Major cannabis deal busted : अंमली पदार्थांच्या अवैध विक्रीविरोधात मेहकर पोलिसांनी मोठी कारवाई करत गांजा विक्रीचा डाव उधळून लावला. मेहकर-जानेफळ मार्गावरील गौढाळा शिवारात समृद्धी महामार्गाच्या पुलाखाली गांजाची विक्री करण्याच्या तयारीत असलेल्या टोळीवर पोलिसांनी छापा टाकला. या कारवाईत एका तरुणीसह सात जणांना ताब्यात घेण्यात आले असून, त्यांच्याकडून तब्बल १९ किलो ६६० ग्रॅम गांजा जप्त करण्यात आला आहे. गांजा, मारुती सुझुकी इरटिका कार, मोबाईल आणि अन्य साहित्य असा एकूण १९ लाख १३ हजार रुपयांचा मुद्देमाल पोलिसांनी हस्तगत केला आहे.

मेहकर पोलिसांचा अंमली पदार्थ तस्करांवर सर्जिकल स्ट्राइक; तरुणीसह सात जण ताब्यात, १९.१३ लाखांचा मुद्देमाल जप्त
गजानन तिडके
मेहकर : अंमली पदार्थांच्या अवैध विक्रीविरोधात मेहकर पोलिसांनी मोठी कारवाई करत गांजा विक्रीचा डाव उधळून लावला. मेहकर-जानेफळ मार्गावरील गौढाळा शिवारात समृद्धी महामार्गाच्या पुलाखाली गांजाची विक्री करण्याच्या तयारीत असलेल्या टोळीवर पोलिसांनी छापा टाकला. या कारवाईत एका तरुणीसह सात जणांना ताब्यात घेण्यात आले असून, त्यांच्याकडून तब्बल १९ किलो ६६० ग्रॅम गांजा जप्त करण्यात आला आहे. गांजा, मारुती सुझुकी इरटिका कार, मोबाईल आणि अन्य साहित्य असा एकूण १९ लाख १३ हजार रुपयांचा मुद्देमाल पोलिसांनी हस्तगत केला आहे.
गुप्त माहितीवरून पोलिसांचा सापळा
१९ नोव्हेंबर रोजी मेहकर पोलीस ठाण्याचे पोलीस निरीक्षक व्यंकटेश्वर आलेवार यांना गुप्त बातमीदारामार्फत माहिती मिळाली की, पांढऱ्या रंगाच्या मारुती सुझुकी इरटिका कारमधून काही जण आर्थिक फायद्यासाठी गांजा विक्रीच्या उद्देशाने मेहकर, जानेफळ आणि डोणगाव परिसरात येणार आहेत. गौढाळा शिवारातील समृद्धी महामार्गाच्या पुलाखाली गांजाची देवाणघेवाण होणार असल्याची माहितीही पोलिसांना मिळाली होती.
या माहितीची गंभीर दखल घेत पोलीस निरीक्षक आलेवार यांनी वरिष्ठ अधिकाऱ्यांना तत्काळ माहिती दिली. पोलीस अधीक्षक निलेश तांबे, अपर पोलीस अधीक्षक अमोल गायकवाड आणि उपविभागीय पोलीस अधिकारी संतोष खाडे यांच्या मार्गदर्शनाखाली पोलिसांनी छाप्याचे नियोजन केले.
दोन सुटकेसमध्ये आढळला १९ किलो ६६० ग्रॅम गांजा
पोलिसांच्या पथकाने मेहकर-जानेफळ मार्गावरील गौढाळा गावाजवळील समृद्धी महामार्गाच्या पुलाखाली सापळा रचला. यावेळी संशयित मारुती सुझुकी इरटिका कार (क्रमांक एमएच २८ सीसी ९८८४) आढळून आली. शासकीय पंच आणि पोलीस पथकाच्या उपस्थितीत कारची झडती घेतली असता मागील डिक्कीमध्ये ठेवलेल्या दोन सुटकेसमध्ये १९ किलो ६६० ग्रॅम गांजा आढळून आला.
