Uddhav Sena :४५ दिवस पावसाचा ठणठणाट; पश्चिम विदर्भातील शेतकरी संकटात, उद्धवसेनेचा सरकारविरोधात एल्गार

Uddhav Sena : गेल्या तब्बल ४५ दिवसांपासून पावसाने पाठ फिरवल्याने पश्चिम विदर्भातील खरीप हंगाम गंभीर संकटात सापडला आहे. सोयाबीन, मूग, उडीद आणि तूर पिकांचे मोठ्या प्रमाणात नुकसान झाले असून कपाशीचे पीकही करपण्याच्या मार्गावर आहे. पावसाअभावी आगामी काळात जनावरांच्या चाऱ्यासह पिण्याच्या पाण्याचा प्रश्न गंभीर होण्याची शक्यता निर्माण झाली असतानाही सरकारकडून ठोस उपाययोजना होत नसल्याचा आरोप करीत शिवसेना (उद्धव बाळासाहेब ठाकरे) पक्षाने सरकारविरोधात आंदोलनाचा एल्गार पुकारला आहे.

पिके उद्ध्वस्त, शेतकरी हवालदिल; नितीन देशमुखांच्या नेतृत्वात पाच जिल्ह्यांत शिवसेनेचे आंदोलन

अकोला : गेल्या तब्बल ४५ दिवसांपासून पावसाने पाठ फिरवल्याने पश्चिम विदर्भातील खरीप हंगाम गंभीर संकटात सापडला आहे. सोयाबीन, मूग, उडीद आणि तूर पिकांचे मोठ्या प्रमाणात नुकसान झाले असून कपाशीचे पीकही करपण्याच्या मार्गावर आहे. पावसाअभावी आगामी काळात जनावरांच्या चाऱ्यासह पिण्याच्या पाण्याचा प्रश्न गंभीर होण्याची शक्यता निर्माण झाली असतानाही सरकारकडून ठोस उपाययोजना होत नसल्याचा आरोप करीत शिवसेना (उद्धव बाळासाहेब ठाकरे) पक्षाने सरकारविरोधात आंदोलनाचा एल्गार पुकारला आहे.

पक्षाचे उपनेते तथा आमदार नितीन देशमुख यांच्या नेतृत्वाखाली अकोला, अमरावती, बुलडाणा, यवतमाळ आणि वाशिम या पश्चिम विदर्भातील पाचही जिल्ह्यांत आंदोलन करण्यात येणार आहे. या आंदोलनाच्या माध्यमातून शेतकऱ्यांच्या प्रश्नांना वाचा फोडण्याची रणनीती शिवसेनेने आखली आहे.

पश्चिम विदर्भातील पाचही जिल्ह्यांत पावसाने मोठा खंड दिल्याने खरीप पिकांनी माना टाकल्या आहेत. शेतकऱ्यांच्या हाती अपेक्षित उत्पादनाऐवजी नुकसानच पडण्याची परिस्थिती निर्माण झाली आहे. पावसाअभावी पिकांसोबतच जनावरांच्या चाऱ्याचा प्रश्नही गंभीर होत असून, आगामी काळात पिण्याच्या पाण्याची टंचाई निर्माण होण्याची भीती व्यक्त होत आहे.

या पार्श्वभूमीवर महायुती सरकार शेतकऱ्यांच्या प्रश्नांकडे उदासीनपणे पाहत असल्याचा आरोप शिवसेना (उद्धव बाळासाहेब ठाकरे) पक्षाने केला आहे. सरकारला शेतकऱ्यांच्या प्रश्नांवर जागे करण्यासाठी पाचही जिल्ह्यांत आंदोलन करण्याचा निर्णय घेण्यात आला आहे.

आंदोलनाच्या नियोजनासाठी पाचही जिल्ह्यांतील शिवसेनेचे आमदार तसेच प्रमुख पदाधिकाऱ्यांची बैठक ११ सप्टेंबर रोजी दुपारी १ वाजता शासकीय विश्रामगृहात आयोजित करण्यात आली आहे. या बैठकीत आंदोलनाचे स्वरूप, ठिकाणे आणि पुढील राजकीय रणनीती निश्चित केली जाणार आहे.

स्थानिक पातळीवर होणार आंदोलनाचे नियोजन

अकोला जिल्ह्यातील सहसंपर्कप्रमुख, जिल्हाप्रमुख, तालुका, शहर व सर्कल स्तरावरील शिवसेना पदाधिकारी, महिला आघाडी, युवासेना, शेतकरी आघाडी तसेच आजी-माजी ज्येष्ठ पदाधिकारी आणि विविध आघाड्यांच्या पदाधिकाऱ्यांची दुपारी २ वाजता नियोजन बैठक होणार आहे.

या बैठकीत अकोला जिल्ह्यात आंदोलनाची स्थानिक पातळीवरील रणनीती निश्चित केली जाणार असून, शेतकऱ्यांच्या प्रश्नांवर पक्षाची भूमिका अधिक आक्रमकपणे मांडण्याची तयारी करण्यात येणार आहे.

‘कोरडा दुष्काळ’ जाहीर करून मदत देण्याची मागणी

पश्चिम विदर्भातील दुष्काळसदृश परिस्थितीच्या पार्श्वभूमीवर ‘कोरडा दुष्काळ’ जाहीर करून शेतकऱ्यांना तातडीने मदत द्यावी, अशी प्रमुख मागणी शिवसेनेने केली आहे. त्याचबरोबर पीकविम्याची नुकसानभरपाई तातडीने द्यावी, आगामी रब्बी हंगामासाठी बियाणे व खते मोफत उपलब्ध करून द्यावीत, सिंचन क्षेत्रातील कृषी पंपांचा वीजपुरवठा सुरळीत ठेवण्यासाठी २४ तास कर्मचारी उपलब्ध करून द्यावेत, अशा मागण्या करण्यात आल्या आहेत.

याशिवाय नियमित कर्जफेड करणाऱ्या शेतकऱ्यांना दोन लाख रुपयांचे प्रोत्साहनपर अनुदान द्यावे, पुनर्गठित कर्ज घेतलेल्या शेतकऱ्यांना कर्जमाफीचा लाभ द्यावा, तसेच जनावरांसाठी चारा उपलब्ध करून देण्यासाठी चारा छावण्या सुरू कराव्यात, अशीही मागणी करण्यात आली आहे.

शिवसेना पक्षप्रमुख उद्धव ठाकरे यांच्या आदेशानुसार तसेच शिवसेना नेते, प्रवक्ते तथा खासदार अरविंदजी सावंत यांच्या मार्गदर्शनाखाली हे आंदोलन करण्यात येणार असल्याचे पक्षाकडून सांगण्यात आले आहे. त्यामुळे पश्चिम विदर्भातील शेतकरी प्रश्नावरून आगामी काळात सत्ताधारी महायुती आणि उद्धवसेना यांच्यातील राजकीय संघर्ष अधिक तीव्र होण्याची शक्यता आहे.