Shri Balaji Maharaj :३३४ वर्षांची परंपरा जपणाऱ्या देऊळगाव राजातील श्री बालाजी महाराजांच्या आश्विन यात्रेला घटस्थापनेने प्रारंभ

Shri Balaji Maharaj : प्रतितिरुपती अर्थात विदर्भाचे तिरुपती म्हणून महाराष्ट्रात ओळखल्या जाणाऱ्या देऊळगाव राजा येथील श्री बालाजी महाराज मंदिरात रविवार, दि. ११ ऑक्टोबर रोजी घटस्थापना करून श्री बालाजी महाराजांच्या आश्विन यात्रा उत्सवाला मंगलमय प्रारंभ झाला. यानिमित्त मंदिरात विविध धार्मिक विधी पार पडले. सायंकाळी असंख्य भाविकांच्या उपस्थितीत झालेल्या महाआरतीने मंदिर परिसर भक्तिमय झाला.

 मंत्रोच्चार, अभिषेक अन् महाआरतीने भक्तिमय वातावरण; श्री बालाजी महाराजांच्या यात्रोत्सवाचा मंगलारंभ

गजानन तिडके

देऊळगाव राजा : प्रतितिरुपती अर्थात विदर्भाचे तिरुपती म्हणून महाराष्ट्रात ओळखल्या जाणाऱ्या देऊळगाव राजा येथील श्री बालाजी महाराज मंदिरात रविवार, दि. ११ ऑक्टोबर रोजी घटस्थापना करून श्री बालाजी महाराजांच्या आश्विन यात्रा उत्सवाला मंगलमय प्रारंभ झाला. यानिमित्त मंदिरात विविध धार्मिक विधी पार पडले. सायंकाळी असंख्य भाविकांच्या उपस्थितीत झालेल्या महाआरतीने मंदिर परिसर भक्तिमय झाला.

३३४ वर्षांची ऐतिहासिक परंपरा लाभलेल्या श्री बालाजी महाराज मंदिरात दरवर्षीप्रमाणे विधिवत पूजन करून मंदिरावर नवीन पताका फडकविण्यात आली. आश्विन शुद्ध प्रतिपदेच्या मुहूर्तावर झालेल्या या धार्मिक सोहळ्यामुळे यात्रोत्सवाच्या उत्साहाला सुरुवात झाली.

सुवर्णकार समाजाकडून श्रींच्या अलंकारांची सेवा

मंदिरातील परंपरेनुसार सकाळी मानकरी सुवर्णकार समाजाच्या वतीने श्री बालाजी महाराजांचे सोन्याचे दागिने, सिंहासने तसेच पूजेसाठी वापरण्यात येणारे चांदीचे साहित्य उजळून देण्यात आले. अनेक वर्षांपासून सुरू असलेली ही सेवा सुवर्णकार समाजाकडून श्रद्धेने पार पाडली जाते. या सेवाकार्याबद्दल श्री बालाजी संस्थानच्या वतीने सुवर्णकार समाजाचा सत्कार करण्यात आला.

२१ ब्राह्मणवृंदांकडून अनुष्ठान; श्रींचा विधिवत अभिषेक

श्री बालाजी महाराजांचा आश्विन यात्रा उत्सव निर्विघ्नपणे पार पडावा, यासाठी मंदिरात २१ ब्राह्मणवृंद अनुष्ठानासाठी बसले. ब्राह्मणवृंदांच्या मंत्रोच्चारात पुजाऱ्यांनी श्री बालाजी महाराज, लक्ष्मीमाता आणि पद्मावतीमाता यांच्या मूर्तींना विधिवत अभिषेक केला. त्यानंतर मंदिराच्या गाभाऱ्यात घटस्थापना करण्यात आली.

दिवसभर मंदिरात धार्मिक विधी पार पडले. सायंकाळी असंख्य भाविकांच्या उपस्थितीत श्री बालाजी महाराजांची महाआरती करण्यात आली. भक्तांच्या श्रद्धा आणि उत्साहामुळे मंदिर परिसरात मंगलमय वातावरण निर्माण झाले.

घटस्थापनेच्या या सोहळ्याला श्री बालाजी महाराज संस्थानचे वंशपरंपरागत विश्वस्त राजे विजयसिंह जाधव, व्यवस्थापक किशोर बीडकर, संस्थानचे कर्मचारी, मानकरी, ब्राह्मणवृंद आणि श्री बालाजी महाराजांचे भाविक उपस्थित होते.

दसऱ्याच्या मध्यरात्री निघणार श्रींची पालखी

श्री बालाजी महाराज संस्थानच्या प्रसिद्धीपत्रकानुसार, आश्विन यात्रा उत्सवांतर्गत सोमवार, दि. १९ ऑक्टोबर रोजी मंडपोत्सव होणार आहे. मंगळवार, दि. २० ऑक्टोबर रोजी दसऱ्याच्या मध्यरात्री १२ वाजता श्री बालाजी महाराजांची पालखी मिरवणूक काढण्यात येणार आहे.

बुधवार, दि. २१ ऑक्टोबर रोजी श्रींची पालखी संपूर्ण शहराला प्रदक्षिणा घालून पुन्हा मंदिरात पोहोचेल. त्यानंतर गुरुवार, दि. २९ ऑक्टोबर रोजी पहाटे ५ वाजून ४५ मिनिटांनी लळित उत्सव संपन्न होणार आहे.

३३४ वर्षांची ऐतिहासिक परंपरा जपणाऱ्या श्री बालाजी महाराजांच्या आश्विन यात्रोत्सवात आगामी धार्मिक कार्यक्रमांसाठी भाविकांमध्ये उत्सुकता असून, या उत्सवाच्या माध्यमातून देऊळगाव राजातील धार्मिक आणि सांस्कृतिक परंपरेचे दर्शन घडणार आहे.