Dhamma Chakra Pravartan Din :बोरगाव मंजूत धम्मचक्र प्रवर्तन दिन उत्साहात; भीम रथाच्या मिरवणुकीने शहर झाले भीममय!

Dhamma Chakra Pravartan Din : धम्मचक्र प्रवर्तन दिनानिमित्त बोरगाव मंजू शहरात उत्साहपूर्ण वातावरणात विविध धार्मिक व सामाजिक कार्यक्रमांचे आयोजन करण्यात आले. शहरातील भीमनगर, रामजीनगर आणि सिद्धार्थनगर येथील बुद्ध विहारांमध्ये तथागत भगवान गौतम बुद्ध, भारतीय राज्यघटनेचे शिल्पकार डॉ. बाबासाहेब आंबेडकर आणि क्रांतिसूर्य महात्मा ज्योतिराव फुले यांच्या प्रतिमांचे पूजन करून अभिवादन करण्यात आले. सामूहिक बुद्ध वंदना, महामानवांना मानवंदना आणि ढोल-ताशांच्या गजरातील मिरवणुकीमुळे संपूर्ण परिसर भीममय झाला होता.

  जयघोष, ढोल-ताशांचा निनाद अन् बुद्ध वंदना; बोरगाव मंजूत महामानवांना अभिवादन

बोरगाव मंजू : धम्मचक्र प्रवर्तन दिनानिमित्त बोरगाव मंजू शहरात उत्साहपूर्ण वातावरणात विविध धार्मिक व सामाजिक कार्यक्रमांचे आयोजन करण्यात आले. शहरातील भीमनगर, रामजीनगर आणि सिद्धार्थनगर येथील बुद्ध विहारांमध्ये तथागत भगवान गौतम बुद्ध, भारतीय राज्यघटनेचे शिल्पकार डॉ. बाबासाहेब आंबेडकर आणि क्रांतिसूर्य महात्मा ज्योतिराव फुले यांच्या प्रतिमांचे पूजन करून अभिवादन करण्यात आले. सामूहिक बुद्ध वंदना, महामानवांना मानवंदना आणि ढोल-ताशांच्या गजरातील मिरवणुकीमुळे संपूर्ण परिसर भीममय झाला होता.

मंगळवारी सायंकाळी भीमनगर येथील बुद्ध विहारातून नवयुवक तरुण मंडळाच्या वतीने डॉ. बाबासाहेब आंबेडकर यांच्या प्रतिमेची भव्य मिरवणूक काढण्यात आली. आकर्षक सजावट केलेल्या भीम रथात बाबासाहेबांच्या प्रतिमेची स्थापना करण्यात आली. रथातील प्रतिमेचे विधिवत पूजन करून नगरप्रदक्षिणेला सुरुवात झाली.

ढोल-ताशांचा निनाद, जयभीमच्या घोषणा आणि लेझीम पथकाच्या सादरीकरणामुळे मिरवणुकीत उत्साहाचे वातावरण निर्माण झाले होते. शहरातील प्रमुख मार्गांवरून काढण्यात आलेल्या या मिरवणुकीत बौद्ध उपासक-उपासिकांसह विविध समाजांतील नागरिक सहभागी झाले होते. ठिकठिकाणी डॉ. बाबासाहेब आंबेडकर यांच्या प्रतिमेचे पूजन करून पुष्पहार अर्पण करण्यात आले आणि महामानवांना अभिवादन करण्यात आले.

बुद्ध वंदनेतून समता आणि शांततेचा संदेश

धम्मचक्र प्रवर्तन दिनाचे औचित्य साधून भीमनगर, रामजीनगर आणि सिद्धार्थनगर येथील बुद्ध विहारांमध्ये धार्मिक कार्यक्रम पार पडले. तथागत भगवान गौतम बुद्ध यांच्या शांतता आणि करुणेच्या विचारांसह डॉ. बाबासाहेब आंबेडकर व महात्मा फुले यांच्या सामाजिक परिवर्तनाच्या कार्याचे स्मरण करण्यात आले. यावेळी समाजबांधवांनी सामूहिक बुद्ध वंदना पठण करून महामानवांना मानवंदना दिली.

सिद्धार्थनगरमध्ये सिद्धार्थ नवयुवक मंडळाच्या वतीने महिला, पुरुष आणि युवकांनी संगीतमय गीतांच्या तालावर सहभागी होत आनंदोत्सव साजरा केला. विविध कार्यक्रमांमधून सामाजिक एकता, बंधुता आणि समतेचा संदेश देण्यात आला.

पोलिसांचा चोख बंदोबस्त

धम्मचक्र प्रवर्तन दिनानिमित्त आयोजित मिरवणूक आणि विविध कार्यक्रम शांततेत पार पडावेत, यासाठी पोलिस प्रशासनाने चोख बंदोबस्त ठेवला होता. ठाणेदार सुनील वानखडे, पोलीस उपनिरीक्षक मनोज उघडे आणि पोलीस उपनिरीक्षक ज्ञानेश्वर लांडे यांच्यासह पोलीस कर्मचाऱ्यांनी कायदा व सुव्यवस्था राखण्यासाठी दक्षता घेतली.

डॉ. बाबासाहेब आंबेडकरांच्या जयघोषात, बुद्ध वंदनेच्या मंगलमय वातावरणात आणि सामाजिक एकतेच्या संदेशासह बोरगाव मंजू येथे धम्मचक्र प्रवर्तन दिन उत्साहात साजरा करण्यात आला.