class recognition :बाळापूरमधील उर्दू शाळांच्या वर्ग मान्यतेला विभागीय आयुक्तांची स्थगिती; १९ ऑगस्टला पुढील सुनावणी

class recognition :राष्ट्रीय शैक्षणिक धोरण (एनईपी) २०२० अंतर्गत बाळापूर येथील काही प्राथमिक शाळांमधील इयत्ता पाचवी व आठवीच्या वर्गांना नगर परिषदेच्या अधिपत्याखाली मान्यता देण्याच्या आदेशाला विभागीय आयुक्त, अमरावती यांनी अंतरिम स्थगिती दिली आहे. महाराष्ट्र जिल्हा परिषद व पंचायत समिती अधिनियम, १९६१ च्या कलम २६७-अ अंतर्गत दाखल करण्यात आलेल्या अपीलावर हा स्थगनादेश १६ जुलै २०२६ रोजी पारित करण्यात आला.

  इयत्ता पाचवी-आठवीच्या वर्ग हस्तांतरणावर तात्पुरता ब्रेक; विभागीय आयुक्तांचा अंतरिम आदेश

बाळापूर : राष्ट्रीय शैक्षणिक धोरण (एनईपी) २०२० अंतर्गत बाळापूर येथील काही प्राथमिक शाळांमधील इयत्ता पाचवी व आठवीच्या वर्गांना नगर परिषदेच्या अधिपत्याखाली मान्यता देण्याच्या आदेशाला विभागीय आयुक्त, अमरावती यांनी अंतरिम स्थगिती दिली आहे. महाराष्ट्र जिल्हा परिषद व पंचायत समिती अधिनियम, १९६१ च्या कलम २६७-अ अंतर्गत दाखल करण्यात आलेल्या अपीलावर हा स्थगनादेश १६ जुलै २०२६ रोजी पारित करण्यात आला.

या प्रकरणात बाळापूरचे माजी आमदार खतीब सै. नातिकोद्दीन यांनी अपील दाखल केले होते. त्यांच्या वतीने अॅड. संतोष राहाटे यांनी कामकाज पाहिले. अपीलात मुख्य कार्यकारी अधिकारी, जिल्हा परिषद अकोला यांनी ११ जून २०२६ रोजी काढलेल्या आदेशाला आव्हान देण्यात आले होते.

सदर आदेशानुसार, राष्ट्रीय शैक्षणिक धोरण २०२० अंतर्गत स्थानिक स्वराज्य संस्थांच्या प्राथमिक शाळांचे सक्षमीकरण व दर्जावाढीच्या निकषांनुसार शैक्षणिक सत्र २०२६-२७ पासून इयत्ता पाचवी ते आठवीच्या वर्गांना नगर परिषद, बाळापूरच्या अधिपत्याखाली मान्यता देण्याचा निर्णय घेण्यात आला होता. या निर्णयामुळे संबंधित शाळांच्या प्रशासकीय नियंत्रणात बदल होणार होता.

अपीलावर सुनावणीदरम्यान अपीलार्थींचे वकील अॅड. संतोष राहाटे यांनी ११ जूनच्या आदेशाविरोधात स्थगिती देण्याची मागणी केली. यावर शिक्षणाधिकारी (प्राथमिक), जिल्हा परिषद अकोला तसेच मुख्याधिकारी, नगर परिषद बाळापूर यांनीही आपली बाजू मांडली. दोन्ही पक्षांचा युक्तिवाद विचारात घेतल्यानंतर विभागीय आयुक्तांनी अंतरिम आदेश पारित केला.

या आदेशानुसार नगर परिषद वरिष्ठ प्राथमिक उर्दू कन्या शाळा येथे प्रस्तावित इयत्ता आठवीचा वर्ग आणि नगर परिषद उर्दू प्राथमिक शाळा, फोर्ट क्रमांक ६, बाळापूर येथे प्रस्तावित इयत्ता पाचवीच्या वर्गासंदर्भातील ११ जून २०२६ च्या आदेशाला पुढील सुनावणीपर्यंत स्थगिती देण्यात आली आहे.

या अपीलाची पुढील सुनावणी १९ ऑगस्ट २०२६ रोजी निश्चित करण्यात आली आहे. तसेच प्रशासकीय कारणास्तव त्या दिवशी सुनावणी होऊ शकली नाही, तर देण्यात आलेली स्थगिती पुढील सुनावणीपर्यंत कायम राहील, असेही विभागीय आयुक्तांच्या आदेशात स्पष्ट करण्यात आले आहे.

या अंतरिम आदेशामुळे बाळापूरमधील संबंधित उर्दू शाळांतील वर्ग मान्यतेच्या प्रक्रियेला तात्पुरता ब्रेक लागला असून, आता शिक्षण विभाग, नगर परिषद आणि संबंधित पालकांचे लक्ष १९ ऑगस्ट रोजी होणाऱ्या सुनावणीकडे लागले आहे. त्या दिवशी होणाऱ्या निर्णयावर संबंधित शाळांमधील शैक्षणिक व्यवस्था आणि वर्गांचे प्रशासकीय नियंत्रण याचे भवितव्य अवलंबून राहणार आहे.