All schools in Buldhana district : विदर्भातील तीव्र उष्णतेची परिस्थिती आणि विद्यार्थ्यांच्या आरोग्याचा विचार करून बुलढाणा जिल्ह्यातील सर्व व्यवस्थापनांच्या व सर्व माध्यमांच्या शाळा आता ३० जून २०२६ पासून सुरू होणार आहेत. याबाबत जिल्हा परिषद शिक्षण विभागाने महत्त्वपूर्ण परिपत्रक जारी केले असून जिल्ह्यातील सर्व शाळांना या आदेशाचे काटेकोर पालन करण्याचे निर्देश देण्यात आले आहेत.
विदर्भातील उष्णतेचा परिणाम; विद्यार्थ्यांच्या आरोग्यासाठी शाळा सुरू होण्यास मुदतवाढ
बुलढाणा : विदर्भातील तीव्र उष्णतेची परिस्थिती आणि विद्यार्थ्यांच्या आरोग्याचा विचार करून बुलढाणा जिल्ह्यातील सर्व व्यवस्थापनांच्या व सर्व माध्यमांच्या शाळा आता ३० जून २०२६ पासून सुरू होणार आहेत. याबाबत जिल्हा परिषद शिक्षण विभागाने महत्त्वपूर्ण परिपत्रक जारी केले असून जिल्ह्यातील सर्व शाळांना या आदेशाचे काटेकोर पालन करण्याचे निर्देश देण्यात आले आहेत.
विदर्भातील वाढत्या तापमानाच्या पार्श्वभूमीवर विद्यार्थ्यांच्या आरोग्याच्या सुरक्षेसाठी मुंबई उच्च न्यायालयाच्या नागपूर खंडपीठात याचिका दाखल करण्यात आली होती. या याचिकेवर सुनावणी करताना न्यायालयाने विद्यार्थ्यांच्या आरोग्याबाबत गंभीर चिंता व्यक्त केली होती. त्यानुसार शासनाच्या शिक्षण संचालनालयाने दिलेल्या निर्देशांच्या अनुषंगाने शाळा सुरू करण्याची तारीख पुढे ढकलण्याचा निर्णय घेण्यात आला आहे.
शिक्षण विभागाने जारी केलेल्या आदेशानुसार हा निर्णय जिल्ह्यातील राज्य मंडळ, सीबीएसई तसेच इतर सर्व शैक्षणिक मंडळांशी संलग्न प्राथमिक, माध्यमिक आणि उच्च माध्यमिक शाळांना लागू राहणार आहे. त्यामुळे शाळा सुरू करण्याबाबत असलेला संभ्रम दूर झाला असून संपूर्ण जिल्ह्यात एकाच तारखेपासून शैक्षणिक वर्षाची सुरुवात होणार आहे.
दरम्यान, शिक्षणाधिकारी (माध्यमिक) यांनी सर्व गटशिक्षणाधिकारी, मुख्याध्यापक आणि प्राचार्यांना स्पष्ट सूचना दिल्या आहेत की, ३० जूनपूर्वी कोणत्याही विद्यार्थ्याला वर्ग, सराव, उपक्रम किंवा इतर कोणत्याही कारणासाठी शाळेत बोलावू नये. आदेशाचे उल्लंघन करणाऱ्या शाळांवर नियमानुसार कारवाई करण्यात येणार असल्याचा इशाराही देण्यात आला आहे.
विद्यार्थ्यांच्या आरोग्याला प्राधान्य देत घेण्यात आलेल्या या निर्णयाचे पालकांकडून स्वागत होत असून, उष्णतेच्या पार्श्वभूमीवर शालेय विद्यार्थ्यांना मोठा दिलासा मिळाला आहे.
