Burglary in Balapur :शहरातील शोएब कॉलनी परिसरात अज्ञात चोरट्यांनी घरफोडी करून सुमारे ३ लाख ६२ हजार ५०० रुपयांचे सोन्या-चांदीचे दागिने लंपास केल्याची घटना उघडकीस आली आहे. या प्रकरणी बाळापूर पोलीस ठाण्यात गुन्हा दाखल करण्यात आला असून, पोलिसांनी तपास सुरू केला आहे.
घराला कुलूप, चोरट्यांचा डल्ला; शोएब कॉलनीत मोठी चोरी
ज़ाकिर अहमद
बाळापूर : शहरातील शोएब कॉलनी परिसरात अज्ञात चोरट्यांनी घरफोडी करून सुमारे ३ लाख ६२ हजार ५०० रुपयांचे सोन्या-चांदीचे दागिने लंपास केल्याची घटना उघडकीस आली आहे. या प्रकरणी बाळापूर पोलीस ठाण्यात गुन्हा दाखल करण्यात आला असून, पोलिसांनी तपास सुरू केला आहे.
मिळालेल्या माहितीनुसार, मिर्झा निसार बेग गुलजार बेग (वय ३५, व्यवसाय – धान्य व्यापारी, रा. शोएब कॉलनी, बाळापूर) हे २१ मार्च रोजी सायंकाळी सुमारे ८.१० वाजता कुटुंबासह नातेवाईकांना भेटण्यासाठी जळगाव जामोद येथे गेले होते. घरातील कपाटात पत्नीचे सोन्या-चांदीचे दागिने ठेवून त्यांनी घराला कुलूप लावले होते.
दरम्यान, २२ मार्च रोजी रात्री सुमारे १०.३० वाजता ते परत घरी आले असता घराचा दरवाजा उघडा असल्याचे त्यांच्या निदर्शनास आले. घरात जाऊन पाहणी केली असता बेडरूमच्या दरवाजाचे तसेच कपाटाचे लॉक तोडलेले दिसून आले. कपाटातील सोन्या-चांदीचे दागिने चोरीस गेल्याचे स्पष्ट झाले.
चोरीला गेलेल्या ऐवजामध्ये सोन्याचे नेकलेस, पोत, अंगठ्या, बाळी, लॉकेट-चेन तसेच चांदीचे दागिने असा एकूण ३,६२,५०० रुपयांचा माल असल्याचे फिर्यादीत नमूद करण्यात आले आहे.
या प्रकरणी अज्ञात आरोपीविरुद्ध भारतीय न्याय संहिता (BNS) कलम ३३१(३), ३३१(४) व ३०५ अंतर्गत गुन्हा दाखल करण्यात आला आहे. पोलीस हवालदार अनंत सुरवाडे यांनी फिर्याद नोंदवली असून, पोलीस उपनिरीक्षक शरद सैदाने पुढील तपास करीत आहेत. दरम्यान, शहरात वाढत्या घरफोडीच्या घटनांमुळे नागरिकांमध्ये भीतीचे वातावरण निर्माण झाले असून, पोलिसांनी गस्त वाढवून चोरट्यांचा लवकरात लवकर शोध घ्यावा, अशी मागणी होत आहे.
