदार्थांचा साठा विक्रीच्या उद्देशाने ठेवण्यात आल्याचे प्राथमिक चौकशीत समोर आले.
अन्न सुरक्षा विभागाने जप्त केलेल्या मालावरील लेबल तपासणीमध्ये संबंधित उत्पादने गुजरात आणि मध्य प्रदेशातील कंपन्यांनी उत्पादित केल्याचे आढळून आले. महाराष्ट्रात बंदी लागू असतानाही हा माल जिल्ह्यात कसा पोहोचला, याचा तपास आता सुरू करण्यात आला आहे.
फिर्यादीनुसार, प्रतिबंधित पानमसाला आणि सुगंधी तंबाखूच्या विक्री, साठवणूक व वितरणामध्ये केवळ स्थानिक आरोपीच नव्हे तर पुरवठादार, वितरक आणि उत्पादक यांचाही सहभाग असण्याची शक्यता व्यक्त करण्यात आली आहे. त्यामुळे संपूर्ण पुरवठा साखळीची चौकशी करण्याची मागणी करण्यात आली आहे.
विशेष म्हणजे, या अवैध व्यवसायातून संघटित पद्धतीने आर्थिक लाभ मिळविला जात असल्याचे तपासात निष्पन्न झाल्यास संबंधितांविरुद्ध संघटित गुन्हेगारीविरोधी कायद्यांतर्गत (MCOCA) कारवाई करण्याबाबतही तपास यंत्रणा विचार करू शकते, असे फिर्यादीने आपल्या तक्रारीत नमूद केले आहे. मात्र याबाबतचा अंतिम निर्णय पुढील तपासानंतरच होणार आहे.
या प्रकरणी बोराखेडी पोलीस ठाण्यात अप. क्र. ३१५/२०२६ अन्वये भारतीय न्याय संहिता तसेच अन्न सुरक्षा व मानके कायदा २००६ अंतर्गत विविध कलमांनुसार गुन्हा दाखल करण्यात आला आहे. पुढील तपास पोलीस हेड कॉन्स्टेबल अमोल खराडे करीत आहेत.
जिल्ह्यात गुटखा बंदी असतानाही वारंवार मोठ्या प्रमाणात जप्तीच्या घटना समोर येत असल्याने अवैध पुरवठा साखळी किती व्यापक आहे, याबाबत पुन्हा एकदा प्रश्न उपस्थित होत आहेत.
