Pavitra Portal :पवित्र पोर्टलवर शिक्षक भरतीच्या रूपांतरित फेरीतील ४,३९० पदांसाठी शिफारसी

Pavitra Portal : महाराष्ट्रातील स्थानिक स्वराज्य संस्था तसेच खाजगी व्यवस्थापनाच्या शाळांमधील शिक्षण सेवक व शिक्षक पदभरती प्रक्रियेला आता वेग आला असून, पवित्र पोर्टलच्या माध्यमातून सुरू असलेल्या भरती प्रक्रियेतील टप्पा-१ मधील रूपांतरित फेरीच्या ४,३९० रिक्त पदांसाठी उमेदवारांच्या ऑनलाइन शिफारसी जाहीर करण्यात आल्या आहेत. समांतर आरक्षणातील रिक्त राहिलेल्या जागांसाठी ही रूपांतरित फेरी राबविण्यात आली आहे.

२४ ते २८ सप्टेंबरदरम्यान कागदपत्र पडताळणी; ५ ते ९ ऑक्टोबरदरम्यान नियुक्ती प्रक्रिया

मुंबई : महाराष्ट्रातील स्थानिक स्वराज्य संस्था तसेच खाजगी व्यवस्थापनाच्या शाळांमधील शिक्षण सेवक व शिक्षक पदभरती प्रक्रियेला आता वेग आला असून, पवित्र पोर्टलच्या माध्यमातून सुरू असलेल्या भरती प्रक्रियेतील टप्पा-१ मधील रूपांतरित फेरीच्या ४,३९० रिक्त पदांसाठी उमेदवारांच्या ऑनलाइन शिफारसी जाहीर करण्यात आल्या आहेत. समांतर आरक्षणातील रिक्त राहिलेल्या जागांसाठी ही रूपांतरित फेरी राबविण्यात आली आहे.

शिक्षण सेवक व शिक्षक पदभरतीसाठी ‘शिक्षक अभियोग्यता व बुद्धिमत्ता चाचणी-२०२५’ ही ऑनलाइन परीक्षा २७ मे ते ५ जून २०२५ या कालावधीत घेण्यात आली होती. या परीक्षेसाठी राज्यभरातून २ लाख २८ हजार ८०८ उमेदवारांनी नोंदणी केली होती. त्यापैकी २ लाख ११ हजार ३०८ उमेदवार परीक्षेला प्रविष्ट झाले. यातील १ लाख ७० हजार १०८ उमेदवारांनी स्व-प्रमाणपत्राची प्रक्रिया पूर्ण केली आहे.

दरम्यान, पवित्र पोर्टलवर १ मे ते २० जुलै २०२६ या कालावधीत मुलाखतीशिवाय तसेच मुलाखतीसह अशा दोन्ही प्रकारच्या शिक्षक भरतीसाठी जाहिराती प्राप्त झाल्या होत्या. पात्र उमेदवारांकडून ६ ते १६ ऑगस्ट २०२६ या कालावधीत पदांसाठी प्राधान्यक्रम नोंदवून घेण्यात आले.

१३,११९ पदांची नियमित फेरी

मुलाखतीशिवाय निवडप्रकारात स्थानिक स्वराज्य संस्थांच्या तसेच मुलाखतीशिवाय निवडप्रकाराचा पर्याय स्वीकारलेल्या खाजगी व्यवस्थापनांच्या शाळांमधील टप्पा-१ च्या नियमित फेरीत १३,११९ रिक्त पदांसाठी सर्वसाधारण गुणवत्ता यादी २७ ऑगस्ट २०२६ रोजी प्रसिद्ध करण्यात आली होती.

यानंतर समांतर आरक्षणातील रिक्त राहिलेल्या जागांसाठी आता रूपांतरित फेरी राबविण्यात आली आहे. या फेरीत ४,३९० रिक्त पदांवर उमेदवारांच्या ऑनलाइन शिफारसी करण्यात येत असून, त्याची सर्वसाधारण गुणवत्ता यादी प्रसिद्ध करण्यात आली आहे.

जिल्हा परिषदांमध्ये सर्वाधिक पदे

मुलाखतीशिवाय निवडप्रकारात एकूण १९,७५४ रिक्त पदे जाहिरातीत उपलब्ध होती. त्यापैकी नियमित फेरीत १३,११९, तर रूपांतरित फेरीत ४,३९० पदांसाठी शिफारसी करण्यात आल्या आहेत. नियमित व रूपांतरित फेरी मिळून एकूण १७,५०९ पदांसाठी उमेदवारांची शिफारस होत आहे.

