MLA Manoj Kayande: ‘अवैध धंदे तात्काळ बंद करा; बालाजी महाराजांच्या यात्रेला गालबोट लागू देऊ नका!’ — आमदार मनोज कायंदे

MLA Manoj Kayande: शहराचे ग्रामदैवत श्री बालाजी महाराज यांच्या यात्रा महोत्सवाला शांततेचे, सामाजिक सलोख्याचे आणि धार्मिक ऐक्याचे स्वरूप मिळावे, यात्रेदरम्यान कोणताही अनुचित प्रकार घडू नये आणि नागरिकांच्या सुरक्षेला सर्वोच्च प्राधान्य मिळावे, यासाठी अवैध धंदे तात्काळ बंद करण्याची मागणी आमदार मनोज कायंदे यांनी केली. यात्रेला कोणत्याही परिस्थितीत गालबोट लागू देऊ नका, असे स्पष्ट निर्देश देत त्यांनी पोलीस व संबंधित प्रशासकीय यंत्रणांचे लक्ष सुरक्षेच्या उपाययोजनांकडे वेधले.

  बालाजी महाराज यात्रा महोत्सवासाठी पोलीस प्रशासन ॲक्शन मोडवर; अवैध धंदेचालकांवर गुन्हे दाखल करण्याचे आदेश

गजानन तिडके

देऊळगाव राजा : शहराचे ग्रामदैवत श्री बालाजी महाराज यांच्या यात्रा महोत्सवाला शांततेचे, सामाजिक सलोख्याचे आणि धार्मिक ऐक्याचे स्वरूप मिळावे, यात्रेदरम्यान कोणताही अनुचित प्रकार घडू नये आणि नागरिकांच्या सुरक्षेला सर्वोच्च प्राधान्य मिळावे, यासाठी अवैध धंदे तात्काळ बंद करण्याची मागणी आमदार मनोज कायंदे यांनी केली. यात्रेला कोणत्याही परिस्थितीत गालबोट लागू देऊ नका, असे स्पष्ट निर्देश देत त्यांनी पोलीस व संबंधित प्रशासकीय यंत्रणांचे लक्ष सुरक्षेच्या उपाययोजनांकडे वेधले.

श्री बालाजी महाराज यात्रा महोत्सवाच्या पार्श्वभूमीवर देऊळगाव राजा पोलीस ठाण्याच्या वतीने नगरपरिषद सभागृहात उपविभागीय शांतता समितीच्या बैठकीचे आयोजन करण्यात आले होते. या बैठकीत यात्रा महोत्सव शांततेत पार पाडण्यासाठी आवश्यक पोलीस बंदोबस्त, सीसीटीव्ही यंत्रणा, महिलांची सुरक्षा, अवैध धंद्यांवर कारवाई आणि सामाजिक सलोखा राखण्यासंदर्भात सविस्तर चर्चा करण्यात आली.

अवैध धंद्यांवर तातडीने कारवाई करा!

यात्रा महोत्सवाच्या काळात शहरात कायदा व सुव्यवस्था अबाधित ठेवणे अत्यंत महत्त्वाचे आहे. अवैध धंद्यांमुळे कोणतेही अनुचित प्रकार घडू नयेत, यासाठी अशा धंद्यांवर तातडीने कारवाई करावी, अशी ठाम भूमिका आमदार मनोज कायंदे यांनी मांडली. यात्रेदरम्यान महत्त्वाच्या चौकांमध्ये आणि गर्दीच्या ठिकाणी पुरेसा पोलीस बंदोबस्त ठेवावा, सीसीटीव्ही यंत्रणा कार्यान्वित करावी, तसेच महिलांच्या सुरक्षेसाठी गर्दीच्या ठिकाणी साध्या वेशातील महिला पोलिसांची नियुक्ती करावी, अशा सूचनाही त्यांनी संबंधित यंत्रणांना दिल्या.

यात्रेच्या गर्दीत महिलांची छेडछाड, दागिने चोरी आणि पाकीटमारीसारख्या घटनांना आळा घालण्यासाठी विशेष खबरदारी घेण्याची गरज त्यांनी अधोरेखित केली. भाविकांना सुरक्षित वातावरणात दर्शन घेता यावे आणि यात्रा महोत्सवाचा आनंद घेता यावा, यासाठी सर्व विभागांनी समन्वयाने काम करावे, असे आवाहनही करण्यात आले.

