harassment :‘दहा लाख रुपये द्या, अन्यथा दुसरे लग्न करू’; विवाहितेचा सासरच्या सात जणांविरुद्ध छळाचा आरोप

harassment : विवाहितेचा शारीरिक व मानसिक छळ करून माहेरून घरातील वस्तू खरेदी करण्यासाठी दहा लाख रुपये आणण्याची मागणी केल्याचा गंभीर प्रकार समोर आला आहे. पैसे न दिल्यास मुलाला दुसरे लग्न करून देण्याची धमकी दिल्याचाही आरोप पीडित विवाहितेने केला आहे. या प्रकरणी देऊळगाव राजा पोलिसांनी पतीसह सासरच्या सात जणांविरुद्ध भारतीय न्याय संहिता (बीएनएस) अंतर्गत गुन्हा दाखल केला आहे.

फिट येण्याचा आजार आणि अपंगत्वावरून विवाहितेचा छळ केल्याची तक्रार; देऊळगाव राजा पोलिसांत गुन्हा दाखल

गजानन तिडके
देऊळगाव राजा : विवाहितेचा शारीरिक व मानसिक छळ करून माहेरून घरातील वस्तू खरेदी करण्यासाठी दहा लाख रुपये आणण्याची मागणी केल्याचा गंभीर प्रकार समोर आला आहे. पैसे न दिल्यास मुलाला दुसरे लग्न करून देण्याची धमकी दिल्याचाही आरोप पीडित विवाहितेने केला आहे. या प्रकरणी देऊळगाव राजा पोलिसांनी पतीसह सासरच्या सात जणांविरुद्ध भारतीय न्याय संहिता (बीएनएस) अंतर्गत गुन्हा दाखल केला आहे.
या प्रकरणातील तक्रारदार विवाहिता वैष्णवी गोपाल म्हस्के (वय २२, रा. पांढरदेव, ता. चिखली, जि. बुलढाणा; सध्या रा. देऊळगाव मही, ता. देऊळगाव राजा) यांनी पोलिसांकडे तोंडी तक्रार दिली आहे. त्यांच्या तक्रारीनुसार, आरोपींमध्ये पती गोपाल विलास म्हस्के, सासरे विलास रामदास म्हस्के, सासू अर्चना विलास म्हस्के, नणंद शुभांगी ऊर्फ सोनू राहुल पवार, नंदई राहुल ज्ञानेश्वर पवार, मामसासू मीनाक्षी गणेश लाखंडे आणि मामसासरे गणेश ऊर्फ खंडू मनोहर लोखंडे यांचा समावेश आहे.

आजारपण आणि अपंगत्वावरून त्रास दिल्याचा आरोप

पोलिसांत दाखल तक्रारीनुसार, लग्नानंतर विवाहितेला स्वयंपाक नीट करता येत नसल्याचे सांगून तसेच तिला फिट येण्याचा आजार असून हाताने अपंग असल्याचे कारण पुढे करून सासरच्या मंडळींनी त्रास दिल्याचा आरोप आहे. ‘तू आम्हाला नको आहेस,’ असे म्हणून शारीरिक व मानसिक त्रास देण्यात आल्याचेही तक्रारीत नमूद करण्यात आले आहे.
तसेच, लग्नावेळी वडिलांनी दिलेले दागिने काढून ठेवण्यात आल्याचा आरोपही विवाहितेने केला आहे. लग्नात चांगल्या वस्तू भेट दिल्या नाहीत आणि मुलाचे लग्न चांगल्या पद्धतीने झाले नाही, असे म्हणत सासरच्या मंडळींकडून तक्रारदार व तिच्या वडिलांना बोल लावण्यात आल्याचे तक्रारीत म्हटले आहे.

दहा लाख रुपयांची मागणी केल्याचा दावा

तक्रारीतील आरोपानुसार, घरातील वस्तू खरेदी करण्यासाठी माहेरून दहा लाख रुपये आणण्याची मागणी करण्यात आली. ही रक्कम दिली नाही, तर विवाहितेला नांदवणार नाही आणि मुलाला दुसरी पत्नी करून देऊ, अशी धमकी दिल्याचेही तक्रारदाराने पोलिसांना सांगितले आहे.
या कथित प्रकारांमुळे विवाहितेला शारीरिक व मानसिक त्रास सहन करावा लागल्याचे तक्रारीत नमूद आहे. या प्रकरणाची पोलिसांनी नोंद घेतली असून, तक्रारीतील आरोपांच्या अनुषंगाने पुढील तपास सुरू आहे.

देऊळगाव राजा पोलिसांत गुन्हा दाखल

या प्रकरणी देऊळगाव राजा पोलीस ठाण्यात गुन्हा क्रमांक ४६७/२०२६ अन्वये भारतीय न्याय संहितेच्या कलम ८५, ३५२, ३५१(२), ३५१(३) आणि ३(५) अंतर्गत गुन्हा दाखल करण्यात आला आहे. १६ ऑक्टोबर २०२६ रोजी सायंकाळी ४ वाजून १८ मिनिटांनी गुन्ह्याची नोंद करण्यात आली.
पोलीस हेड कॉन्स्टेबल गणेश जायभाये यांनी गुन्हा दाखल केला असून, पुढील तपास पोलीस हेड कॉन्स्टेबल कलीम देशमुख करीत आहेत.