Two lakhs stolen :दिवसा ढवळ्या मोटारसायकलच्या डिक्कीतून दोन लाख लंपास; बार्शीटाकळी-पिंपळखुटा मार्गावर खळबळ

Two lakhs stolen : बार्शीटाकळी-पिंपळखुटा मार्गावर गुरुवारी, दि. १ ऑक्टोबर रोजी दुपारी दोन अज्ञात चोरट्यांनी मोटारसायकलच्या डिक्कीतून दोन लाख रुपयांची रोकड लंपास केल्याची खळबळजनक घटना घडली. बँकेतून पैसे काढून गावाकडे निघालेल्या व्यावसायिकाचा पाठलाग करून चोरट्यांनी हा डाव साधल्याचे सांगण्यात येत आहे. या घटनेदरम्यान चोरटे आणि संबंधित व्यक्तीमध्ये झटापट झाल्याने ते किरकोळ जखमी झाल्याची माहिती आहे.

  बँकेतून पैसे काढले अन् चोरट्यांनी साधला डाव; दोन लाखांसाठी झटापट, व्यावसायिक किरकोळ जखमी

विझोरा : बार्शीटाकळी-पिंपळखुटा मार्गावर गुरुवारी, दि. १ ऑक्टोबर रोजी दुपारी दोन अज्ञात चोरट्यांनी मोटारसायकलच्या डिक्कीतून दोन लाख रुपयांची रोकड लंपास केल्याची खळबळजनक घटना घडली. बँकेतून पैसे काढून गावाकडे निघालेल्या व्यावसायिकाचा पाठलाग करून चोरट्यांनी हा डाव साधल्याचे सांगण्यात येत आहे. या घटनेदरम्यान चोरटे आणि संबंधित व्यक्तीमध्ये झटापट झाल्याने ते किरकोळ जखमी झाल्याची माहिती आहे.

प्राप्त माहितीनुसार, कातखेड येथील फत्तुसिंग भिमराव पवार यांचा वेल्डिंगचा व्यवसाय आहे. दि. १ ऑक्टोबर रोजी ते बार्शीटाकळी येथील भारतीय स्टेट बँकेच्या शाखेत गेले होते. तेथून त्यांनी दोन लाख रुपये काढले. ही रोकड मोटारसायकलच्या डिक्कीत ठेवून ते गावाकडे जाण्यासाठी बार्शीटाकळी-पिंपळखुटा मार्गाने निघाले.

दरम्यान, मार्गात दोन अज्ञात व्यक्तींनी मोटारसायकलवरून त्यांचा पाठलाग केला. योग्य संधी साधून चोरट्यांनी पवार यांच्या मोटारसायकलच्या डिक्कीतून दोन लाख रुपयांची रोकड लंपास केली. चोरीचा प्रकार लक्षात येताच पवार यांनी चोरट्यांचा प्रतिकार करण्याचा प्रयत्न केला. यावेळी त्यांच्यात झटापट झाली. या झटापटीत फत्तुसिंग पवार किरकोळ जखमी झाल्याची माहिती आहे.

घटनेची माहिती मिळताच बार्शीटाकळी पोलिसांनी तातडीने घटनास्थळी धाव घेतली. पोलिसांनी घटनास्थळाची पाहणी करून परिसरातील सीसीटीव्ही फुटेज तपासण्यास सुरुवात केली आहे. चोरट्यांचा माग काढण्यासाठी पोलिसांकडून विविध दिशेने तपास सुरू आहे.

दिवसा ढवळ्या बँकेतून पैसे काढून निघालेल्या व्यावसायिकाच्या मोटारसायकलच्या डिक्कीतून दोन लाख रुपये लंपास झाल्याने परिसरात एकच खळबळ उडाली आहे. या घटनेमुळे बँकेतून मोठी रोकड घेऊन जाणाऱ्या नागरिकांच्या सुरक्षेचा प्रश्नही ऐरणीवर आला आहे.