Cylinder Explosion at Umra : सिलिंडरचा स्फोट झाल्याने लागलेल्या आगीत दोन घरे जळून खाक झाले. या आगीत दोन कुटुंबाचे लाखो रुपयांचे नुकसान झाले. ही घटना पातुर तालुक्यातील उमरा येथे मंगळवारी (२३ एप्रिल) रोजच्या दुपारी सुमारे एक वाजताच्या सुमारास घडली.
दोन कुटुंबांचा संसार उघड्यावर ; नुकसानग्रस्तांना मदत देण्याची मागणी
राहुल सोनोने
दिग्रस बू: सिलिंडरचा स्फोट झाल्याने लागलेल्या आगीत दोन घरे जळून खाक झाले. या आगीत दोन कुटुंबाचे लाखो रुपयांचे नुकसान झाले. ही घटना पातुर तालुक्यातील उमरा येथे मंगळवारी (२३ एप्रिल) रोजच्या दुपारी सुमारे एक वाजताच्या सुमारास घडली.
उमरा येथे सिलिंडरचा स्फोट झाल्याने समाधान चुनडे आणि भागवत चुनडे या काका-पुतण्यांच्या घरांना आग लागली. या आगीत दोन्ही घरे पूर्णतः जळून खाक झाली. स्फोट इतका तीव्र होता की घरातील अन्नधान्य, कपडे तसेच रोख रक्कम यासह लाखो रुपयांचे नुकसान झाले.घटनेच्या वेळी दोन्ही कुटुंबातील सदस्य घरात नसल्यामुळे मोठी जीवितहानी टळली, ही दिलासादायक बाब ठरली. स्फोटाची माहिती मिळताच गावातील ग्रामस्थांनी तात्काळ घटनास्थळी धाव घेत आग विझवण्याचा प्रयत्न केला. मात्र तोपर्यंत दोन्ही घरे आगीच्या भक्ष्यस्थानी पडली होती.दरम्यान, एका घरामागे बांधलेल्या दोन गाईंना ग्रामस्थांनी प्रसंगावधान राखून सुरक्षित बाहेर काढले. घटनेची माहिती मिळताच ठाणेदार रवींद्र लांडे यांच्या मार्गदर्शनाखाली बीट जमादार दिनेश झटाले, म्हात्रे मेजर, यांनी तत्काळ घटनास्थळी भेट दिली. या दुर्घटनेमुळे दोन्ही कुटुंबांचा संसार उघड्यावर आला असून, प्रशासनाने तातडीने नुकसान भरपाई द्यावी, अशी मागणी ग्रामस्थांकडून केली जात आहे.
