District Chiefs Daughter : शिवसेना (उबाठा) जिल्हाप्रमुख जालिंदर बुधवत यांची कन्या शीतल जालिंदर बुधवत हिने स्वकर्तृत्व, सातत्यपूर्ण परिश्रम आणि शिक्षणाच्या जोरावर स्वतःचे वेगळे स्थान निर्माण करत तरुणांसमोर नवा आदर्श उभा केला आहे. राज्य लोकसेवा आयोगाच्या गट ‘क’ संवर्गाच्या निकालात शीतलने खुल्या महिला प्रवर्गातून राज्यात नववा क्रमांक पटकावत बुलढाणा जिल्ह्याचा मान उंचावला आहे. तिची मंत्रालयात कर सहाय्यक पदावर निवड झाली आहे.
परिश्रम, जिद्द आणि शिक्षणाची ताकद; शीतल बुधवतचा प्रेरणादायी यशोगाथा
पंडीत सावळे
मासरूळ : शिवसेना (उबाठा) जिल्हाप्रमुख जालिंदर बुधवत यांची कन्या शीतल जालिंदर बुधवत हिने स्वकर्तृत्व, सातत्यपूर्ण परिश्रम आणि शिक्षणाच्या जोरावर स्वतःचे वेगळे स्थान निर्माण करत तरुणांसमोर नवा आदर्श उभा केला आहे. राज्य लोकसेवा आयोगाच्या गट ‘क’ संवर्गाच्या निकालात शीतलने खुल्या महिला प्रवर्गातून राज्यात नववा क्रमांक पटकावत बुलढाणा जिल्ह्याचा मान उंचावला आहे. तिची मंत्रालयात कर सहाय्यक पदावर निवड झाली आहे.
गेल्या अनेक दशकांपासून शिवसेनेशी निष्ठेने जोडलेले असलेले जालिंदर बुधवत हे पक्षप्रमुख उद्धव ठाकरे यांचे निकटवर्तीय म्हणून ओळखले जातात. राजकीय क्षेत्रात प्रभावी स्थान असूनही त्यांनी आपल्या मुलांना राजकारणापासून दूर ठेवत शिक्षणाला सर्वोच्च प्राधान्य दिले. याच संस्कारांची फळे आज शीतलच्या यशातून दिसून आली आहेत.
शीतलने माध्यमिक शिक्षण बुलढाण्यातील भारत विद्यालय येथे पूर्ण केले. त्यानंतर पुण्यातील फर्ग्युसन कॉलेज येथे इंग्रजी विषयात बीए पदवीचे शिक्षण घेतले. पदव्युत्तर शिक्षणानंतर तिने राज्य शासनाच्या सेवेत जाण्याचा निर्धार केला आणि पुण्यात राहून स्पर्धा परीक्षेची शिस्तबद्ध तयारी सुरू ठेवली.
तिच्या या सातत्यपूर्ण अभ्यासाचे फळ तिला आधीही मिळाले होते. यापूर्वी शीतलने नागपूर महानगरपालिका येथे कर सहाय्यक पद मिळवत पहिले यश संपादन केले होते. मात्र त्यावर न थांबता तिने अधिक मोठ्या ध्येयासाठी झटत राहून आता मंत्रालयातील कर सहाय्यक पदावर निवड मिळवली, हे तिच्या जिद्दीचे आणि आत्मविश्वासाचे द्योतक ठरले आहे.
