Distribution of ration kits: सोमवार, दि. १६ फेब्रुवारी २०२६ रोजी सकाळी १० वाजता मदरसा जामेउल उलूम, बाळापूर यांच्या वतीने एक पवित्र व प्रेरणादायी सामाजिक कार्यक्रम आयोजित करण्यात आला. या कार्यक्रमाचे संरक्षण मौलाना मुफ्ती मोहम्मद असलम कासमी बस्तवी यांनी केले.
जाकीर अहमद
बाळापूर : सोमवार, दि. १६ फेब्रुवारी २०२६ रोजी सकाळी १० वाजता मदरसा जामेउल उलूम, बाळापूर यांच्या वतीने एक पवित्र व प्रेरणादायी सामाजिक कार्यक्रम आयोजित करण्यात आला. या कार्यक्रमाचे संरक्षण मौलाना मुफ्ती मोहम्मद असलम कासमी बस्तवी यांनी केले.
या प्रसंगी ‘मिशन ३१३’ अंतर्गत समाजातील गरजू घटकांपर्यंत मदत पोहोचविण्याच्या उद्देशाने ३१३ गरजू कुटुंबांना राशन किट्सचे वितरण करण्यात आले. या पवित्र समारंभाचे अध्यक्षस्थान हाफिज अज़मतुल्लाह खान (खामगाव) यांनी भूषविले. त्यांच्या हृदयस्पर्शी दुआने कार्यक्रमाची सुरुवात होताच वातावरण भक्ती, आत्मिक शांतता व सेवाभावाने भारावून गेले.
विशेष म्हणजे, मदरशाच्या वतीने बाळापूर व परिसरातील सुमारे १२५ उलेमा-ए-कराम यांनाही राशन किट्स देऊन त्यांचा सन्मान व सहाय्य करण्यात आले. हा उपक्रम विद्वान वर्गाच्या सन्मानाचा आणि त्यांना दिलेल्या आधाराचा अनुकरणीय आदर्श ठरला. उपस्थित मान्यवरांनी या सेवाभावी कार्याचे मनःपूर्वक कौतुक करत मदरशाच्या धार्मिक व सामाजिक योगदानाला दाद दिली.
कार्यक्रमाला बाळापूर शहर व परिसरातील अनेक मान्यवर उपस्थित होते. त्यामध्ये मौलाना खुर्शीद अहमद कासमी, मुफ्ती मोहम्मद अहमद कासमी, मौलाना मोहम्मद उमर, मौलाना सिद्दीक, मौलाना तहसीन, हाफिज यासीन, नासिर खान, मौलाना शेख मुईन असलमी (बाडेगाव), मौलाना सद्दाम पठाण (जयपूर), सैयद कबीर, मौलाना सैयद अमीन इशाअती, मौलाना रिजवान असलमी, मौलाना मुईन खान असलमी (चतोडा) व शेख मुकर्रम यांचा समावेश होता.
मदरसा जामेउल उलूम, बाळापूर यांच्या वतीने राबविण्यात आलेला हा सेवाभावी उपक्रम त्यांच्या धार्मिक, सामाजिक आणि मानवतावादी कार्याचा उज्ज्वल आदर्श ठरला असून या माध्यमातून गरजू कुटुंबांना मदतीचा हात मिळण्यासोबतच उलेमा वर्गाचा सन्मानही आदरपूर्वक करण्यात आला.
