Time flies on a student : भरधाव ट्रकने दुचाकीस्वाराला चिरडल्याने परीक्षेसाठी निघालेल्या २३ वर्षीय विद्यार्थ्याचा जागीच मृत्यू झाल्याची हृदयद्रावक घटना तालुक्यातील मालगणी फाटा येथे गुरुवारी सकाळी सुमारे ९ वाजताच्या सुमारास घडली. या भीषण अपघातात एकलारा येथील शंतनू नारायण अंभोरे यांचा करुण अंत झाला.
मालगणी फाटा येथे भीषण अपघात; विद्यार्थ्याचा जागीच मृत्यू
चिखली : भरधाव ट्रकने दुचाकीस्वाराला चिरडल्याने परीक्षेसाठी निघालेल्या २३ वर्षीय विद्यार्थ्याचा जागीच मृत्यू झाल्याची हृदयद्रावक घटना तालुक्यातील मालगणी फाटा येथे गुरुवारी सकाळी सुमारे ९ वाजताच्या सुमारास घडली. या भीषण अपघातात एकलारा येथील शंतनू नारायण अंभोरे यांचा करुण अंत झाला.
एकलारा येथील रहिवासी असलेले शंतनू अंभोरे हे बुलढाणा येथील डॉ. गोडे कॉलेजमध्ये बीएससी द्वितीय वर्षाचे शिक्षण घेत होते. अभ्यासक्रमाच्या परीक्षेसाठी ते एमएच-२८-एजी-५४७१ क्रमांकाच्या दुचाकीने एकलारा येथून चिखलीमार्गे बुलढाण्याकडे निघाले होते. मालगणी फाट्याजवळील जामवाडी परिसरात त्यांनी रस्त्याच्या कडेला दुचाकी उभी करून लघुशंकेसाठी थांबले असता बुलढाण्याकडून भरधाव वेगाने येणाऱ्या एमएच-१९-झेड-५६८६ क्रमांकाच्या ट्रकने त्यांना जोरदार धडक देत चिरडले. या अपघातात त्यांचा जागीच मृत्यू झाला.
घटनेनंतर परिसरात मोठी गर्दी जमली. माहिती मिळताच पोलीस घटनास्थळी दाखल झाले. त्यांनी पंचनामा करून अपघातास कारणीभूत ट्रक ताब्यात घेतला असून मृतदेह चिखली उपजिल्हा रुग्णालयात हलविण्यात आला. या दुर्दैवी घटनेने परिसरात हळहळ व्यक्त होत आहे. मृतकाचे काका समाधान अंभोरे यांच्या तक्रारीवरून चिखली पोलिसांनी ट्रक चालकाविरुद्ध गुन्हा दाखल केला असून अपघातानंतर पसार झालेल्या चालकाचा शोध सुरू आहे.
