House burglary: डोणगाव पोलीस स्टेशनअंतर्गत येणाऱ्या विठ्ठलवाडी येथे घरफोडीची धक्कादायक घटना उघडकीस आली आहे. फिर्यादी कुटुंब देवदर्शनासाठी बाहेर गेले असताना अज्ञात चोरट्यांनी बंद घराचे कुलूप तोडून घरात प्रवेश केला आणि कपाटातील सोन्याचे दागिने तसेच घराबाहेर उभी असलेली दुचाकी असा एकूण ७० हजार रुपयांचा मुद्देमाल लंपास केला. याप्रकरणी डोणगाव पोलीस ठाण्यात ६ जुलै रोजी गुन्हा दाखल करण्यात आला आहे.
देवदर्शनासाठी गेलेल्या कुटुंबाच्या घरावर चोरट्यांचा डल्ला; कुलूप तोडून घरफोडी
डोणगाव : डोणगाव पोलीस स्टेशनअंतर्गत येणाऱ्या विठ्ठलवाडी येथे घरफोडीची धक्कादायक घटना उघडकीस आली आहे. फिर्यादी कुटुंब देवदर्शनासाठी बाहेर गेले असताना अज्ञात चोरट्यांनी बंद घराचे कुलूप तोडून घरात प्रवेश केला आणि कपाटातील सोन्याचे दागिने तसेच घराबाहेर उभी असलेली दुचाकी असा एकूण ७० हजार रुपयांचा मुद्देमाल लंपास केला. याप्रकरणी डोणगाव पोलीस ठाण्यात ६ जुलै रोजी गुन्हा दाखल करण्यात आला आहे.
पोलिसांनी दिलेल्या माहितीनुसार, विठ्ठलवाडी येथील रहिवासी प्रल्हाद रामकिसन जाधव (वय ५०) हे २ जुलै २०२६ रोजी सकाळी ६ वाजताच्या सुमारास आपल्या कुटुंबासह मुलगा अक्षय आणि सून उमा यांच्यासोबत देवदर्शनासाठी शेगाव येथे गेले होते. दरम्यान, ५ जुलै रोजी सकाळी शेजारी राहणारे गणेश केशव खोडके यांनी जाधव यांना फोन करून त्यांच्या घराचा दरवाजा उघडा असून कुलूप तुटलेले दिसत असल्याची माहिती दिली.
ही माहिती मिळताच जाधव कुटुंब तात्काळ विठ्ठलवाडी येथे परतले. त्यांनी घरात जाऊन पाहणी केली असता, अज्ञात चोरट्यांनी लोखंडी कपाटाचा कोंडा तोडून त्यामधील सोन्याचे दागिने चोरून नेल्याचे निदर्शनास आले. यात अंदाजे ४० हजार रुपये किमतीच्या सोन्याच्या तीन अंगठ्या आणि २० हजार रुपये किमतीचे कानातील झुमक्यांचे जोड असा एकूण ६० हजार रुपयांचा ऐवज लंपास करण्यात आला.
याशिवाय, घराच्या बाजूला उभी असलेली रवींद्र गौतम अवचार (वय २२) यांच्या मालकीची हिरो मोटोकॉर्प स्प्लेंडर प्लस (क्र. MH-28-CD-0502) ही दुचाकीही चोरट्यांनी चोरून नेली. या दुचाकीची अंदाजे किंमत १० हजार रुपये असल्याचे सांगण्यात आले. अशा प्रकारे चोरट्यांनी एकूण ७० हजार रुपयांचा मुद्देमाल लंपास केला.
हा प्रकार २ जुलै २०२६ रोजी सकाळी ६ वाजल्यापासून ते ५ जुलै २०२६ रोजी सकाळी ६ वाजेपर्यंतच्या कालावधीत घडल्याचे फिर्यादीत नमूद करण्यात आले आहे. प्रल्हाद जाधव यांच्या तक्रारीवरून अज्ञात आरोपीविरुद्ध गुन्हा दाखल करण्यात आला असून पुढील तपास पोलीस नाईक गाढवे करीत आहेत.
दरम्यान, ग्रामीण भागात वाढत्या चोरीच्या घटनांमुळे नागरिकांमध्ये चिंतेचे वातावरण निर्माण झाले आहे. डोणगाव पोलीस ठाण्याच्या हद्दीत घडलेल्या या घरफोडीमुळे स्थानिकांमध्ये विविध चर्चांना उधाण आले आहे.
