Barabanki : बाराबंकी येथे माफिया मुख्तार अन्सारी याचा निकटवर्तीय आणि शूटर म्हणून ओळखला जाणारा शोएब उर्फ बॉबी याची शुक्रवारी भरदिवसा गोळ्या झाडून हत्या करण्यात आली. तो लखनऊहून परत आपल्या घरी जात असताना देवा रोडवरील असेनी मोडजवळ ही घटना घडली.
लखनऊ : बाराबंकी येथे माफिया मुख्तार अन्सारी याचा निकटवर्तीय आणि शूटर म्हणून ओळखला जाणारा शोएब उर्फ बॉबी याची शुक्रवारी भरदिवसा गोळ्या झाडून हत्या करण्यात आली. तो लखनऊहून परत आपल्या घरी जात असताना देवा रोडवरील असेनी मोडजवळ ही घटना घडली.
प्रत्यक्षदर्शींच्या माहितीनुसार, आधीपासून दबा धरून बसलेल्या हल्लेखोरांनी त्याच्या कारला घेराव घालत सलग गोळीबार सुरू केला. सुमारे दहा फेऱ्या झाडण्यात आल्याचे सांगितले जाते. गोळीबाराच्या आवाजाने हायवेवर एकच गोंधळ उडाला आणि परिसरातील लोकांमध्ये भीतीचे वातावरण निर्माण झाले. हल्लेखोरांनी वारदात करून घटनास्थळावरून पळ काढला.
गंभीर जखमी अवस्थेत शोएबला तातडीने जिल्हा रुग्णालयात दाखल करण्यात आले; मात्र डॉक्टरांनी त्याला मृत घोषित केले. भरदिवसा घडलेल्या या हत्येमुळे परिसरात मोठी खळबळ उडाली असून माहिती मिळताच पोलिस व प्रशासकीय अधिकारी घटनास्थळी दाखल झाले आणि तपास सुरू करण्यात आला. पोलिसांनी परिसरातील सीसीटीव्ही कॅमेऱ्यांचे फुटेज तपासण्यास सुरुवात केली आहे. प्राथमिक तपासात जुन्या वैरातून हा हल्ला झाल्याची शक्यता व्यक्त करण्यात येत असली, तरी सर्व बाजूंनी चौकशी सुरू असल्याचे पोलिसांनी स्पष्ट केले. घटनेनंतर काही काळ हायवेवरील वाहतूकही विस्कळीत झाली होती. परिसरात अतिरिक्त पोलिस बंदोबस्त तैनात करण्यात आला असून आरोपींना लवकरच अटक करून प्रकरणाचा उलगडा करण्यात येईल, असा विश्वास अधिकाऱ्यांनी व्यक्त केला आहे. भरदिवसा हायवेवर चित्रपटासारख्या थरारक पद्धतीने घडलेल्या या हत्येमुळे कायदा-सुव्यवस्थेबाबत पुन्हा एकदा प्रश्नचिन्ह निर्माण झाले आहे.
