SET exam date changed :SET परीक्षेची तारीख पुन्हा बदलली; आता २७ सप्टेंबरला होणार राज्यस्तरीय पात्रता परीक्षा

SET exam date changed : महाराष्ट्र आणि गोवा राज्यातील सहायक प्राध्यापक पदासाठी घेतल्या जाणाऱ्या ४१ व्या महाराष्ट्र राज्यस्तरीय पात्रता परीक्षा (SET) ची तारीख बदलण्यात आली आहे. यापूर्वी ही परीक्षा ६ सप्टेंबर २०२६ रोजी होणार होती. मात्र त्याच दिवशी केंद्रीय शिक्षक पात्रता परीक्षा (CTET) आयोजित करण्यात आल्याने विद्यार्थ्यांची गैरसोय टाळण्यासाठी SET परीक्षा पुढे ढकलण्यात आली असून आता ती २७ सप्टेंबर २०२६ रोजी घेण्यात येणार आहे.

  CTETची परीक्षा त्याच दिवशी येत असल्याने घेतला निर्णय; विद्यार्थ्यांच्या मागणीनंतर SET परीक्षा पुढे ढकलली

पुणे : महाराष्ट्र आणि गोवा राज्यातील सहायक प्राध्यापक पदासाठी घेतल्या जाणाऱ्या ४१ व्या महाराष्ट्र राज्यस्तरीय पात्रता परीक्षा (SET) ची तारीख बदलण्यात आली आहे. यापूर्वी ही परीक्षा ६ सप्टेंबर २०२६ रोजी होणार होती. मात्र त्याच दिवशी केंद्रीय शिक्षक पात्रता परीक्षा (CTET) आयोजित करण्यात आल्याने विद्यार्थ्यांची गैरसोय टाळण्यासाठी SET परीक्षा पुढे ढकलण्यात आली असून आता ती २७ सप्टेंबर २०२६ रोजी घेण्यात येणार आहे.

सावित्रीबाई फुले पुणे विद्यापीठाच्या SET विभागाने २० जुलै रोजी याबाबत अधिकृत परिपत्रक प्रसिद्ध केले. यापूर्वी ७ जुलै २०२६ रोजी प्रसिद्ध करण्यात आलेल्या जाहीर प्रकटनात SET परीक्षेची संभाव्य तारीख ६ सप्टेंबर घोषित करण्यात आली होती. तसेच शैक्षणिक अडचणी आढळल्यास अंतिम वेळापत्रक नंतर जाहीर करण्यात येईल, असेही नमूद करण्यात आले होते.

दरम्यान, ६ सप्टेंबर रोजी CTET परीक्षा आधीच निश्चित झाल्याने अनेक विद्यार्थ्यांनी SET विभागाकडे ई-मेल आणि लेखी निवेदने पाठवून परीक्षा दिनांक बदलण्याची मागणी केली होती. दोन्ही परीक्षा एकाच दिवशी झाल्यास अनेक उमेदवारांना एका परीक्षेला मुकावे लागेल, अशी भीती विद्यार्थ्यांनी व्यक्त केली होती.

विद्यार्थ्यांच्या मागणीची दखल घेत SET विभागाने कोणताही उमेदवार परीक्षेपासून वंचित राहू नये, या उद्देशाने परीक्षा पुढे ढकलण्याचा निर्णय घेतला आहे. त्यानुसार ४१ वी SET परीक्षा आता २७ सप्टेंबर २०२६ रोजी आयोजित करण्यात येणार असल्याची घोषणा करण्यात आली आहे.

या निर्णयामुळे SET आणि CTET या दोन्ही परीक्षांची तयारी करणाऱ्या हजारो विद्यार्थ्यांना मोठा दिलासा मिळाला आहे. तसेच उमेदवारांना अतिरिक्त तयारीसाठी आणखी काही दिवसांचा कालावधी मिळणार असल्याने या निर्णयाचे स्वागत होत आहे.

SET विभागाने परीक्षेचे अंतिम वेळापत्रक, प्रवेशपत्रे आणि इतर सूचना अधिकृत संकेतस्थळावर प्रसिद्ध करण्यात येणार असल्याने उमेदवारांनी नियमितपणे संकेतस्थळावरील अद्ययावत माहिती तपासत राहावे, असे आवाहन केले आहे.