Agriculture Board officer killed : रिसोड–मेहकर मार्गावरील सरपखेड फाट्याजवळ टँकर आणि दुचाकीच्या भीषण अपघातात कृषी विभागातील मंडळ अधिकारी विलास बारबले (वय ५५) यांचा जागीच मृत्यू झाला, तर प्रवीण पुन्नमवार (वय ३६) गंभीर जखमी झाले. ही घटना ११ फेब्रुवारी रोजी सकाळी सुमारे ९.३० ते १० वाजताच्या दरम्यान घडली.
रिसोड : रिसोड–मेहकर मार्गावरील सरपखेड फाट्याजवळ टँकर आणि दुचाकीच्या भीषण अपघातात कृषी विभागातील मंडळ अधिकारी विलास बारबले (वय ५५) यांचा जागीच मृत्यू झाला, तर प्रवीण पुन्नमवार (वय ३६) गंभीर जखमी झाले. ही घटना ११ फेब्रुवारी रोजी सकाळी सुमारे ९.३० ते १० वाजताच्या दरम्यान घडली.
मिळालेल्या माहितीनुसार, विलास बारबले आणि प्रवीण पुन्नमवार हे शासकीय कामानिमित्त एकलासपूर येथून रिसोडकडे दुचाकीने येत असताना सरपखेड फाट्याजवळ समोरून येणाऱ्या टँकरने त्यांच्या दुचाकीला जोरदार धडक दिली. धडकेचा तीव्रतेमुळे विलास बारबले टँकरच्या चाकाखाली चिरडले जाऊन त्यांचा जागीच मृत्यू झाला, तर प्रवीण पुन्नमवार गंभीर जखमी अवस्थेत रस्त्यावर कोसळले.घटनेची माहिती मिळताच रिसोड पोलिसांनी तातडीने घटनास्थळी धाव घेत स्थानिकांच्या मदतीने बचावकार्य केले. जखमी प्रवीण पुन्नमवार यांना उपचारासाठी रिसोड येथील खासगी रुग्णालयात दाखल करण्यात आले असून त्यांच्यावर उपचार सुरू आहेत. दरम्यान, विलास बारबले यांचा मृतदेह शवविच्छेदनासाठी ग्रामीण रुग्णालयात पाठविण्यात आला.
अपघातानंतर काही काळ या मार्गावरील वाहतूक विस्कळीत झाली होती. घटनास्थळी नागरिकांची मोठी गर्दी जमली होती. पोलिसांनी परिस्थिती नियंत्रणात आणत वाहतूक सुरळीत केली. कृषी विभागातील जबाबदार अधिकारी असलेल्या विलास बारबले यांच्या अकाली निधनामुळे विभागात तसेच परिसरात हळहळ व्यक्त करण्यात येत आहे.
