Change in Gas Cylinder Booking Timings : घरगुती गॅस वापरणाऱ्या ग्राहकांसाठी गॅस सिलेंडर बुकिंग संदर्भात महत्त्वाची सूचना जाहीर करण्यात आली आहे. संबंधित विभागाकडून देण्यात आलेल्या माहितीनुसार आता गॅस सिलेंडरची बुकिंग केवळ निश्चित वेळेतच करता येणार असून ठरलेल्या वेळेपूर्वी केलेली बुकिंग स्वीकारली जाणार नाही.
जाकीर अहमद
बाळापूर : घरगुती गॅस वापरणाऱ्या ग्राहकांसाठी गॅस सिलेंडर बुकिंग संदर्भात महत्त्वाची सूचना जाहीर करण्यात आली आहे. संबंधित विभागाकडून देण्यात आलेल्या माहितीनुसार आता गॅस सिलेंडरची बुकिंग केवळ निश्चित वेळेतच करता येणार असून ठरलेल्या वेळेपूर्वी केलेली बुकिंग स्वीकारली जाणार नाही.
जारी करण्यात आलेल्या सूचनांनुसार गॅस सिलेंडरची बुकिंग सकाळी ५ ते ७ वाजेपर्यंत तसेच रात्री ८ ते १२ वाजेपर्यंत करता येणार आहे. याशिवाय सकाळी ७ ते रात्री ८ वाजेपर्यंत बुकिंगची सुविधा बंद राहणार आहे. ग्राहकांना अधिक चांगली सेवा देणे आणि बुकिंग प्रक्रिया अधिक सुव्यवस्थित करण्याच्या उद्देशाने ही नवीन व्यवस्था लागू करण्यात आल्याचे विभागाने स्पष्ट केले आहे.
विभागाच्या माहितीनुसार केवळ त्याच ग्राहकांची बुकिंग स्वीकारली जाईल ज्यांना त्यांच्या मागील गॅस सिलेंडरची वितरण सेवा मिळून किमान २५ दिवस पूर्ण झालेले असतील. त्यापूर्वी केलेली बुकिंग प्रणालीमध्ये स्वीकारली जाणार नाही, असेही स्पष्ट करण्यात आले आहे.
अधिकाऱ्यांनी ग्राहकांना निश्चित नियम व वेळेचे पालन करण्याचे आवाहन केले असून त्यामुळे कोणत्याही प्रकारची अडचण टाळता येईल, असे सांगितले आहे. गॅस सिलेंडर पुरवठ्याबाबत काही समस्या निर्माण झाल्यास संबंधित कंपनीच्या टोलमुक्त क्रमांकावर तक्रार नोंदविता येणार आहे.
इंडियन गॅस व एचपी गॅस ग्राहकांसाठी टोलमुक्त क्रमांक १८००२३३३५५५, तर भारत गॅस ग्राहकांसाठी १८००२२४३४४ हा क्रमांक जारी करण्यात आला आहे.
दरम्यान, विभागाने नागरिकांना गॅसचा काटकसरीने वापर करण्याचे तसेच बुकिंगसाठी केवळ अधिकृत प्रक्रियेचाच वापर करण्याचे आवाहन केले आहे, जेणेकरून सर्व ग्राहकांना वेळेवर गॅस सिलेंडर उपलब्ध होऊ शकेल.
