Shortage of gas cylinders :वाडेगाव परिसरात घरगुती गॅस सिलेंडरचा तुटवडा निर्माण झाल्याने ग्रामीण भागातील महिलांची मोठी गैरसोय होत आहे. गेल्या दोन दिवसांपासून इंडेन गॅसची गाडी गावोगावी पोहोचत नसल्याने सुमारे ४० ते ४५ गावांतील ग्राहक त्रस्त झाले आहेत.
दोन दिवसांपासून गॅस गाडीच गायब; ४०-४५ गावांतील ग्राहक त्रस्त
राहुल सोनोने
वाडेगाव : वाडेगाव परिसरात घरगुती गॅस सिलेंडरचा तुटवडा निर्माण झाल्याने ग्रामीण भागातील महिलांची मोठी गैरसोय होत आहे. गेल्या दोन दिवसांपासून इंडेन गॅसची गाडी गावोगावी पोहोचत नसल्याने सुमारे ४० ते ४५ गावांतील ग्राहक त्रस्त झाले आहेत.
मिळालेल्या माहितीनुसार, वाडेगाव परिसरातील गावांमध्ये दररोज इंडेन गॅस सिलेंडरचे वितरण करणारी गाडी फिरत असते. मात्र गेल्या दोन दिवसांपासून कोणत्याही गावात गॅसचा पुरवठा झालेला नाही. अनेक ग्राहकांनी कॉल करून चौकशी केली असता संबंधित कार्यालयाकडून “गॅसचा माल आलेला नाही” असे सांगण्यात येत असल्याची माहिती ग्राहकांनी दिली.
सिलेंडर वेळेवर मिळत नसल्याने महिलांची मोठी कोंडी झाली असून अनेक घरांमध्ये पुन्हा चुलीवर स्वयंपाक करण्याची वेळ आल्याचे चित्र ग्रामीण भागात पाहायला मिळत आहे. शासनाने ऑनलाइन बुकिंगनंतर ११ दिवसांत सिलेंडर मिळेल, अशी माहिती दिली असली तरी प्रत्यक्षात वेळेवर गॅस उपलब्ध होत नसल्याने ग्राहकांची गैरसोय वाढली आहे.
गॅसचा नियमित पुरवठा न झाल्याने महिलांना नाहक त्रास सहन करावा लागत असून प्रशासनाने तातडीने लक्ष देऊन सिलेंडरचा पुरवठा सुरळीत करावा, अशी मागणी परिसरातील महिलांकडून होत आहे.
याबाबत माजी पंचायत समिती सदस्या रुपालीताई अनंता काळे यांनीही प्रशासनाने तातडीने हस्तक्षेप करून ग्राहकांना वेळेवर गॅस उपलब्ध करून द्यावा, अशी मागणी केली आहे.
