Grand celebrations : दादा शरीफोद्दीन यांच्या उर्सचा बाळापुरात जल्लोष! चार दिवस कव्वाली, संदल अन् रूहानियतची पर्वणी

Grand celebrations :श्रद्धा, मोहब्बत आणि रूहानियतचा सुगंध दरवळू लागला असून, हजरत शाह सैय्यद शरफोद्दीन अब्दाल रहमतुल्लाह अलैह यांच्या सालाना उर्स-ए-शरीफची बाळापूरकरांना उत्सुकता लागली आहे. उर्सच्या पार्श्वभूमीवर दर्गाह परिसरात तयारीला वेग येत असून, शहरात भक्तिमय आणि उत्साहपूर्ण वातावरण निर्माण होऊ लागले आहे. लहान मुलांपासून ज्येष्ठ नागरिकांपर्यंत सर्वांच्याच मनात या पवित्र आस्तान्याविषयी अपार श्रद्धा आणि जिव्हाळा आहे. दर गुरुवारी येथे भरणारा मेळा या श्रद्धेची आणि आध्यात्मिक नात्याची प्रचिती देतो.

 बाळापूर सज्ज उर्स-ए-शरीफसाठी! १९ नोव्हेंबरपासून श्रद्धा, सूफी संगीत आणि बंधुभावाचा सोहळा

बाळापूर : श्रद्धा, मोहब्बत आणि रूहानियतचा सुगंध दरवळू लागला असून, हजरत शाह सैय्यद शरफोद्दीन अब्दाल रहमतुल्लाह अलैह यांच्या सालाना उर्स-ए-शरीफची बाळापूरकरांना उत्सुकता लागली आहे. उर्सच्या पार्श्वभूमीवर दर्गाह परिसरात तयारीला वेग येत असून, शहरात भक्तिमय आणि उत्साहपूर्ण वातावरण निर्माण होऊ लागले आहे. लहान मुलांपासून ज्येष्ठ नागरिकांपर्यंत सर्वांच्याच मनात या पवित्र आस्तान्याविषयी अपार श्रद्धा आणि जिव्हाळा आहे. दर गुरुवारी येथे भरणारा मेळा या श्रद्धेची आणि आध्यात्मिक नात्याची प्रचिती देतो.

डी.एस.एस.बी. ग्रुप, बाळापूर यांच्या वतीने आणि आयोजक आसिफ शाह यांच्या पुढाकाराने १९ ते २२ नोव्हेंबरदरम्यान चार दिवसीय सालाना उर्स-ए-शरीफ आयोजित करण्यात आला आहे. या चार दिवसांत परचम कुशाई, शाही संदल, उर्स कव्वाली, फातेहाखानी आणि महफिल-ए-समा अशा विविध धार्मिक व सांस्कृतिक कार्यक्रमांची मेजवानी भाविकांना अनुभवता येणार आहे.

शाही संदल ठरणार उर्सचे प्रमुख आकर्षण

उर्सच्या दुसऱ्या दिवशी, २० नोव्हेंबर रोजी शाही संदल काढण्यात येणार आहे. अब्दुल्ला शाह यांच्या निवासस्थानावरून निघणारा हा संदल शहरातील विविध मार्गांवरून मार्गक्रमण करीत दरगाह-ए-मुबारक येथे पोहोचेल. यावेळी मजार-ए-मुबारकवर हजेरी लावून विशेष दुवा करण्यात येणार आहे. या धार्मिक सोहळ्यात सहभागी होण्यासाठी अकीदतमंदांमध्ये उत्सुकता आहे.

कव्वाली आणि महफिल-ए-समा रंगवणार उर्स

२१ नोव्हेंबर रोजी आयोजित उर्स कव्वालीच्या कार्यक्रमातून सूफी परंपरेतील प्रेम, समर्पण आणि मानवतेचा संदेश सुरांच्या माध्यमातून व्यक्त होणार आहे. तर २२ नोव्हेंबर रोजी फातेहाखानी आणि महफिल-ए-समा आयोजित करण्यात आली आहे. या कार्यक्रमांमुळे उर्सच्या उत्साहात आणखी भर पडणार आहे.

श्रद्धा आणि बंधुभावाचा संदेश

बाळापूरच्या धार्मिक आणि सांस्कृतिक परंपरेत या उर्सला विशेष महत्त्व आहे. विविध समाजघटकांतील नागरिकांना एकत्र आणणारा हा सोहळा श्रद्धेसोबतच सामाजिक सलोखा, एकोपा आणि बंधुभावाची भावना दृढ करणारा ठरतो. उर्सच्या निमित्ताने शहरात आध्यात्मिक वातावरणाची अनुभूती घेता येणार आहे.

या चार दिवसीय उर्समध्ये सर्व अकीदतमंद आणि शहरवासीयांनी मोठ्या संख्येने सहभागी व्हावे, तसेच शांतता, मानवता आणि बंधुभावाचा संदेश अधिक दृढ करावा, असे आवाहन आयोजक आसिफ शाह आणि डी.एस.एस.बी. ग्रुप, बाळापूर यांच्या वतीने करण्यात आले आहे.

उर्सचे कार्यक्रम पुढीलप्रमाणे :

• १९ नोव्हेंबर : परचम कुशाई
• २० नोव्हेंबर : शाही संदल
• २१ नोव्हेंबर : उर्स कव्वाली
• २२ नोव्हेंबर : फातेहाखानी व महफिल-ए-समा

आयोजक : आसिफ शाह, डी.एस.एस.बी. ग्रुप, बाळापूर.