Balaji Palkhi : देऊळगाव राजात बालाजींच्या पालखी सोहळ्याला भक्तांचा महासागर; ५२ थांब्यांवर चरणस्पर्श दर्शन

Balaji Palkhi : महाराष्ट्रातील लाखो भाविकांचे श्रद्धास्थान आणि तिरुपतीचे प्रतिरूप मानल्या जाणाऱ्या श्री बालाजी महाराजांच्या पालखी सोहळ्यात भक्तीचा उत्साह ओसंडून वाहताना दिसला. मध्यरात्रीनंतर पालखीत विराजमान झालेले श्री बालाजी महाराज सीमोल्लंघनासाठी मार्गस्थ झाले. सुमारे २० तास चाललेल्या या सोहळ्यात ५२ थांब्यांवर हजारो भाविकांनी श्रींच्या मूर्तीला स्पर्श करून चरणस्पर्श दर्शनाचा लाभ घेतला.

 ३३४ वर्षांची ऐतिहासिक परंपरा जपणारा बालाजींचा पालखी सोहळा उत्साहात; जयघोषाने दुमदुमली देऊळगाव राजा नगरी

गजानन तिडके

देऊळगाव राजा : महाराष्ट्रातील लाखो भाविकांचे श्रद्धास्थान आणि तिरुपतीचे प्रतिरूप मानल्या जाणाऱ्या श्री बालाजी महाराजांच्या पालखी सोहळ्यात भक्तीचा उत्साह ओसंडून वाहताना दिसला. मध्यरात्रीनंतर पालखीत विराजमान झालेले श्री बालाजी महाराज सीमोल्लंघनासाठी मार्गस्थ झाले. सुमारे २० तास चाललेल्या या सोहळ्यात ५२ थांब्यांवर हजारो भाविकांनी श्रींच्या मूर्तीला स्पर्श करून चरणस्पर्श दर्शनाचा लाभ घेतला.

३३४ वर्षांची ऐतिहासिक परंपरा लाभलेल्या या सोहळ्याला यंदाही भाविकांचा उत्स्फूर्त प्रतिसाद मिळाला. ‘लक्ष्मीरमण गोविंदा’ आणि ‘श्री बालाजी महाराज की जय’ अशा जयघोषात श्रींची पालखी मध्यरात्रीनंतर मंदिराबाहेर पडली. भक्तांच्या गर्दीने संपूर्ण परिसर भक्तिमय झाला होता.

पारंपरिक धार्मिक विधींनी सोहळ्याचा प्रारंभ

पालखी सोहळ्यापूर्वी ब्राह्मणवृंद आणि असंख्य भाविकांच्या उपस्थितीत श्री बालाजी संस्थानचे वंशपरंपरागत विश्वस्त राजे विजयसिंह जाधव यांनी कुटुंबीयांसह श्रींची महाआरती केली. यावेळी घटउत्थापन, यजमानांचा व मानाचा अभिषेक, वंशपरंपरेनुसार विश्वस्त राजे विजयसिंह जाधव यांचा पुजाऱ्यांच्या हस्ते सपत्नीक सत्कार, शस्त्रपूजन आणि आशीर्वाद विधी आदी धार्मिक कार्यक्रम पार पडले.

५२ थांब्यांवर चरणस्पर्श दर्शनाची संधी

पालखी सोहळ्याचे वैशिष्ट्य म्हणजे विविध थांब्यांवर भाविकांना श्री बालाजी महाराजांच्या मूर्तीचे चरणस्पर्श दर्शन घेण्याची मिळणारी संधी. यंदाही सुमारे २० तासांच्या या सोहळ्यात ५२ थांब्यांवर हजारो भाविकांनी दर्शन घेतले. नदीवरील पालखीच्या बैठकीच्या ठिकाणी संस्थानच्या वतीने भाविकांसाठी दर्शनाची व्यवस्था करण्यात आली होती.

ढोल-ताशांच्या गजरात पालखीची मिरवणूक

पालखी मिरवणुकीत दिंड्या, भजनी मंडळे, श्री लक्ष्मीरमण ढोल पथक, महाविद्यालयाचे श्री व्यंकटेश ढोल-ताशा व ध्वज पथक, कलागंध ढोल-ताशा व ध्वज पथक, जालना येथील ढोल पथक तसेच चाळीसगाव येथील बँड पथक सहभागी झाले होते. ढोल-ताशांचा निनाद, भक्तिगीते आणि जयघोषामुळे संपूर्ण शहरात उत्साहाचे वातावरण निर्माण झाले होते.

पालखीसोबत सहभागी झालेल्या पथकांसह भाविकांसाठी शहरातील दानशूर अन्नदात्यांनी ठिकठिकाणी अन्नदानाची व्यवस्था केली होती. त्यामुळे भक्तीबरोबरच सेवाभावाचेही दर्शन या सोहळ्यात घडले.

शिस्तबद्ध नियोजन आणि सुरक्षिततेवर भर

पालखी सोहळ्यातील गर्दीचे व्यवस्थापन आणि भाविकांना सुरळीत दर्शन मिळावे, यासाठी पट्टेधारी खांदेकरांनी विशेष ड्रेसकोड परिधान केला होता. तसेच ‘श्री बालाजी महाराज संस्थान, देऊळगाव राजा’ असे नाव असलेले आकर्षक पट्टे वापरून पालखीचे मार्गक्रमण शिस्तबद्ध पद्धतीने पार पाडले.

भाविकांच्या सुरक्षिततेसाठी श्री बालाजी संस्थानच्या वतीने मंदिर व परिसर, संस्थान कार्यालय, अधिकृत अन्नछत्र, भक्तनिवास तसेच नदीवरील पालखी बैठकीच्या ठिकाणी २५ सीसीटीव्ही कॅमेऱ्यांद्वारे चोवीस तास रेकॉर्डिंगची व्यवस्था करण्यात आली होती.

सर्वांच्या सहकार्याने सोहळा उत्साहात

पालखी सोहळा शांततेत आणि शिस्तबद्ध वातावरणात पार पडावा, यासाठी ब्राह्मणवृंद, पट्टेधारी, समाजसेवक, मानकरी, श्री बालाजी संस्थान, पोलीस प्रशासन, श्री व्यंकटेश महाविद्यालयाचे एनसीसी व एनएसएस पथक तसेच असंख्य भाविकांनी परिश्रम घेतले.३३४ वर्षांची परंपरा जपणाऱ्या या पालखी सोहळ्याने देऊळगाव राजा नगरीतील धार्मिक आणि सांस्कृतिक वारशाचे दर्शन घडविले. श्री बालाजी महाराजांच्या चरणी नतमस्तक होत भाविकांनी श्रद्धा, भक्ती आणि सेवाभावाचा अनोखा संगम अनुभवला.