Second arrest :  घाटबोरी-भोसा सागवान वृक्षतोडप्रकरणी दुसरी अटक; आरोपीला पाच दिवसांची वनकोठडी

Second arrest : मेहकर तालुक्यातील मौजे भोसा येथील घाटबोरी वनपरिक्षेत्रांतर्गत कक्ष क्रमांक १८१ मध्ये झालेल्या अवैध सागवान वृक्षतोड प्रकरणात वनविभागाने कारवाईचा वेग वाढविला आहे. या प्रकरणी भारत महादेव तिवाले (रा. द्रुजबोरी, ता. मेहकर) याला मेहकर येथून ताब्यात घेऊन अटक करण्यात आली आहे. प्रथम वर्ग न्यायदंडाधिकारी, मेहकर यांनी आरोपीला पाच दिवसांची वनकोठडी सुनावली आहे. या प्रकरणातील ही दुसरी अटक असून, वृक्षतोडीसाठी वापरण्यात आलेली यंत्रसामग्री आणि वाहनेही जप्त करण्यात आली आहेत.

   अवैध सागवान वृक्षतोडीचे धागेदोरे उलगडणार? जेसीबी, टेम्पोसह ट्रॅक्टर आणि कटर मशीन जप्त

डोणगाव : मेहकर तालुक्यातील मौजे भोसा येथील घाटबोरी वनपरिक्षेत्रांतर्गत कक्ष क्रमांक १८१ मध्ये झालेल्या अवैध सागवान वृक्षतोड प्रकरणात वनविभागाने कारवाईचा वेग वाढविला आहे. या प्रकरणी भारत महादेव तिवाले (रा. द्रुजबोरी, ता. मेहकर) याला मेहकर येथून ताब्यात घेऊन अटक करण्यात आली आहे. प्रथम वर्ग न्यायदंडाधिकारी, मेहकर यांनी आरोपीला पाच दिवसांची वनकोठडी सुनावली आहे. या प्रकरणातील ही दुसरी अटक असून, वृक्षतोडीसाठी वापरण्यात आलेली यंत्रसामग्री आणि वाहनेही जप्त करण्यात आली आहेत.

वृक्षतोड प्रकरणाचा तपास वेगात

घाटबोरी वनपरिक्षेत्रातील भोसा येथील कक्ष क्रमांक १८१ मधील अवैध सागवान वृक्षतोड प्रकरणाचा वनविभागाकडून तपास सुरू आहे. यापूर्वी या प्रकरणात राहुल मेहेत्रे याला अटक करण्यात आली होती. आता भारत तिवाले याच्या अटकेमुळे या प्रकरणातील तपासाला पुढील दिशा मिळण्याची शक्यता आहे.

तपासादरम्यान वृक्षतोड आणि लाकडाच्या वाहतुकीसाठी वापरण्यात आल्याचा संशय असलेली जेसीबी, ४०७ टेम्पो, ट्रॅक्टर आणि कटर मशीन जप्त करण्यात आली आहेत. या प्रकरणात आणखी कोणाचा सहभाग आहे का, याचा वनविभागाकडून शोध घेतला जात आहे. गुन्ह्यात सहभागी असल्याचे निष्पन्न होणाऱ्या इतर व्यक्तींवरही कायद्यानुसार कारवाई करण्यात येणार असल्याचे वनविभागाने स्पष्ट केले आहे.

वरिष्ठ वनाधिकाऱ्यांच्या मार्गदर्शनाखाली कारवाई

ही कारवाई अमरावतीच्या मुख्य वनसंरक्षक ज्योती बॅनर्जी, बुलढाण्याचे उपवनसंरक्षक जमीरी शेख आणि अमरावतीचे दक्षता विभागीय वन अधिकारी कमलेश पाटील यांच्या मार्गदर्शनाखाली करण्यात आली. मेहकरचे सहाय्यक वनसंरक्षक वैभव काकडे यांनी या कारवाईत महत्त्वाची भूमिका बजावली.

या प्रकरणाचा पुढील तपास चौकशी अधिकारी तथा सहाय्यक वनसंरक्षक व्ही. एम. काकडे, फिरते पथकाचे वनपरिक्षेत्र अधिकारी के. डी. पडोळ आणि मेहकरचे वनपरिक्षेत्र अधिकारी आर. आर. सातपुते करीत आहेत.

वनसंपत्तीच्या संरक्षणासाठी कठोर कारवाईची अपेक्षा

सागवानासारख्या मौल्यवान वृक्षांची अवैध तोड ही वनसंपत्तीच्या संरक्षणाच्या दृष्टीने गंभीर बाब आहे. या प्रकरणातील सर्व संबंधितांचा शोध घेऊन दोषींवर कठोर कायदेशीर कारवाई करावी, अशी अपेक्षा व्यक्त होत आहे. वनविभागाच्या पुढील तपासातून या वृक्षतोड प्रकरणातील आणखी कोणते धागेदोरे समोर येतात, याकडे परिसरातील नागरिकांचे लक्ष लागले आहे.