Midnight Blaze Wreaks Havoc :शहराच्या मध्यवर्ती आणि गजबजलेल्या सिटी कोतवाली परिसरात मध्यरात्री लागलेल्या भीषण आगीने ६ ते ७ कापड दुकाने अक्षरशः भस्मसात झाली. या आगीत दुकानदारांचे लाखो रुपयांचे नुकसान झाल्याची प्राथमिक माहिती समोर आली असून सुदैवाने कोणतीही जीवितहानी टळली आहे.
‘बिंदी घर’ परिसरातील बाजारपेठ भस्मसात; लाखोंचे नुकसान, अग्निशमन दलाने मोठी दुर्घटना टाळली
अकोला : शहराच्या मध्यवर्ती आणि गजबजलेल्या सिटी कोतवाली परिसरात मध्यरात्री लागलेल्या भीषण आगीने ६ ते ७ कापड दुकाने अक्षरशः भस्मसात झाली. या आगीत दुकानदारांचे लाखो रुपयांचे नुकसान झाल्याची प्राथमिक माहिती समोर आली असून सुदैवाने कोणतीही जीवितहानी टळली आहे.
१४ मार्च २०२६ रोजी मध्यरात्री सुमारे २ वाजण्याच्या सुमारास ही आग लागल्याची माहिती मिळते. महापालिकेच्या जागेवर असलेल्या कपड्यांच्या दुकानांमध्ये अचानक आग भडकली आणि काही क्षणातच आगीने भीषण रूप धारण करत ज्वाळांचे लोळ आकाशात उसळू लागले. दूरवरून दिसणाऱ्या धुराच्या ढगांमुळे आणि आगीच्या ज्वाळांमुळे परिसरात एकच खळबळ उडाली.
विशेष म्हणजे वादग्रस्त ‘बिंदी घर’ परिसरातील कापड दुकानेही या आगीच्या तडाख्यात पूर्णपणे जळून खाक झाली. दुकानांमध्ये मोठ्या प्रमाणावर कपड्यांचा साठा असल्यामुळे आग झपाट्याने पसरली आणि काही वेळातच संपूर्ण रांग जळून गेली.
घटनेची माहिती मिळताच अग्निशमन दलाच्या पथकांनी तातडीने घटनास्थळी धाव घेतली. जवानांनी आगीवर नियंत्रण मिळवण्यासाठी शर्थीचे प्रयत्न केले. दीर्घकाळाच्या प्रयत्नांनंतर आग आटोक्यात आणण्यात यश आले, अन्यथा ही आग आसपासच्या इमारती आणि दुकानांपर्यंत पोहोचण्याची भीती व्यक्त केली जात होती.
दरम्यान, आगीचे नेमके कारण अद्याप अस्पष्ट असून शॉर्टसर्किट किंवा अन्य कारणांचा तपास सुरू असल्याची माहिती आहे. या घटनेमुळे सिटी कोतवाली परिसरात काही काळ भीती आणि चिंतेचे वातावरण निर्माण झाले होते. पोलिस आणि संबंधित यंत्रणा या प्रकरणाचा पुढील तपास करीत आहेत.
