relay hunger strike: कोट्यवधींचा खर्च, तरीही डोणगाव तहानलेलेच; पाणी योजनेच्या चौकशीसाठी ९ दिवसांपासून साखळी उपोषण

relay hunger strike: डोणगाव येथील नळ पाणीपुरवठा योजनेअंतर्गत तब्बल ४ कोटी ७३ लाख ५९ हजार रुपयांचा निधी मंजूर करण्यात आला आहे. त्यापैकी ३ कोटी २५ लाख ५० हजार रुपये खर्च झाल्याचे कागदोपत्री नमूद असून, योजनेचे ९५ टक्के भौतिक काम पूर्ण झाल्याचा दावा करण्यात येत आहे. मात्र, एवढा मोठा निधी खर्च होऊनही डोणगाववासीयांना अद्याप नियमित पाणीपुरवठा मिळत नसल्याने ग्रामस्थांमध्ये तीव्र नाराजी आहे.

४ कोटी ७३ लाखांच्या योजनेत ९५ टक्के कामाचा दावा; डोणगावात मात्र पाण्यासाठी टाहो

डोणगाव : डोणगाव येथील नळ पाणीपुरवठा योजनेअंतर्गत तब्बल ४ कोटी ७३ लाख ५९ हजार रुपयांचा निधी मंजूर करण्यात आला आहे. त्यापैकी ३ कोटी २५ लाख ५० हजार रुपये खर्च झाल्याचे कागदोपत्री नमूद असून, योजनेचे ९५ टक्के भौतिक काम पूर्ण झाल्याचा दावा करण्यात येत आहे. मात्र, एवढा मोठा निधी खर्च होऊनही डोणगाववासीयांना अद्याप नियमित पाणीपुरवठा मिळत नसल्याने ग्रामस्थांमध्ये तीव्र नाराजी आहे.

या योजनेत मोठ्या प्रमाणावर अनियमितता झाल्याचा संशय व्यक्त करत योजनेची सखोल चौकशी करून दोषींवर कारवाई करावी, या मागणीसाठी राष्ट्रवादी काँग्रेस (अजित पवार गट)चे प्रशांत पाटील गेल्या ९ दिवसांपासून मेहकर पंचायत समितीसमोर साखळी उपोषण करीत आहेत.

४ कोटी ७३ लाखांच्या योजनेवर प्रश्नचिन्ह

मिळालेल्या माहितीनुसार, ग्रामीण पाणीपुरवठा उपविभाग, मेहकर अंतर्गत डोणगाव येथील पाणीपुरवठा योजनेची मूळ अंदाजपत्रकीय किंमत ४७३.५९ लाख रुपये आहे. उपलब्ध कागदपत्रांनुसार योजनेचे ९५ टक्के काम पूर्ण झाल्याचे दाखविण्यात आले असून, आतापर्यंत ३२५.५० लाख रुपये खर्च झाल्याचे नमूद आहे.

मात्र, प्रत्यक्षात गावातील पाणीपुरवठा अद्याप सुरळीत झालेला नसल्याने योजनेच्या कामाच्या गुणवत्तेबाबत आणि झालेल्या खर्चाबाबत प्रश्न उपस्थित केले जात आहेत. त्यामुळे या संपूर्ण योजनेची सखोल चौकशी करून वस्तुस्थिती स्पष्ट करावी, अशी मागणी उपोषणकर्त्यांकडून करण्यात येत आहे.

मुख्य कार्यकारी अधिकाऱ्यांची उपोषणस्थळी भेट

उपोषणकर्त्यांच्या मागण्यांची दखल घेत जिल्हा परिषदेचे मुख्य कार्यकारी अधिकारी (CEO) गुलाबराव खरात यांनी ७ ऑक्टोबर रोजी मेहकर येथील उपोषणस्थळी प्रत्यक्ष भेट दिली. यावेळी त्यांनी प्रशांत पाटील यांच्यासह आंदोलकांशी चर्चा करून त्यांच्या मागण्या जाणून घेतल्या.

डोणगाव पाणीपुरवठा योजनेतील अनियमितता आणि नागरिकांना होत असलेली गैरसोय लक्षात घेऊन खरात यांनी ८ ऑक्टोबर रोजी संबंधित कंत्राटदारांची तातडीची बैठक घेण्यात येणार असल्याचे सांगितले. तसेच आवश्यकतेनुसार योग्य ती कारवाई करण्याचे आश्वासनही त्यांनी उपोषणकर्त्यांना दिले.

आता प्रशासनाच्या आश्वासनानंतर संबंधित कंत्राटदार आणि अधिकाऱ्यांवर नेमकी कोणती कारवाई होते, तसेच डोणगाववासीयांची पिण्याच्या पाण्याची समस्या कधी सुटते, याकडे ग्रामस्थांसह संपूर्ण तालुक्याचे लक्ष लागले आहे.