Rakesh Tikait : देशातील प्रख्यात शेतकरी नेते राकेश टिकैत हे गुरुवार, ६ ऑगस्ट रोजी दुपारी ४ वाजता पातूर शहराला भेट देणार असून, ते येथील महात्मा जोतिराव फुले स्मारकाला अभिवादन करणार आहेत. त्यांच्या दौऱ्याच्या पार्श्वभूमीवर पातूरसह परिसरातील शेतकरी, युवक, सामाजिक कार्यकर्ते आणि विविध शेतकरी संघटनांमध्ये उत्सुकतेचे वातावरण निर्माण झाले आहे.
पातूरकडे शेतकऱ्यांचे लक्ष; राकेश टिकैत उद्या घेणार शेतकरी समस्यांचा आढावा
निशांत गवई
पातूर: देशातील प्रख्यात शेतकरी नेते राकेश टिकैत हे गुरुवार, ६ ऑगस्ट रोजी दुपारी ४ वाजता पातूर शहराला भेट देणार असून, ते येथील महात्मा जोतिराव फुले स्मारकाला अभिवादन करणार आहेत. त्यांच्या दौऱ्याच्या पार्श्वभूमीवर पातूरसह परिसरातील शेतकरी, युवक, सामाजिक कार्यकर्ते आणि विविध शेतकरी संघटनांमध्ये उत्सुकतेचे वातावरण निर्माण झाले आहे.
दौऱ्यादरम्यान राकेश टिकैत महात्मा जोतिराव फुले यांच्या स्मारकाला अभिवादन करून शेतकरी, कष्टकरी आणि सामाजिक न्यायाच्या विचारांना अभिवादन करणार आहेत. त्यानंतर ते उपस्थित शेतकरी बांधवांशी थेट संवाद साधून सध्याच्या शेती क्षेत्रासमोरील विविध प्रश्नांवर चर्चा करणार आहेत.
या संवादामध्ये शेतीमालाला हमीभाव, वाढते उत्पादन खर्च, पीकविमा, नैसर्गिक आपत्तीमुळे होणारे नुकसान, सिंचन सुविधा, वीजपुरवठा, कर्जमाफी, शेतकरी सन्मान आणि कृषी धोरणांतील सुधारणा यांसारख्या महत्त्वाच्या विषयांवर सविस्तर चर्चा होण्याची अपेक्षा आहे. तसेच शेतकऱ्यांच्या प्रलंबित मागण्यांसाठी पुढील आंदोलनाची दिशा निश्चित करण्याबाबतही विचारमंथन होण्याची शक्यता व्यक्त करण्यात येत आहे.
आयोजकांच्या माहितीनुसार, या दौऱ्याचा उद्देश केवळ शेतकरी प्रश्नांवर चर्चा करणे नसून, शासनाला प्रभावी निर्णय घेण्यास भाग पाडण्यासाठी व्यापक लोकचळवळ उभारण्यावर भर दिला जाणार आहे. शेतकरी एकजूट मजबूत करून लोकशाही मार्गाने संघर्ष करण्याचा संदेशही या कार्यक्रमातून दिला जाणार असल्याचे आयोजकांनी सांगितले.
राकेश टिकैत यांच्या दौऱ्यामुळे पातूर परिसरातील शेतकरी वर्गात विशेष उत्सुकता निर्माण झाली असून, विविध शेतकरी संघटनांनी कार्यक्रमाच्या तयारीला वेग दिला आहे. मोठ्या संख्येने शेतकऱ्यांची उपस्थिती अपेक्षित असून, कायदा व सुव्यवस्था राखण्यासाठी आवश्यक ती तयारीही प्रशासनाकडून केली जाण्याची शक्यता आहे.
आयोजकांनी शेतकरी बांधव, पत्रकार, सामाजिक कार्यकर्ते आणि नागरिकांनी मोठ्या संख्येने उपस्थित राहून शेतकऱ्यांच्या हक्काच्या लढ्याला बळ द्यावे, तसेच आपल्या सहभागातून ही चळवळ अधिक प्रभावी बनवावी, असे आवाहन केले आहे.
