Within two days : दोन दिवसांत एकाच परिवारातील दोन आधारवड कोसळले; देशसेवेत असलेला पुत्र वडिलांच्या अखेरच्या निरोपापासून दूर

Within two days : नियतीचा घाला किती कठोर असतो, याचा प्रत्यय पळसखेड चक्का (ता. सिंदखेडराजा, जि. बुलढाणा) येथील मुंढे परिवाराला आला आहे. अवघ्या दोन दिवसांच्या अंतराने एकाच परिवारातील दोन आधारवड हरपल्याने मुंढे कुटुंबावर दुःखाचा डोंगर कोसळला आहे. स्वर्गीय कारभारी मुकुंदराव मुंढे (वय ८३) आणि स्वर्गीय प्रल्हाद नारायण मुंढे (वय ७२) या चुलते-पुतण्यांच्या निधनाने परिसरात हळहळ व्यक्त होत आहे.

 काका-पुतण्यांच्या निधनाने मुंढे परिवारावर दुःखाचा डोंगर; सुभेदार पुत्र कर्तव्यावरच

साखरखेर्डा : नियतीचा घाला किती कठोर असतो, याचा प्रत्यय पळसखेड चक्का (ता. सिंदखेडराजा, जि. बुलढाणा) येथील मुंढे परिवाराला आला आहे. अवघ्या दोन दिवसांच्या अंतराने एकाच परिवारातील दोन आधारवड हरपल्याने मुंढे कुटुंबावर दुःखाचा डोंगर कोसळला आहे. स्वर्गीय कारभारी मुकुंदराव मुंढे (वय ८३) आणि स्वर्गीय प्रल्हाद नारायण मुंढे (वय ७२) या चुलते-पुतण्यांच्या निधनाने परिसरात हळहळ व्यक्त होत आहे.

आयुष्यभर शेतीशी नाळ जोडून कष्टाचे जीवन जगलेल्या या दोन्ही शेतकरी व्यक्तिमत्त्वांच्या निधनाने कुटुंबीयांसह गावकऱ्यांवरही शोककळा पसरली आहे. कारभारी मुकुंदराव मुंढे यांचा अंत्यविधी ८ सप्टेंबर २०२६ रोजी, तर प्रल्हाद नारायण मुंढे यांचा अंत्यविधी ९ सप्टेंबर रोजी पार पडला. अवघ्या दोन दिवसांत कुटुंबातील दोन ज्येष्ठ व्यक्तींची सावली हरपल्याने मुंढे परिवाराच्या दुःखाला पारावार उरलेला नाही.

स्वर्गीय कारभारी मुकुंदराव मुंढे यांचे पुत्र नंदकिशोर कारभारी मुंढे हे शेतकरी असून, शेतकऱ्यांच्या विविध प्रश्नांसाठी ते सक्रियपणे कार्यरत आहेत. तर स्वर्गीय प्रल्हाद नारायण मुंढे हे सावखेड तेजन ग्रामसेवा सहकारी सोसायटीचे माजी अध्यक्ष होते. शेती आणि शेतकऱ्यांशी त्यांचे जिव्हाळ्याचे नाते होते. त्यांचे पुत्र अनिल मुंढे हे शेतकरी योद्धा कृती समितीचे संस्थापक सदस्य असून, शेतकऱ्यांच्या प्रश्नांसाठी त्यांनी सातत्याने आंदोलने केली आहेत.

देशसेवा प्रथम; मात्र वडिलांना अखेरचा निरोप देता आला नाही

स्वर्गीय प्रल्हाद मुंढे यांचे पुत्र नरेंद्र मुंढे हे भारतीय सैन्य दलात पश्चिम बंगाल येथे सुभेदार पदावर कार्यरत असून, देशसेवेचे कर्तव्य बजावत आहेत. वडिलांचे निधन झाले असतानाही कर्तव्याच्या ठिकाणी असल्याने त्यांना वडिलांच्या अंत्यसंस्काराला उपस्थित राहता आले नाही. वडिलांना अखेरचा निरोप देण्याची मनातील इच्छा अपूर्ण राहिल्याची ही वेदना त्यांच्या मनात कायमची घर करून राहणार आहे.

मात्र, वैयक्तिक दुःखापेक्षा मातृभूमीची सेवा प्रथम, या भावनेने त्यांनी आपले कर्तव्य बजावले. देशाच्या रक्षणासाठी सीमेवर कर्तव्य बजावणाऱ्या या सुभेदार पुत्रासाठी वडिलांच्या अंतिम प्रवासात सहभागी होता न येणे हा प्रसंग अत्यंत वेदनादायी ठरला आहे. एका बाजूला वडिलांच्या निधनाचे दुःख आणि दुसऱ्या बाजूला देशसेवेचे कर्तव्य, अशा भावनिक संघर्षातून त्यांना जावे लागत आहे.

काका-पुतण्यांचा एकाच वेळी सावडण्याचा विधी

स्वर्गीय कारभारी मुकुंदराव मुंढे आणि स्वर्गीय प्रल्हाद नारायण मुंढे या चुलते-पुतण्यांचा सावडण्याचा कार्यक्रम एकाच ठिकाणी आणि एकाच वेळी १० सप्टेंबर रोजी सकाळी ९ वाजता होणार आहे. एकाच परिवारातील दोन ज्येष्ठ व्यक्तींच्या निधनानंतर होणारा हा विधी उपस्थितांसाठीही अत्यंत भावनिक क्षण ठरणार आहे.

अवघ्या दोन दिवसांत दोन आधारवड गमावलेल्या मुंढे परिवारावर दुःखाचा डोंगर कोसळला असून, या कठीण प्रसंगी नातेवाईक, मित्रपरिवार आणि ग्रामस्थांकडून कुटुंबीयांना धीर देण्यात येत आहे.