pothole filled: राज्य महामार्गावरून प्रवास करणाऱ्या वाहनधारकांच्या जीवितास धोका ठरत असलेला जीवघेणा खड्डा डोणगाव वाहतूक पोलिसांनी स्वखर्चाने बुजवून सामाजिक बांधिलकीचे उत्तम उदाहरण घालून दिले आहे. संबंधित विभागाकडून दुरुस्तीची प्रतीक्षा न करता पोलिसांनी स्वतः पुढाकार घेतल्याने संभाव्य अपघात टळण्यास मदत झाली असून, नागरिकांकडून त्यांच्या या कार्याचे सर्वत्र कौतुक होत आहे.
अपघात टाळण्यासाठी पोलिसांचा पुढाकार; राज्य महामार्गावरील खड्डा स्वतःच्या खर्चाने दुरुस्त
डोणगाव : राज्य महामार्गावरून प्रवास करणाऱ्या वाहनधारकांच्या जीवितास धोका ठरत असलेला जीवघेणा खड्डा डोणगाव वाहतूक पोलिसांनी स्वखर्चाने बुजवून सामाजिक बांधिलकीचे उत्तम उदाहरण घालून दिले आहे. संबंधित विभागाकडून दुरुस्तीची प्रतीक्षा न करता पोलिसांनी स्वतः पुढाकार घेतल्याने संभाव्य अपघात टळण्यास मदत झाली असून, नागरिकांकडून त्यांच्या या कार्याचे सर्वत्र कौतुक होत आहे.
गेल्या काही दिवसांपासून डोणगाव बसस्थानकाजवळील राज्य महामार्गावर मोठा खड्डा पडला होता. या खड्ड्यामुळे दुचाकीस्वारांसह इतर वाहनचालकांना मोठा त्रास सहन करावा लागत होता. विशेषतः रात्रीच्या वेळी खड्डा न दिसल्याने अपघात होण्याचा धोका वाढला होता. अनेक लहान-मोठे अपघातही येथे घडल्याची माहिती स्थानिकांनी दिली.
ही गंभीर बाब लक्षात घेऊन डोणगाव पोलीस ठाण्याचे ठाणेदार गणेश इंगोले यांच्या मार्गदर्शनाखाली वाहतूक शाखेचे पोलीस अंमलदार हर्षे सहगल आणि पवन गाभणे यांनी तातडीने पुढाकार घेतला. सार्वजनिक बांधकाम विभागाच्या दुरुस्तीची वाट न पाहता त्यांनी स्वतःच्या खिशातून पैसे खर्च करून मुरूम आणला.
त्यानंतर दोन्ही पोलीस कर्मचाऱ्यांनी प्रत्यक्ष रस्त्यावर उतरून स्वतःच्या हाताने तो खड्डा भरून रस्ता वाहतुकीसाठी सुरक्षित केला. त्यांच्या या कृतीमुळे महामार्गावरील वाहतूक अधिक सुरक्षित झाली असून, वाहनधारकांना मोठा दिलासा मिळाला आहे.
वाहतूक नियंत्रणाबरोबरच नागरिकांच्या जीवित सुरक्षेला प्राधान्य देत केलेल्या या उपक्रमामुळे डोणगाव वाहतूक पोलिसांविषयी नागरिकांमध्ये आदराची भावना निर्माण झाली आहे. परिसरातील नागरिक, व्यापारी आणि वाहनधारकांनी या संवेदनशील व लोकाभिमुख कार्याबद्दल पोलीस प्रशासनाचे मनःपूर्वक आभार मानले आहेत.
“पोलिसांचे काम केवळ कायदा व सुव्यवस्था राखणे एवढ्यापुरते मर्यादित नसून, नागरिकांच्या सुरक्षिततेसाठी आवश्यक तेथे स्वतःहून पुढाकार घेणेही तेवढेच महत्त्वाचे आहे. डोणगाव वाहतूक पोलिसांनी केलेले हे कार्य इतरांसाठीही प्रेरणादायी आहे,” अशा भावना स्थानिक नागरिकांनी व्यक्त केल्या.
