power cable :मलकापूर-नांदुऱ्यात वीजतार चोरट्यांचा धुमाकूळ; महावितरणला १ कोटी ८ लाखांचा फटका!

power cable : मलकापूर आणि नांदुरा परिसरात वीज वाहिन्यांची तार चोरणाऱ्या टोळीने धुमाकूळ घातला असून, गेल्या काही दिवसांत तब्बल ३०० किलोमीटर लांबीची वीजतार चोरीला गेल्याची धक्कादायक बाब समोर आली आहे. या चोरीमुळे महावितरणचे सुमारे १ कोटी ८ लाख रुपयांचे आर्थिक नुकसान झाले असून, परिसरातील शेतकरी आणि सर्वसामान्य ग्राहकांचा वीजपुरवठाही विस्कळीत झाला आहे.

३०० किलोमीटर वीजतार चोरीला; शेतकरी आणि ग्राहकांचा वीजपुरवठा विस्कळीत, महावितरणचे सोशल पोलिसिंगचे आवाहन

बुलढाणा  : मलकापूर आणि नांदुरा परिसरात वीज वाहिन्यांची तार चोरणाऱ्या टोळीने धुमाकूळ घातला असून, गेल्या काही दिवसांत तब्बल ३०० किलोमीटर लांबीची वीजतार चोरीला गेल्याची धक्कादायक बाब समोर आली आहे. या चोरीमुळे महावितरणचे सुमारे १ कोटी ८ लाख रुपयांचे आर्थिक नुकसान झाले असून, परिसरातील शेतकरी आणि सर्वसामान्य ग्राहकांचा वीजपुरवठाही विस्कळीत झाला आहे.

वीजतार चोरीच्या या घटनांना आळा घालण्यासाठी प्रशासकीय कारवाईसोबतच नागरिकांच्या सामाजिक दक्षतेची अर्थात ‘सोशल पोलिसिंग’ची गरज असल्याचे आवाहन महावितरणचे कार्यकारी अभियंता रत्नदीप तायडे यांनी केले आहे.

मलकापूर आणि नांदुरा परिसर चोरट्यांच्या निशाण्यावर

दुष्काळसदृश परिस्थितीतही ग्राहकांना सुरळीत वीजपुरवठा देण्यासाठी महावितरण प्रयत्नशील आहे. मात्र, वीज वाहिन्यांवरील तार चोरीच्या वाढत्या घटनांमुळे वीज यंत्रणेपुढे मोठे आव्हान उभे राहिले आहे.

मलकापूर परिसरात सुमारे १५० किलोमीटर, तर नांदुरा परिसरातही सुमारे १५० किलोमीटर लांबीची वीजतार चोरट्यांनी लंपास केल्याची माहिती समोर आली आहे. या घटनांमुळे महावितरणचे मोठे आर्थिक नुकसान झाले असून, वीजपुरवठा पूर्ववत करण्यासाठी दुरुस्ती आणि पुनर्बांधणीची कामे प्राधान्याने हाती घेण्यात आली आहेत.

८९ वेळा पोलिसांत गुन्ह्यांची नोंद

वीजतार चोरीच्या घटनांप्रकरणी महावितरणने आतापर्यंत विविध पोलीस ठाण्यांमध्ये ८९ वेळा गुन्ह्यांची नोंद केली आहे. पोलीस प्रशासनाकडूनही संबंधित चोरट्यांचा शोध घेण्यासाठी विशेष मोहीम राबविण्यात येत असून, काही ठिकाणी यश मिळाल्याचे सांगण्यात आले आहे.

महावितरणची वीज यंत्रणा ग्रामीण भागात आणि मोठ्या भौगोलिक क्षेत्रात पसरलेली आहे. त्यामुळे प्रत्येक ठिकाणी सतत देखरेख ठेवणे आव्हानात्मक ठरत आहे. केवळ महावितरण आणि पोलीस प्रशासनाच्या प्रयत्नांवर अवलंबून न राहता नागरिकांनीही सतर्क राहून सहकार्य करणे आवश्यक असल्याचे अधिकाऱ्यांनी स्पष्ट केले.

संशयास्पद हालचाली दिसल्यास त्वरित माहिती द्या

या गंभीर परिस्थितीची दखल घेत महावितरणचे मुख्य अभियंता दत्तात्रय बनसोडे आणि कार्यकारी अभियंता रत्नदीप तायडे यांनी नागरिकांना सहकार्याचे आवाहन केले आहे.

आपल्या परिसरात वीज वाहिन्या, विद्युत खांब किंवा अन्य वीज यंत्रणेशी संबंधित संशयास्पद हालचाली अथवा चोरीचा प्रकार आढळल्यास नागरिकांनी तातडीने महावितरण किंवा पोलीस प्रशासनाला माहिती द्यावी. नागरिकांच्या सतर्कतेमुळे चोरट्यांच्या हालचालींवर लक्ष ठेवणे आणि चोरीच्या घटनांना आळा घालणे शक्य होईल.

वीजतार चोरीमुळे केवळ महावितरणचे आर्थिक नुकसान होत नाही, तर शेतकऱ्यांच्या शेतीपंपांचा आणि सर्वसामान्य ग्राहकांचा वीजपुरवठाही प्रभावित होतो. त्यामुळे वीज यंत्रणेचे संरक्षण ही सामूहिक जबाबदारी आहे. नागरिकांनी सामाजिक दक्षता दाखवून प्रशासनाला सहकार्य केल्यास वीजतार चोरीच्या घटनांवर नियंत्रण मिळविण्यास मदत होईल आणि अखंडित वीजपुरवठा राखण्याच्या प्रयत्नांना बळ मिळेल.