Preparations underway : शहरातील हजरत शाह शरफुद्दीन अब्दाल रहमतुल्लाह अलैह यांच्या सालाना उरुस मुबारक व संदलनिमित्त धार्मिक कार्यक्रमांची तयारी सुरू झाली आहे. २० ते २२ नोव्हेंबरदरम्यान आयोजित विविध धार्मिक कार्यक्रमांना परिसरातील हजारो भाविक व जायरीन उपस्थित राहण्याची शक्यता आहे. या पार्श्वभूमीवर वजीराबाद मस्जिद व पंच कमिटी ट्रस्टच्या वतीने नगर परिषद प्रशासनाकडे विशेष स्वच्छता, प्रकाशव्यवस्था, निर्जंतुकीकरण फवारणी आणि इतर मूलभूत सुविधा उपलब्ध करून देण्याची मागणी करण्यात आली आहे.

बाळापुरात उरुस मुबारकची धूम; धार्मिक कार्यक्रमांसह मोफत आरोग्य तपासणी शिबिराचे आयोजन
बाळापूर : शहरातील हजरत शाह शरफुद्दीन अब्दाल रहमतुल्लाह अलैह यांच्या सालाना उरुस मुबारक व संदलनिमित्त धार्मिक कार्यक्रमांची तयारी सुरू झाली आहे. २० ते २२ नोव्हेंबरदरम्यान आयोजित विविध धार्मिक कार्यक्रमांना परिसरातील हजारो भाविक व जायरीन उपस्थित राहण्याची शक्यता आहे. या पार्श्वभूमीवर वजीराबाद मस्जिद व पंच कमिटी ट्रस्टच्या वतीने नगर परिषद प्रशासनाकडे विशेष स्वच्छता, प्रकाशव्यवस्था, निर्जंतुकीकरण फवारणी आणि इतर मूलभूत सुविधा उपलब्ध करून देण्याची मागणी करण्यात आली आहे.
यासंदर्भात १८ नोव्हेंबर रोजी ट्रस्टच्या पदाधिकाऱ्यांनी नगर परिषद मुख्याधिकाऱ्यांना निवेदन सादर केले. उरुस काळात दर्गा परिसर, वजीराबाद मस्जिद तसेच संदल मार्गावर आवश्यक सुविधा उपलब्ध करून देण्याची मागणी या निवेदनातून करण्यात आली आहे.
चार दिवस विविध धार्मिक कार्यक्रमांची रेलचेल
उरुसनिमित्त १९ नोव्हेंबर रोजी परचम कुशाईचा कार्यक्रम पार पडला. २० नोव्हेंबर रोजी इम्पिरियल संदल, २१ नोव्हेंबर रोजी उरुस कव्वाली, तर २२ नोव्हेंबर रोजी फातेहाखानी व महफिल-ए-समा आयोजित करण्यात येणार आहे. याच दिवशी बाळापूर शहरातून पारंपरिक संदलही काढण्यात येणार आहे. त्यामुळे या धार्मिक कार्यक्रमांसाठी शहरात भाविकांची मोठी गर्दी होण्याची शक्यता आहे.
स्वच्छता आणि प्रकाशव्यवस्थेवर विशेष भर
उरुस काळात दर्गा परिसर, मस्जिद परिसर आणि संदलच्या मुख्य मार्गावर विशेष स्वच्छता मोहीम राबवावी, नियमित कचरा संकलन करावे तसेच आवश्यक ठिकाणी कचरापेट्या उपलब्ध करून द्याव्यात, अशी मागणी निवेदनातून करण्यात आली आहे.
याशिवाय रात्रीच्या वेळी भाविकांची गैरसोय होऊ नये आणि सुरक्षिततेचा प्रश्न निर्माण होऊ नये, यासाठी बंद अवस्थेतील पथदिव्यांची दुरुस्ती करावी. आवश्यक ठिकाणी अतिरिक्त हॅलोजन दिवे लावून संपूर्ण मार्गावर पुरेशी प्रकाशव्यवस्था करावी, अशी मागणीही करण्यात आली आहे.
निर्जंतुकीकरण फवारणी करण्याची मागणी
उरुस काळात मोठ्या प्रमाणावर भाविकांची गर्दी होणार असल्याने दर्गा परिसर आणि संदल मार्गावर निर्जंतुकीकरण पावडरची फवारणी करावी. सार्वजनिक स्वच्छता राखण्यासाठी संबंधित विभागाला आवश्यक सूचना द्याव्यात, असेही निवेदनात नमूद करण्यात आले आहे.
अलवाफी चॅरिटी फाउंडेशनतर्फे मोफत आरोग्य तपासणी शिबिर
उरुस मुबारकनिमित्त अलवाफी चॅरिटी फाउंडेशनच्या वतीने रविवार, दि. २२ नोव्हेंबर २०२६ रोजी मोफत वैद्यकीय आरोग्य तपासणी शिबिराचे आयोजन करण्यात आले आहे. सकाळी ११ ते दुपारी ३ वाजेपर्यंत हे शिबिर सुरू राहणार आहे. या शिबिराच्या माध्यमातून भाविकांसह गरजू नागरिकांना मोफत आरोग्य तपासणी व वैद्यकीय मार्गदर्शनाचा लाभ घेता येणार आहे. नागरिकांनी मोठ्या संख्येने उपस्थित राहून या आरोग्य शिबिराचा लाभ घ्यावा, असे आवाहन आयोजकांच्या वतीने करण्यात आले आहे.
नगर परिषद प्रशासनाच्या भूमिकेकडे लक्ष
नगर परिषद प्रशासन दरवर्षी उरुस व संदलनिमित्त आवश्यक सुविधा उपलब्ध करून देण्यासाठी सहकार्य करीत असते. यंदाही धार्मिक कार्यक्रम शांततेत, स्वच्छ आणि सुरक्षित वातावरणात पार पडावेत, यासाठी प्रशासनाने संबंधित विभागांना तातडीने निर्देश देऊन सर्व व्यवस्था वेळेत पूर्ण करावी, अशी अपेक्षा वजीराबाद मस्जिद व पंच कमिटी ट्रस्टच्या वतीने व्यक्त करण्यात आली आहे.
आता नगर परिषद प्रशासन या निवेदनाची कितपत गांभीर्याने दखल घेते आणि भाविकांसाठी आवश्यक सुविधा वेळेत उपलब्ध करून देते, याकडे बाळापूरकरांचे लक्ष लागले आहे.

