womens empowerment: महिला सक्षमीकरणाला चालना देण्याच्या उद्देशाने महिला सक्षमीकरण योजनेअंतर्गत सय्यदपुरा येथील आयडियल फिटनेस सेंटरमध्ये मोफत शिवणकला प्रशिक्षण केंद्राचा शुभारंभ मंगळवार, दि. ७ जुलै रोजी उत्साहात करण्यात आला. नगरसेविका तथा शिक्षण सभापती डॉ. सामिया शजर आणि डॉ. मोहम्मद फैय्याज यांच्या पुढाकारातून सुरू झालेला हा उपक्रम बाळापूरातील महिलांसाठी स्वावलंबनाची नवी दारे उघडणारा ठरणार आहे.
२०० महिलांना स्वयंरोजगाराची संधी; बाळापूरात शासनमान्य शिवणकला प्रशिक्षण सुरू
बाळापूर : महिला सक्षमीकरणाला चालना देण्याच्या उद्देशाने महिला सक्षमीकरण योजनेअंतर्गत सय्यदपुरा येथील आयडियल फिटनेस सेंटरमध्ये मोफत शिवणकला प्रशिक्षण केंद्राचा शुभारंभ मंगळवार, दि. ७ जुलै रोजी उत्साहात करण्यात आला. नगरसेविका तथा शिक्षण सभापती डॉ. सामिया शजर आणि डॉ. मोहम्मद फैय्याज यांच्या पुढाकारातून सुरू झालेला हा उपक्रम बाळापूरातील महिलांसाठी स्वावलंबनाची नवी दारे उघडणारा ठरणार आहे.
या प्रशिक्षण वर्गामध्ये महिलांना शिवणकाम, कटिंग, एम्ब्रॉयडरी तसेच वस्त्रनिर्मितीशी संबंधित आधुनिक तंत्रज्ञानाचे प्रशिक्षण दिले जाणार आहे. यासोबतच स्वयंरोजगार, लघुउद्योग उभारणी, व्यवसाय व्यवस्थापन आणि विविध शासकीय योजनांची माहितीही तज्ज्ञ प्रशिक्षकांमार्फत देण्यात येणार आहे. त्यामुळे महिलांना केवळ कौशल्य प्रशिक्षणच नव्हे, तर आर्थिक स्वावलंबनासाठी आवश्यक दिशा आणि मार्गदर्शनही मिळणार आहे.
हा प्रशिक्षण अभ्यासक्रम एक महिन्याचा असून प्रशिक्षण पूर्ण करणाऱ्या महिलांना शासनमान्य प्रमाणपत्र प्रदान करण्यात येणार आहे. या प्रमाणपत्राच्या आधारे महिला सक्षमीकरण योजनेंतर्गत विविध शासकीय लाभ, आर्थिक सहाय्य तसेच स्वावलंबनासाठी आवश्यक सुविधा उपलब्ध करून देण्याचा प्रयत्न करण्यात येणार असल्याची माहिती आयोजकांनी दिली.
या उपक्रमाचा लाभ २०० हून अधिक महिलांना मिळणार असून महिलांच्या सोयीसाठी विविध शिफ्टमध्ये प्रशिक्षणाची व्यवस्था करण्यात आली आहे. त्यामुळे गृहिणी, तरुणी तसेच रोजगाराच्या संधी शोधणाऱ्या महिलांना आपल्या वेळेनुसार प्रशिक्षण घेता येणार आहे.
कार्यक्रमास बाळापूर नगर परिषदेचे माजी स्थायी समिती सदस्य डॉ. मोहम्मद फैय्याज हुसेन, महिला व बालकल्याण समिती सभापती रुक्साना परवीन अब्दुल एजाज, उपसभापती अर्पिता शरद उमाळे, नगरसेविका तथा शिक्षण सभापती डॉ. सामिया शजर, पाणीपुरवठा सभापती हिना परवीन मोहम्मद सऊद यांच्यासह नगर परिषदेतील नगरसेविका आणि मान्यवर मोठ्या संख्येने उपस्थित होते.
महिलांना कौशल्य, आत्मविश्वास आणि आर्थिक स्वावलंबनाचा मार्ग खुला करून देणारा हा उपक्रम बाळापूरातील महिला सक्षमीकरणासाठी महत्त्वाचे पाऊल ठरणार असल्याची भावना उपस्थितांनी व्यक्त केली. स्थानिक पातळीवर महिलांना प्रशिक्षण, प्रमाणपत्र आणि स्वयंरोजगाराच्या संधी उपलब्ध करून देणारा हा उपक्रम सामाजिक व आर्थिक परिवर्तनाचा पाया ठरेल, असा विश्वासही यावेळी व्यक्त करण्यात आला.