माजी आमदार शशिकांत खेडेकर यांनी उपस्थित केला अवैध धंद्यांचा मुद्दा

बैठकीत माजी आमदार शशिकांत खेडेकर यांनीही शहरातील अवैध धंद्यांचा मुद्दा ठामपणे मांडला. मागील काही दिवसांत शहरात घडलेल्या अनुचित घटनांचा संदर्भ देत, यात्रा महोत्सवाच्या काळात कायदा व सुव्यवस्थेचा प्रश्न निर्माण होऊ नये यासाठी अवैध धंदे तात्काळ बंद करण्याची मागणी त्यांनी पोलीस उपअधीक्षकांकडे केली.

यात्रा हा शहराच्या धार्मिक आणि सांस्कृतिक परंपरेचा महत्त्वाचा भाग आहे. त्यामुळे यात्रा महोत्सवाच्या काळात नागरिकांमध्ये सुरक्षिततेची भावना निर्माण करणे, गैरप्रकारांना प्रतिबंध घालणे आणि शांततेचे वातावरण टिकवून ठेवणे आवश्यक असल्याचे मत बैठकीत व्यक्त करण्यात आले.

अवैध धंदेचालकांवर गुन्हे दाखल करण्याचे आदेश

बैठकीतील सूचनांची दखल घेत अपर पोलीस अधीक्षक अमोल गायकवाड यांनी अवैध धंदे तात्काळ बंद करण्याचे निर्देश दिले. अवैध धंदे सुरू असल्याचे आढळल्यास संबंधित चालकांविरुद्ध गुन्हे दाखल करण्याचे आदेश विभागातील सर्व पोलीस ठाणे प्रमुखांना देण्यात आल्याचे त्यांनी सांगितले.

यात्रा महोत्सवाच्या काळात आवश्यकतेनुसार अतिरिक्त सीसीटीव्ही कॅमेरे आणि इतर सुरक्षा यंत्रणा उपलब्ध करून दिली जाईल, असेही त्यांनी स्पष्ट केले. स्थानिक पातळीवर उद्भवणारे छोटे-मोठे वाद शांततेने मिटवावेत. कोणत्याही कारणामुळे यात्रेला गालबोट लागू नये, ही सर्वांची सामूहिक जबाबदारी आहे. कायदा व सुव्यवस्था बिघडविणाऱ्या गुन्हेगारांना पाठीशी घातले जाणार नाही, असा इशाराही अपर पोलीस अधीक्षक अमोल गायकवाड यांनी दिला.

सर्वांच्या सहकार्याने यात्रा महोत्सव शांततेत पार पाडण्याचे आवाहन

श्री बालाजी महाराज यात्रा महोत्सव हा भाविकांच्या श्रद्धेचा आणि शहराच्या परंपरेचा उत्सव आहे. हा महोत्सव शांततेत आणि सामाजिक सलोखा राखून पार पाडण्यासाठी पोलीस प्रशासन, लोकप्रतिनिधी, नगरपरिषद, विविध राजकीय पक्षांचे पदाधिकारी, व्यापारी, नागरिक आणि शांतता समितीच्या सदस्यांनी एकत्रितपणे प्रयत्न करण्याचे आवाहन करण्यात आले.

या बैठकीला आमदार मनोज कायंदे, माजी आमदार शशिकांत खेडेकर, अपर पोलीस अधीक्षक अमोल गायकवाड, देऊळगाव राजा पोलीस ठाण्याचे पोलीस निरीक्षक ब्रह्मा गिरी, सिंदखेडराजा पोलीस ठाण्याचे पोलीस निरीक्षक आशिष इंगळे, अंढेरा पोलीस ठाण्याचे रुपेश शक्करगे, किनगाव राजा पोलीस ठाण्याचे मातोंडकर यांच्यासह विविध राजकीय पक्षांचे पदाधिकारी, नगरसेवक, प्रशासकीय अधिकारी आणि शांतता समितीचे सदस्य उपस्थित होते.

यात्रा महोत्सवाच्या पार्श्वभूमीवर प्रशासनाने सुरक्षेच्या उपाययोजनांना प्राधान्य दिले असून, भाविकांनीही प्रशासनाला सहकार्य करून श्री बालाजी महाराजांची यात्रा शांततेत, उत्साहात आणि सामाजिक सलोखा राखून संपन्न करण्याचे आवाहन करण्यात आले.