Allegation:अवैध दारूबंदीची मागणी करणाऱ्यांचा अपमान केल्याचा आरोप; ठाणेदारांच्या निलंबनाची मागणी

Allegation: गावातील अवैध दारूविक्री बंद करण्यासाठी सनदशीर मार्गाने पोलीस ठाण्यात गेलेल्या सरपंच, महिला व ग्रामस्थांशी ठाणेदारांनी आक्षेपार्ह, अपमानास्पद आणि उद्धट वर्तन केल्याचा गंभीर आरोप हिवरखेड पूर्णा येथील ग्रामस्थांनी केला आहे. संबंधित ठाणेदार  संजय मातोंडकर यांची तात्काळ स्वतंत्र व निष्पक्ष चौकशी करून त्यांना निलंबित करण्यात यावे, अशी मागणी जिल्हा पोलीस अधीक्षकांकडे करण्यात आली आहे.

हिवरखेड पूर्णा ग्रामस्थांचा पोलीस प्रशासनाविरोधात संताप; १० सप्टेंबरला आंदोलनाचा इशारा

गजानन तिडके

  बुलढाणा : गावातील अवैध दारूविक्री बंद करण्यासाठी सनदशीर मार्गाने पोलीस ठाण्यात गेलेल्या सरपंच, महिला व ग्रामस्थांशी ठाणेदारांनी आक्षेपार्ह, अपमानास्पद आणि उद्धट वर्तन केल्याचा गंभीर आरोप हिवरखेड पूर्णा येथील ग्रामस्थांनी केला आहे. संबंधित ठाणेदार  संजय मातोंडकर यांची तात्काळ स्वतंत्र व निष्पक्ष चौकशी करून त्यांना निलंबित करण्यात यावे, अशी मागणी जिल्हा पोलीस अधीक्षकांकडे करण्यात आली आहे.

या प्रकरणी तातडीने कारवाई न झाल्यास दि. १० सप्टेंबर २०२६ रोजी लोकशाही मार्गाने आंदोलन व उपोषण करण्याचा इशाराही ग्रामस्थांनी दिला आहे.

तक्रारकर्त्यांच्या निवेदनानुसार, हिवरखेड पूर्णा गावात अवैध दारूविक्रीचे प्रमाण वाढल्याने सामाजिक शांतता धोक्यात आली असून महिला व नागरिकांना विविध प्रकारचा त्रास सहन करावा लागत आहे. या पार्श्वभूमीवर ग्रामसभेचा ठराव घेऊन अवैध दारूबंदीची मागणी करण्यात आली होती. त्यानंतर सरपंच, महिला व ज्येष्ठ ग्रामस्थांनी एकत्रितपणे दि. १९ ऑगस्ट २०२६ रोजी पोलीस ठाण्यात जाऊन कारवाईची मागणी केली होती.

मात्र, निवेदनात असा आरोप करण्यात आला आहे की, संबंधित ठाणेदारांनी या प्रकरणाची चौकशी करून अवैध दारूविक्रीविरोधात कारवाई करण्याऐवजी तक्रार घेऊन गेलेल्या लोकनियुक्त सरपंच, महिला व ग्रामस्थांशी आक्षेपार्ह आणि अपमानास्पद वर्तन केले. महिलांची अवहेलना करण्यात आल्याचाही आरोप निवेदनात करण्यात आला आहे.

“अवैध दारूबंदीची मागणी करणे हा गुन्हा आहे का?” असा संतप्त सवाल उपस्थित करत ग्रामस्थांनी या घटनेमुळे संपूर्ण गावात तीव्र नाराजीचे वातावरण निर्माण झाल्याचे म्हटले आहे. सनदशीर मार्गाने तक्रार करणाऱ्या नागरिकांचे मनोबल खच्ची करण्याचा प्रयत्न होत असल्याचा आरोपही करण्यात आला आहे.

ग्रामस्थांनी जिल्हा पोलीस अधीक्षकांकडे चार प्रमुख मागण्या केल्या आहेत. संबंधित ठाणेदारांवरील आरोपांची तात्काळ स्वतंत्र व निष्पक्ष चौकशी करण्यात यावी, चौकशी पूर्ण होईपर्यंत त्यांना निलंबित करण्यात यावे, हिवरखेड पूर्णा येथील अवैध दारूविक्री कायमस्वरूपी बंद करण्यासाठी विशेष पथकाद्वारे कडक कारवाई करण्यात यावी, तसेच दि. १९ ऑगस्ट रोजी पोलीस ठाण्यातील सीसीटीव्ही कॅमेऱ्यांचे फुटेज तपासण्यात यावे, अशी मागणी करण्यात आली आहे.

या मागण्यांकडे दुर्लक्ष झाल्यास हिवरखेड पूर्णा येथील लोकनियुक्त महिला सरपंच, तंटामुक्ती समिती, ग्रामपंचायत सदस्य, महिला व ग्रामस्थ दि. १० सप्टेंबर रोजी आंदोलन व उपोषण करतील, असा स्पष्ट इशारा निवेदनाद्वारे देण्यात आला आहे.

हे निवेदन जिल्हा पोलीस अधीक्षक, मुख्यमंत्री तथा गृहमंत्री, जिल्ह्याचे पालकमंत्री, जिल्हाधिकारी आणि सिंदखेड राजा तहसीलदार यांनाही पाठविण्यात आले आहे. निवेदनावर लोकनियुक्त सरपंच सौ. करूणा भारत वाघमारे, ग्रामपंचायत सदस्य, तंटामुक्ती समितीचे पदाधिकारी तसेच विविध सामाजिक कार्यकर्ते व ग्रामस्थांच्या सह्या आहेत.