Road safety awareness : श्री गजानन महाराजांच्या पवित्र पालखीचे बुधवारी (२४ जून) अकोला शहरात उत्साहपूर्ण वातावरणात आगमन झाले. यानिमित्त पालखीतील हजारो वारकरी आणि भाविकांच्या सुरक्षिततेला प्राधान्य देत प्रादेशिक परिवहन अधिकारी कार्यालयाच्या वतीने विशेष रस्ता सुरक्षा जनजागृती अभियान राबविण्यात आले. ‘भक्तीचा प्रवास आनंददायी आणि अपघातमुक्त व्हावा’ या उद्देशाने भाविकांना वाहतूक नियमांचे सविस्तर मार्गदर्शन करण्यात आले.
पालखी सोहळ्यात वाहतूक नियमांचे धडे; आरटीओ विभागाचा अनोखा उपक्रम
आगाखान पठाण
अकोला : श्री गजानन महाराजांच्या पवित्र पालखीचे बुधवारी (२४ जून) अकोला शहरात उत्साहपूर्ण वातावरणात आगमन झाले. यानिमित्त पालखीतील हजारो वारकरी आणि भाविकांच्या सुरक्षिततेला प्राधान्य देत प्रादेशिक परिवहन अधिकारी कार्यालयाच्या वतीने विशेष रस्ता सुरक्षा जनजागृती अभियान राबविण्यात आले. ‘भक्तीचा प्रवास आनंददायी आणि अपघातमुक्त व्हावा’ या उद्देशाने भाविकांना वाहतूक नियमांचे सविस्तर मार्गदर्शन करण्यात आले.
प्रादेशिक परिवहन अधिकारी रवींद्र भुयार आणि सहाय्यक प्रादेशिक परिवहन अधिकारी समीर शेख यांच्या मार्गदर्शनाखाली हा उपक्रम पार पडला. यावेळी मोटार वाहन निरीक्षक त्रिवेणी घोलप यांनी उपस्थित भाविकांना रस्त्यावर शिस्तबद्ध पद्धतीने चालण्याचे, वाहतूक पोलिसांच्या सूचनांचे पालन करण्याचे तसेच रस्ता ओलांडताना विशेष दक्षता घेण्याचे आवाहन केले.
तसेच रात्रीच्या वेळी परावर्तित (रिफ्लेक्टर) पट्ट्यांचा वापर, आपत्कालीन परिस्थितीत मदत कशी मिळवावी आणि सुरक्षित प्रवासासाठी आवश्यक खबरदारी याबाबतही माहिती देण्यात आली. पालखीसोबत असलेल्या वाहनचालकांना वेगमर्यादेचे पालन, सुरक्षित अंतर राखणे आणि वाहतुकीच्या नियमांचे काटेकोर पालन करण्याचे निर्देश देण्यात आले.
यावेळी अधिकाऱ्यांनी सांगितले की, “श्रद्धा आपल्याला देवाजवळ घेऊन जाते, तर सुरक्षितता आपल्याला आपल्या कुटुंबापर्यंत सुखरूप पोहोचवते.” त्यामुळे प्रत्येक भाविकाने रस्ता सुरक्षा नियमांचे पालन करून स्वतःसह इतरांच्या जीविताचे संरक्षण करावे, असे आवाहन करण्यात आले.
या उपक्रमाला वारकरी आणि भाविकांनी उत्स्फूर्त प्रतिसाद दिला. अनेकांनी रस्ता सुरक्षा हा केवळ नियमांचा विषय नसून जीवनरक्षणाचा मंत्र असल्याची भावना व्यक्त केली. श्रद्धा, शिस्त आणि सुरक्षितता यांचा सुंदर संगम घडविणाऱ्या या जनजागृतीमुळे भाविकांमध्ये वाहतूक सुरक्षेविषयी सकारात्मक जागरूकता निर्माण झाली.
“गजानन महाराजांच्या नामस्मरणासोबत रस्ता सुरक्षेचे भान ठेवूया आणि सुरक्षित प्रवासाचा संकल्प करूया,” असा संदेश देत हा उपक्रम यशस्वीरीत्या पार पडला.
यावेळी मोटार वाहन निरीक्षक राजकुमार मोरमारे, सम्राट शेंडे, सहाय्यक मोटार वाहन निरीक्षक प्रियंका राऊत तसेच चालक गौतम अरकतराव आणि अनिल गुंजकर उपस्थित होते.
