Buldhana achieves historic:बुलढाण्याची निर्यातीत ऐतिहासिक भरारी; प्रथमच १,०५१ कोटींचा विक्रम

Buldhana achieves historic: बुलढाणा जिल्ह्याने आर्थिक आणि औद्योगिक क्षेत्रात ऐतिहासिक कामगिरी नोंदवत निर्यातीत प्रथमच १,०५१ कोटी रुपयांचा टप्पा गाठला आहे. आर्थिक वर्ष २०२५-२६ मधील या विक्रमी कामगिरीमुळे बुलढाणा जिल्हा महाराष्ट्रातील उदयोन्मुख निर्यात केंद्र म्हणून अधिक ठळकपणे पुढे आला आहे. विशेष म्हणजे, अमरावती विभागाच्या एकूण निर्यातीपैकी तब्बल ४७.४ टक्के वाटा एकट्या बुलढाणा जिल्ह्याचा असून, विभागात जिल्ह्याने सलग अव्वल स्थान कायम राखले आहे.

 अमरावती विभागात सलग अव्वल; पाच वर्षांत १४६ टक्क्यांची झेप

बुलढाणा : बुलढाणा जिल्ह्याने आर्थिक आणि औद्योगिक क्षेत्रात ऐतिहासिक कामगिरी नोंदवत निर्यातीत प्रथमच १,०५१ कोटी रुपयांचा टप्पा गाठला आहे. आर्थिक वर्ष २०२५-२६ मधील या विक्रमी कामगिरीमुळे बुलढाणा जिल्हा महाराष्ट्रातील उदयोन्मुख निर्यात केंद्र म्हणून अधिक ठळकपणे पुढे आला आहे. विशेष म्हणजे, अमरावती विभागाच्या एकूण निर्यातीपैकी तब्बल ४७.४ टक्के वाटा एकट्या बुलढाणा जिल्ह्याचा असून, विभागात जिल्ह्याने सलग अव्वल स्थान कायम राखले आहे.

जिल्ह्याच्या निर्यातीत गेल्या पाच वर्षांत सातत्याने वाढ झाली आहे. आर्थिक वर्ष २०२१-२२ मध्ये ४२८ कोटी रुपये असलेली निर्यात २०२५-२६ मध्ये १,०५१ कोटी रुपयांवर पोहोचली आहे. या कालावधीत निर्यातीत १४६ टक्क्यांची एकत्रित वाढ नोंदविण्यात आली. मागील आर्थिक वर्षातील ८७४ कोटी रुपयांच्या तुलनेत यंदा २०.३ टक्क्यांची वार्षिक वाढ झाली आहे. कृषी आणि औद्योगिक क्षेत्रातील स्पर्धात्मकता वाढल्याचे हे महत्त्वपूर्ण द्योतक मानले जात आहे.

अमरावती विभागातील एकूण २,२१८ कोटी रुपयांच्या निर्यातीपैकी सर्वाधिक १,०५१ कोटी रुपयांची निर्यात बुलढाणा जिल्ह्यातून झाली आहे. विभागातील इतर जिल्ह्यांमध्ये अकोला – ५१९ कोटी, अमरावती – ३५० कोटी, यवतमाळ – २५७ कोटी आणि वाशीम – ४१ कोटी रुपये इतकी निर्यात नोंदविण्यात आली आहे. या आकडेवारीवरून विभागातून निर्यात होणाऱ्या प्रत्येक दोन रुपयांपैकी जवळपास एक रुपयांचा माल बुलढाणा जिल्ह्यातून परदेशात जात असल्याचे स्पष्ट होते.

जिल्हा आता केवळ पारंपरिक कृषी उत्पादनांपुरता मर्यादित न राहता मूल्यवर्धित उत्पादनांच्या निर्यातीवर भर देत आहे. निर्यातीत कापूस हा २२३ कोटी रुपयांसह अग्रस्थानी असला, तरी सुगंधी तेले व सौंदर्यप्रसाधने – २२१ कोटी, विविध रासायनिक उत्पादने – १३१ कोटी, गळित धान्य व कृषी बियाणे – १३८ कोटी, तसेच खाद्य भाज्या व कंदमुळे – ११६ कोटी रुपये या प्रक्रियायुक्त उत्पादनांनी निर्यातीला मोठी गती दिली आहे. विशेष म्हणजे, सुगंधी तेले व सौंदर्यप्रसाधनांच्या निर्यातीत ११९ कोटी, तर रासायनिक उत्पादनांमध्ये १०२ कोटी रुपयांची वाढ झाली आहे.

बुलढाणा जिल्ह्यातील उत्पादनांसाठी बांगलादेश ही सर्वात मोठी बाजारपेठ ठरली असून, तेथे २३१ कोटी रुपयांची निर्यात झाली आहे. याशिवाय युनायटेड किंगडम, नेदरलँड्स, सिंगापूर आणि अमेरिका यांसारख्या विकसित देशांमध्येही जिल्ह्यातील कृषी व औद्योगिक उत्पादनांची मागणी सातत्याने वाढत आहे.

या उल्लेखनीय कामगिरीबद्दल जिल्हाधिकारी डॉ. प्रवीणकुमार देवरे यांनी समाधान व्यक्त करत, १,००० कोटी रुपयांचा निर्यातीचा टप्पा पार करणे हा संपूर्ण जिल्ह्यासाठी अभिमानाचा क्षण असल्याचे म्हटले आहे. ही कामगिरी शेतकरी, उद्योजक, निर्यातदार आणि औद्योगिक क्षेत्रातील सर्व घटकांच्या सामूहिक प्रयत्नांचे फलित असल्याचे त्यांनी नमूद केले.

या ऐतिहासिक यशामागे जिल्हा प्रशासनासोबतच जिल्हा उद्योग केंद्राचे मोलाचे योगदान राहिले आहे. जिल्हा उद्योग केंद्राचे महाव्यवस्थापक प्रमोद लांडे यांच्या नेतृत्वाखाली अनेक नाविन्यपूर्ण उपक्रम राबविण्यात आले. ‘डिस्ट्रिक्ट्स ॲज एक्सपोर्ट हब’ योजनेअंतर्गत स्थानिक उद्योजकांसाठी खरेदीदार-विक्रेता मेळावे, उद्यम व निर्यात नोंदणी मोहीम, तसेच गुणवत्ता मानकांबाबत विशेष कार्यशाळा आयोजित करण्यात आल्या. भविष्यात सुगंधी तेले आणि रसायनांसाठी विशेष क्लस्टर्स विकसित करणे तसेच कोल्ड-चेन सुविधा बळकट करणे हे प्रशासनाचे उद्दिष्ट असून, त्यामुळे बुलढाणा जिल्हा आगामी काळात आंतरराष्ट्रीय स्तरावर आणखी मोठी भरारी घेईल, असा विश्वास व्यक्त केला जात आहे.