Laborer attacked : काम सोडून दुसऱ्या ठिकाणी कामाला गेल्याच्या कारणावरून एका मजुरावर लोखंडी गज व लाकडी काठीने हल्ला केल्याची घटना शहरातील सिव्हील कॉलनी परिसरात घडली. या प्रकरणी देऊळगाव राजा पोलिस ठाण्यात तिघांविरुद्ध विविध कलमांन्वये गुन्हा दाखल करण्यात आला आहे.
देऊळगाव राजा : काम सोडून दुसऱ्या ठिकाणी कामाला गेल्याच्या कारणावरून एका मजुरावर लोखंडी गज व लाकडी काठीने हल्ला केल्याची घटना शहरातील सिव्हील कॉलनी परिसरात घडली. या प्रकरणी देऊळगाव राजा पोलिस ठाण्यात तिघांविरुद्ध विविध कलमांन्वये गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, अमर मोहनराव गायकवाड (वय ३८, रा. माळी वेस, जि. बीड, सध्या रा. सिव्हील कॉलनी, स्वामी समर्थ मंदिराजवळ, देऊळगाव राजा) हे मजुरी व घरबांधकामाचे काम करतात. गुरुवारी (दि. १२ मार्च) रात्री सुमारे ९.२० वाजता ते सिव्हील कॉलनीतील फीरोज मुनीर पठाण यांच्या बांधकाम साईटवर जेवण करून बसले होते.
दरम्यान, मुस्ताक कादरी, मुजोददीन इनामदार व जुवेर (सर्व रा. इस्लामपुरा, ता. जि. बीड) हे तेथे आले. “आमच्या साईटवरील काम सोडून येथे का आला?” असा जाब विचारत त्यांनी अमर गायकवाड यांना लोखंडी गज व लाकडी काठीने मारहाण केली. या हल्ल्यात गायकवाड यांच्या डाव्या हातावर, पाठीवर व गळ्यावर मार लागून ते जखमी झाले. तसेच “आमच्या कामावर परत आला नाहीस तर पुन्हा मारू” अशी धमकी देत शिवीगाळही केल्याचा आरोप फिर्यादीने केला आहे.
या घटनेप्रकरणी अमर गायकवाड यांच्या तोंडी फिर्याद व वैद्यकीय अहवालाच्या आधारे देऊळगाव राजा पोलिस ठाण्यात कायमी गुन्हा क्र. १०२/२०२६ अन्वये भारतीय न्याय संहिता (BNS) कलम 118(1), 352, 351(2), 351(3) व 3(5) अंतर्गत गुन्हा दाखल करण्यात आला आहे. सदर गुन्हा पोलीस कर्मचारी सुषमा उईके यांनी दाखल केला असून पुढील तपास पोलीस हेडकॉन्स्टेबल भास्कर सानप करीत आहेत. घटनेनंतर पोलिस उपनिरीक्षक नितीन मिंड यांनी घटनास्थळी भेट देऊन पाहणी केली असून प्रकरणाचा पुढील तपास सुरू आहे.
