suicide:  सिंदखेडराजा तालुक्यात युवा शेतकरी पुत्राची आत्महत्या; पीक नुकसानीसह कर्जाचा वाढता बोजा

suicide: सिंदखेडराजा तालुक्यातील रताळी येथील २६ वर्षीय युवा शेतकरी पुत्राने आर्थिक विवंचनेतून आत्महत्या केल्याची घटना शनिवार, २६ सप्टेंबर रोजी सकाळी उघडकीस आली. आकाश बळीराम पाटील (वय २६) असे मृत युवकाचे नाव आहे. पीक नुकसान, शेतीतील वाढता खर्च आणि वडिलांवरील कर्जाचा वाढता बोजा यामुळे तो आर्थिक अडचणीत होता, अशी माहिती कुटुंबीयांकडून देण्यात आली.

 रताळी येथील २६ वर्षीय शेतकरी पुत्राने जीवन संपविले; कर्जमाफीच्या यादीत वडिलांचे नाव नसल्याची माहिती

साखरखेर्डा  : सिंदखेडराजा तालुक्यातील रताळी येथील २६ वर्षीय युवा शेतकरी पुत्राने आर्थिक विवंचनेतून आत्महत्या केल्याची घटना शनिवार, २६ सप्टेंबर रोजी सकाळी उघडकीस आली. आकाश बळीराम पाटील (वय २६) असे मृत युवकाचे नाव आहे. पीक नुकसान, शेतीतील वाढता खर्च आणि वडिलांवरील कर्जाचा वाढता बोजा यामुळे तो आर्थिक अडचणीत होता, अशी माहिती कुटुंबीयांकडून देण्यात आली.

रताळी येथील शेतकरी बळीराम पाटील यांच्याकडे चार एकर शेती असून त्यांच्या कुटुंबात पत्नी, दोन मुले आणि एक मुलगी असा परिवार आहे. चार एकर शेतीच्या उत्पन्नावर कुटुंबाचा उदरनिर्वाह होत असला तरी शेतीतून मिळणारे उत्पन्न आणि वाढता खर्च यामुळे कुटुंबाची आर्थिक परिस्थिती बिकट झाली होती. शेतीच्या उत्पन्नावर कुटुंबाचा खर्च भागत नसल्याने बळीराम पाटील आणि त्यांची दोन्ही मुले शेतीची कामे करीत होते. त्यांच्या पत्नी लक्ष्मीबाई यादेखील मोलमजुरी करून कुटुंबाच्या उदरनिर्वाहास हातभार लावत होत्या.

कर्जाचा वाढता बोजा

सन २०१९-२० मध्ये बळीराम पाटील यांनी भारतीय स्टेट बँकेकडून कृषी कर्ज घेतले होते. मात्र चार एकर शेतीतून मिळणाऱ्या उत्पन्नातून या कर्जाची परतफेड करणे शक्य झाले नाही. त्यातच शेती उत्पादनात सातत्याने घट होत गेल्याने कर्जाचा बोजा वाढत गेला.

शासनाकडून कर्जमाफीच्या याद्या जाहीर करण्यात आल्या. मात्र कुटुंबीयांच्या म्हणण्यानुसार, बळीराम पाटील यांचे नाव कर्जमाफीच्या पहिल्या तसेच दुसऱ्या यादीत आले नाही. त्यामुळे कर्जाची परतफेड करण्याचा प्रश्न कायम राहिला.

१० एकर शेतीतील पिकांचे नुकसान

यावर्षी आकाश पाटील याने विठ्ठल गायकवाड यांची १० एकर शेती करण्यासाठी घेतली होती. या क्षेत्राची मशागत करून त्यात सोयाबीन आणि तुरीची पेरणी करण्यात आली. जुलै महिन्यात समाधानकारक पाऊस झाल्याने पिकांची सुरुवातीची स्थिती चांगली होती. मात्र ऑगस्ट आणि सप्टेंबर महिन्यात पावसाने मोठा खंड दिल्याने पिकांना फटका बसला.

कुटुंबीयांच्या माहितीनुसार, सोयाबीनचे एकरी ८ ते १० क्विंटल उत्पादन अपेक्षित असताना पावसाअभावी उत्पादन मोठ्या प्रमाणात घटले. १० एकर शेतीवर सुमारे अडीच लाख रुपये खर्च करूनही अपेक्षित उत्पादन मिळण्याची परिस्थिती राहिली नाही. त्यामुळे शेतीचा खर्चही निघणे कठीण झाले.

शेतात घटना उघडकीस

या आर्थिक विवंचनेच्या पार्श्वभूमीवर आकाश शनिवारी सकाळी घरातून बाहेर पडला. सकाळी सुमारे सात वाजता राजू सरकटे हे त्यांच्या शेतात म्हशीचे दूध काढण्यासाठी जात असताना त्यांना आकाश शेतातील झाडाजवळ मृतावस्थेत आढळून आला. त्यांनी तत्काळ ही माहिती गावात दिली. त्यानंतर ग्रामस्थांनी घटनास्थळी धाव घेतली.

या घटनेची माहिती मिळताच आकाशचा चुलत भाऊ सागर परशुराम पाटील यांनी साखरखेर्डा पोलीस ठाण्यात तक्रार दाखल केली. पोलिस हेड कॉन्स्टेबल निवृत्ती पोफळे यांनी घटनास्थळी पंचनामा करून मृतदेह उत्तरीय तपासणीसाठी ग्रामीण रुग्णालय, मेहकर येथे पाठविला.

या प्रकरणाचा पुढील तपास ठाणेदार युवराज रबडे यांच्या मार्गदर्शनाखाली पोलिस हेड कॉन्स्टेबल निवृत्ती पोफळे करीत आहेत.

आकाशच्या मृत्यूमुळे पाटील कुटुंबावर दुःखाचा डोंगर कोसळला असून, पीक नुकसान, कर्जबाजारीपणा आणि ग्रामीण भागातील वाढती आर्थिक विवंचना यांचा प्रश्न पुन्हा ऐरणीवर आला आहे.