व्यवस्थापननिहाय पाहता, जिल्हा परिषदांच्या १३,२२५ पदांपैकी नियमित फेरीत ८,४८१ आणि रूपांतरित फेरीत ३,१०५, अशी एकूण ११,५८६ पदांसाठी शिफारस होत आहे. महानगरपालिकांच्या २,४२१ पदांपैकी १,६०१ नियमित आणि ५२७ रूपांतरित फेरीतील पदांचा समावेश आहे. आदिवासी विकास विभागाच्या शासकीय शाळांमधील १,८१८ पदांपैकी १,४५१ नियमित आणि ३२४ रूपांतरित फेरीतील पदांसाठी शिफारसी झाल्या आहेत.

प्राथमिक विभागातील पदांचा मोठा वाटा

पदनिहाय विचार करता, इयत्ता १ ली ते ५ वीच्या १२,६७१ रिक्त पदांपैकी ७,५४१ पदांसाठी नियमित फेरीत आणि ३,२८१ पदांसाठी रूपांतरित फेरीत, अशी एकूण १०,८२२ पदांसाठी शिफारस झाली आहे.

इयत्ता ६ वी ते ८ वीच्या ५,४२१ पदांपैकी ४,२०७ नियमित आणि ८८० रूपांतरित फेरीतील, तर इयत्ता ९ वी ते १० वीच्या १,२९८ पदांपैकी १,११९ नियमित आणि १६६ रूपांतरित फेरीतील पदांसाठी शिफारस करण्यात आली आहे. इयत्ता ११ वी ते १२ वीच्या ३६४ पदांपैकी २५२ नियमित आणि ६३ रूपांतरित फेरीतील पदांसाठी उमेदवारांची शिफारस झाली आहे.

२४ सप्टेंबरपासून कागदपत्रांची पडताळणी

शिफारस झालेल्या उमेदवारांना तसेच संबंधित व्यवस्थापनांना निवडीबाबत SMS द्वारेही माहिती देण्यात येत आहे. उमेदवारांना पवित्र पोर्टलवरील आपल्या लॉगीनमध्ये निवडीची स्थिती पाहता येणार आहे. तसेच व्यवस्थापननिहाय सर्वसाधारण गुणवत्ता यादी संकेतस्थळाच्या होमपेजवरील ‘Download’ मेनूमध्ये उपलब्ध करून देण्यात आली आहे.

शिफारस झालेल्या उमेदवारांच्या कागदपत्रांची पडताळणी २४ ते २८ सप्टेंबर २०२६ या कालावधीत करण्यात येणार आहे. त्यानंतर शासन निर्णयातील तरतुदीनुसार समुपदेशन पद्धतीने नियुक्ती देण्याची प्रक्रिया ५ ते ९ ऑक्टोबर २०२६ या कालावधीत पूर्ण करण्याचे नियोजन करण्यात आले आहे.

शिफारस झालेल्या उमेदवारांनी पुढील प्रक्रियेसाठी संबंधित नियुक्ती प्राधिकाऱ्याशी संपर्क साधण्याचे आवाहन करण्यात आले आहे.

तक्रारींसाठी २७ सप्टेंबरपर्यंत मुदत

पदभरती प्रक्रियेसंदर्भात उमेदवारांच्या तक्रारी व दुरुस्त्यांसाठी राज्यस्तरावर ‘तक्रार निवारण व दुरुस्ती समिती’ स्थापन करण्यात आली आहे. निवड प्रक्रियेबाबत काही तक्रार किंवा आक्षेप असल्यास उमेदवारांनी विहित प्रपत्रामध्ये २७ सप्टेंबर २०२६ पर्यंत संबंधित ई-मेलवर तक्रार सादर करण्याचे आवाहन करण्यात आले आहे.

पवित्र पोर्टलवरील मुलाखतीशिवाय निवडप्रकारातील या रूपांतरित फेरीमुळे शिक्षक पदासाठी प्रतीक्षेत असलेल्या उमेदवारांच्या नियुक्ती प्रक्रियेला पुढील टप्पा मिळाला असून, कागदपत्र पडताळणी व नियुक्तीची प्रक्रिया वेळेत पूर्ण करण्याचे निर्देश संबंधित यंत्रणांना देण्यात आले आहेत. शालेय शिक्षण विभागाने शिफारस झालेल्या सर्व उमेदवारांचे अभिनंदन करून त्यांच्या पुढील शैक्षणिक कार्यासाठी शुभेच्छा दिल्या आहेत.