Leopard :खल्याळगव्हाण-चिंचखेड परिसरात बिबट्याचे दर्शन; वनविभागाकडून ग्रामस्थांना सतर्कतेचा इशारा

Leopard : तालुक्यातील खडकपूर्णा नदीपट्ट्यातील जंगल परिसर तसेच खल्याळगव्हाण, चिंचखेड व आसपासच्या भागात बिबट्या दिसल्याची माहिती स्थानिक ग्रामस्थांनी वनविभागाला दिली आहे. या माहितीची दखल घेत वनविभागाच्या अधिकारी व कर्मचाऱ्यांनी संबंधित परिसराला भेट देऊन पाहणी केली. तसेच ग्रामस्थांना सतर्क राहण्याचे आणि बिबट्या दिसल्यास तातडीने वनविभागाशी संपर्क साधण्याचे आवाहन केले आहे.

खडकपूर्णा नदीपट्ट्यात बिबट्याची दहशत; शेतकऱ्यांनी समूहाने शेतात जाण्याचे वनविभागाचे आवाहन

गजानन तिडके 
देऊळगाव राजा : तालुक्यातील खडकपूर्णा नदीपट्ट्यातील जंगल परिसर तसेच खल्याळगव्हाण, चिंचखेड व आसपासच्या भागात बिबट्या दिसल्याची माहिती स्थानिक ग्रामस्थांनी वनविभागाला दिली आहे. या माहितीची दखल घेत वनविभागाच्या अधिकारी व कर्मचाऱ्यांनी संबंधित परिसराला भेट देऊन पाहणी केली. तसेच ग्रामस्थांना सतर्क राहण्याचे आणि बिबट्या दिसल्यास तातडीने वनविभागाशी संपर्क साधण्याचे आवाहन केले आहे.चिचखेड शिवारात बिबट्याने एका गुराची शिकार केल्याची घटना मंगळवारी उघडकीस आली आहे.

बिबट्याच्या दर्शनाच्या पार्श्वभूमीवर परिसरातील नागरिकांमध्ये भीतीचे वातावरण निर्माण होऊ नये, यासाठी वनविभागाने ग्रामस्थांना घाबरून न जाण्याचे आवाहन केले आहे. वनविभागाच्या वतीने परिसरात नियमित गस्त घालण्यात येत असून, बिबट्याच्या हालचालींवर लक्ष ठेवले जात आहे.
जनावरे बंदिस्त गोठ्यात ठेवण्याचे आवाहन
वनविभागाने नागरिकांना विशेष खबरदारी घेण्याच्या सूचना दिल्या आहेत. ग्रामस्थांनी आपली जनावरे उघड्यावर न ठेवता सुरक्षित व बंदिस्त गोठ्यात बांधावीत. तसेच शेतात किंवा जंगलालगतच्या परिसरात जाताना शक्यतो एकट्याने न जाता समूहाने जावे, असे आवाहन करण्यात आले आहे.
विशेषतः सकाळ-संध्याकाळच्या वेळी नागरिकांनी अधिक सतर्क राहावे. लहान मुलांना संध्याकाळनंतर घराबाहेर एकटे सोडू नये, अशी सूचनाही करण्यात आली आहे. नागरिकांनी शक्यतो रात्री उघड्यावर जाणे टाळावे.

बिबट्या दिसल्यास तातडीने वनविभागाशी संपर्क

बिबट्या अचानक दिसल्यास नागरिकांनी घाबरून धावू नये किंवा त्याच्या जवळ जाण्याचा प्रयत्न करू नये. तसेच त्याला चिथावणी देऊ नये. बिबट्याचा माग काढणे किंवा त्याचे छायाचित्र घेण्यासाठी जवळ जाणे टाळावे, असे आवाहन वनविभागाकडून करण्यात आले आहे.
बिबट्या दिसल्यास त्याची माहिती तातडीने वनविभागाच्या देऊळगाव राजा कार्यालयाला द्यावी. नागरिकांनी अफवांवर विश्वास न ठेवता वनविभागाच्या सूचनांचे पालन करावे, असे आवाहन करण्यात आले आहे.

रात्री परिसरात प्रकाश व्यवस्था ठेवण्याची सूचना

बिबट्याचा वावर असल्याचे सांगितल्या जाणाऱ्या भागातील नागरिकांनी रात्रीच्या वेळी घराबाहेरील परिसरात पुरेशी प्रकाश व्यवस्था ठेवावी. शेतात जाताना समूहाने जाण्यासोबतच सुरक्षिततेच्या दृष्टीने सतर्क राहावे, अशी सूचना करण्यात आली आहे.वनविभागाच्या कर्मचाऱ्यांकडून परिसरात गस्त सुरू असून, नागरिकांनी सहकार्य करावे, असे आवाहन  उमेश गायकवाड,वनपरिक्षेत्र अधिकारी उपविभाग देऊळगाव राजा यांच्यासह वनविभागाच्या कर्मचाऱ्यांनी केले आहे. बिबट्याच्या हालचालींबाबत कोणतीही माहिती मिळाल्यास ती तातडीने वनविभागाला कळवावी, जेणेकरून आवश्यक उपाययोजना करता येतील.बिबट्याच्या दर्शनामुळे नागरिकांनी घाबरून न जाता सतर्कता, समूहाने हालचाल आणि वनविभागाशी तातडीने संपर्क या तीन बाबींवर भर देण्याची गरज आहे.