Malkapur depot driver’s : मलकापूर ते वझर सरकटे या बसवरील चालकाने जेष्ठ नागरिक प्रवाशासोबत गैरवर्तन केल्याप्रकरणी संबंधित चालकावर कारवाई करण्यात यावी, अशी मागणी काशिनाथ जाधव यांनी आगार व्यवस्थापकांकडे केली आहे.
अशोक इंगळे
साखरखेर्डा : मलकापूर ते वझर सरकटे या बसवरील चालकाने जेष्ठ नागरिक प्रवाशासोबत गैरवर्तन केल्याप्रकरणी संबंधित चालकावर कारवाई करण्यात यावी, अशी मागणी काशिनाथ जाधव यांनी आगार व्यवस्थापकांकडे केली आहे.
२७ नोव्हेंबर रोजी काशिनाथ पुंडलिक जाधव हे साखरखेर्डा येथून एमएच १४ बीटी ४३५६ या वझर सरकटे–मलकापूर बसने चिखली येथे जाण्यासाठी बसस्थानकावर प्रतीक्षा करत होते. सुमारे दुपारी २.३० वाजता बस आल्यावर ते चढत असताना चालकाने एकेरी भाषेत बोलत त्यांच्याशी गैरवर्तन केले. “खाली उतरा, मागील बसने जा” असे म्हणून चालकाने अपमानास्पद वागणूक दिल्याचा आरोप त्यांनी केला.
जाधव यांनी सांगितले की, बसमध्ये चढल्यानंतरही चालकाने इतर प्रवाशांशीही अरेरावीची भाषा वापरली. साखरखेर्डा ते चिखलीदरम्यान रस्त्यांची दयनीय अवस्था असून चालकाने काळजीपूर्वक वाहन चालवणे अपेक्षित असताना त्याने निष्काळजीपणे बस चालवून प्रवाशांना त्रास होईल असे वर्तन केले. खड्डे व गतिरोधकांवरून बस वारंवार उडत असल्याने प्रवाशांना मोठ्या प्रमाणात अस्वस्थता जाणवत होती, असेही त्यांनी नमूद केले.
या सर्व प्रकारामुळे संबंधित निष्क्रिय व बेजबाबदार चालकावर तात्काळ कारवाई करण्यात यावी, अशी मागणी जाधव यांनी आगार प्रमुखांकडे केली आहे. आगार प्रमुखांनी दखल न घेतल्यास परिवहनमंत्र्यांकडे लेखी तक्रार दाखल करू, असा इशाराही त्यांनी दिला.
