Bear Sighted :साखरखेर्डा, सावंगी भगत आणि गोरेगाव शिवारात गेल्या काही दिवसांपासून अस्वलाचा मुक्त संचार सुरू असून शेतकरी वर्गात भीतीचे वातावरण निर्माण झाले आहे. आधीच जंगली प्राण्यांच्या वाढत्या वावरामुळे त्रस्त असलेल्या शेतकऱ्यांसमोर आता अस्वलाच्या उपस्थितीने नव्या संकटाचे सावट उभे ठाकले आहे.
जंगली प्राण्यांचा कहर वाढला; अस्वलाच्या मुक्त संचारामुळे शेती धोक्यात
साखरखेर्डा : साखरखेर्डा, सावंगी भगत आणि गोरेगाव शिवारात गेल्या काही दिवसांपासून अस्वलाचा मुक्त संचार सुरू असून शेतकरी वर्गात भीतीचे वातावरण निर्माण झाले आहे. आधीच जंगली प्राण्यांच्या वाढत्या वावरामुळे त्रस्त असलेल्या शेतकऱ्यांसमोर आता अस्वलाच्या उपस्थितीने नव्या संकटाचे सावट उभे ठाकले आहे.
सहकार चळवळीतील ज्येष्ठ नेते लालाराव देशमुख यांचे निधन; पोफळ शिवनीत शोककळा
साखरखेर्डा गावापासून सुमारे आठ किलोमीटर अंतरावर असलेल्या कोराडी जलाशयासह परिसरातील पिंपळगाव सोनारा, शिंदी, राताळी, मोहाडी, सवडद, गुंज, वरोडी, सावंगी भगत, सावंगी माळी आणि दरेगाव या भागात विविध तलाव असल्याने जंगली प्राण्यांची संख्या मोठ्या प्रमाणात वाढली आहे. रानडुक्कर, नीलगाय (रोही) आणि हरणांच्या सततच्या उपद्रवामुळे शेतकऱ्यांना पिकांच्या संरक्षणासाठी रात्रंदिवस शेतात पहारा द्यावा लागत आहे.
या प्राण्यांच्या वाढत्या संख्येमुळे त्यांची शिकार करण्यासाठी बिबट्याचा वावरही वाढला असून मोहाडी शिवारात बिबट्याचे दर्शन वारंवार होत आहे. त्यातच दोन पिल्लांसह बिबट्याची उपस्थिती असल्याने शेतकरी अधिकच धास्तावले आहेत. दरम्यान, गेल्या पाच दिवसांपासून साखरखेर्डा, सावंगी भगत आणि गोरेगाव शिवारात अस्वलाचा वावर दिसून येत आहे. काँग्रेसचे नेते सुधीर अप्पा बेंदाडे यांच्या सावंगी भगत येथील शेतातही अस्वलाचे वास्तव्य आढळून आले आहे. त्यामुळे महिला मजूर शेतात काम करण्यास तयार नसल्याचे चित्र आहे.
या संदर्भात वनविभागाशी संपर्क साधूनही दखल घेतली जात नसल्याचा आरोप करण्यात आला आहे. याबाबत सुधीर अप्पा बेंदाडे यांनी मनोज कायंदे यांच्याकडे तक्रार केली असून, हा प्रश्न विधानसभेत उपस्थित करून प्रशासनाला जागे करण्याची मागणी केली आहे. दरम्यान, जंगली प्राण्यांचा बंदोबस्त करून शेतकऱ्यांना दिलासा द्यावा, तसेच दुर्लक्ष करणाऱ्या संबंधित अधिकाऱ्यांवर कारवाई करावी, अशी जोरदार मागणी स्थानिक नागरिकांकडून होत आहे.