संबंधित आरोपींनी हा गांजा विक्रीच्या उद्देशाने आणल्याची कबुली दिल्याचे पोलिसांनी नमूद केले आहे. त्यानंतर पोलिसांनी गांजा, कार, मोबाईल आणि अन्य साहित्य असा एकूण १९ लाख १३ हजार रुपयांचा मुद्देमाल जप्त केला.
एका तरुणीसह सात जण ताब्यात
या कारवाईत पोलिसांनी खालील सात जणांना ताब्यात घेतले आहे.
- किरण विष्णू चांदणे (वय ३०), चालक, रा. मुंदेफळ, ता. मेहकर, जि. बुलढाणा.
- योगेश वसंता पानभरे (वय २६), रा. पेंडगाव, ता. मंगरुळपीर, जि. वाशिम, ह.मु. इंदिरानगर, जानेफळ.
- विक्की रमेश दाभाडे (वय २०), रा. इंदिरानगर, जानेफळ, ता. मेहकर.
- अभिषेक नारायण शेवाळे (वय २१), रा. इंदिरानगर, जानेफळ, ता. मेहकर.
- संदीप आत्माराम दातार (वय ३६), रा. अहिल्यानगर, जानेफळ, ता. मेहकर.
- सचिन भगवान फुके (वय २०), रा. अहिल्यानगर, जानेफळ, ता. मेहकर.
- रिया अमोल साठे (वय १९), रा. शारत्नीनगर, कोथरूड, ता. जि. पुणे.
एनडीपीएस कायद्यान्वये गुन्हा दाखल
या प्रकरणी महिला पोलीस उपनिरीक्षक कांचन जारवाल यांनी सरकारतर्फे फिर्याद दिली. त्यावरून मेहकर पोलीस ठाण्यात गुन्हा क्रमांक ७६३/२०२६ अन्वये एनडीपीएस कायदा १९८५ मधील कलम २(ब), ८(क), २०(ब)(क) आणि २२ नुसार गुन्हा दाखल करण्यात आला आहे. आरोपींकडून गांजा बेकायदेशीररीत्या विक्रीच्या उद्देशाने बाळगण्यात आल्याचा आरोप आहे. या प्रकरणाचा पुढील तपास सुरू आहे.
वरिष्ठांच्या मार्गदर्शनाखाली पोलिसांचे पथक सक्रिय
ही कारवाई पोलीस अधीक्षक निलेश तांबे, अपर पोलीस अधीक्षक अमोल गायकवाड आणि उपविभागीय पोलीस अधिकारी संतोष खाडे यांच्या मार्गदर्शनाखाली करण्यात आली.
या कारवाईत मेहकरचे पोलीस निरीक्षक व्यंकटेश्वर आलेवार, जानेफळचे सहाय्यक पोलीस निरीक्षक शरद माळी, सहाय्यक पोलीस निरीक्षक अशोक अवचार, महिला पोलीस उपनिरीक्षक कांचन जारवाल, पोलीस उपनिरीक्षक गणेश कड, सहायक फौजदार राजेंद्र काळे, सुखदेव ठाकरे, श्रीकृष्ण गवई, पोलीस हेड कॉन्स्टेबल लक्ष्मण कटक, प्रभाकर शिवणकर, पोलीस कॉन्स्टेबल इब्राहीम परसुवाले, केशव अवचार, मोहम्मद परसुवाले, विनोद फुफाटे, विलास झोटे, गणेश वैद्य, शरद कापसे, रविदास चिंचोले, संदीप भोंडाणे, शिवाजी चिम आणि सायबर विभागाचे पोलीस कॉन्स्टेबल कैलास ठोबरे यांनी सहभाग घेतला.
या कारवाईमुळे मेहकर, जानेफळ आणि डोणगाव परिसरातील अंमली पदार्थांच्या अवैध व्यवहारांवर पोलिसांनी लक्ष केंद्रित केल्याचे स्पष्ट झाले आहे.

