Nandura Railway Station :भारतीय रेल्वेच्या ‘अमृत भारत स्टेशन योजने’ अंतर्गत मध्य रेल्वेच्या भुसावळ विभागातील नांदुरा रेल्वे स्थानकाचा १०.६३ कोटी रुपये खर्चून करण्यात आलेला पुनर्विकास पूर्ण झाला असून, या अत्याधुनिक स्थानकाचे लोकार्पण पंतप्रधान नरेंद्र मोदी यांच्या हस्ते ऑनलाइन पद्धतीने करण्यात आले. या कार्यक्रमात देशभरातील पुनर्विकसित ७५ रेल्वे स्थानके राष्ट्राला समर्पित करण्यात आली.
पंतप्रधान मोदी यांच्या हस्ते नांदुरा रेल्वे स्थानक राष्ट्राला समर्पित; आधुनिक सुविधांनी सज्ज स्थानक
बुलढाणा : भारतीय रेल्वेच्या ‘अमृत भारत स्टेशन योजने’ अंतर्गत मध्य रेल्वेच्या भुसावळ विभागातील नांदुरा रेल्वे स्थानकाचा १०.६३ कोटी रुपये खर्चून करण्यात आलेला पुनर्विकास पूर्ण झाला असून, या अत्याधुनिक स्थानकाचे लोकार्पण पंतप्रधान नरेंद्र मोदी यांच्या हस्ते ऑनलाइन पद्धतीने करण्यात आले. या कार्यक्रमात देशभरातील पुनर्विकसित ७५ रेल्वे स्थानके राष्ट्राला समर्पित करण्यात आली.
नांदुरा रेल्वे स्थानकावर आयोजित मुख्य कार्यक्रमास राज्याचे वस्त्रोद्योग मंत्री तथा बुलढाणा जिल्ह्याचे सहपालकमंत्री संजय सावकारे, कामगार मंत्री आकाश फुंडकर, आमदार चैनसुख संचेती, नांदुरा नगराध्यक्ष मंगला मोरकर, माजी आमदार विजय शिंदे, विभागीय रेल्वे व्यवस्थापक पुनीत अग्रवाल, सामाजिक कार्यकर्ते शंकरबाबा पापळकर, रेल्वेचे वरिष्ठ अधिकारी, विविध विभागांचे अधिकारी, विद्यार्थी आणि नागरिक मोठ्या संख्येने उपस्थित होते.
प्रवाशांना आधुनिक सुविधा उपलब्ध होतील – संजय सावकारे
यावेळी बोलताना वस्त्रोद्योग मंत्री तथा सहपालकमंत्री संजय सावकारे यांनी सांगितले की, पंतप्रधान नरेंद्र मोदी यांच्या नेतृत्वाखाली भारतीय रेल्वेच्या आधुनिकीकरणाला मोठी गती मिळाली आहे. नवीन रेल्वेगाड्या, वंदे भारतसारख्या आधुनिक सेवा, डिजिटल तिकीट व्यवस्था आणि रेल्वे स्थानकांच्या पुनर्विकासामुळे प्रवाशांचा प्रवास अधिक सुरक्षित, सुलभ आणि आरामदायी झाला आहे. नांदुरा स्थानकाच्या विकासामुळे परिसरातील प्रवाशांना दर्जेदार सुविधा मिळतील. तसेच रेल्वे क्रॉसिंगसह स्थानिक प्रश्न सोडविण्यासाठीही प्रयत्न करण्यात येतील, असे त्यांनी सांगितले.
नांदुरा स्थानकाच्या विकासासाठी सातत्याने पाठपुरावा – आकाश फुंडकर
कामगार मंत्री आकाश फुंडकर यांनी सांगितले की, पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वाखाली देशात रेल्वे विकासाला अभूतपूर्व गती मिळाली आहे. अमृत भारत स्टेशन योजनेत नांदुरा स्थानकाचा समावेश व्हावा यासाठी आमदार चैनसुख संचेती यांनी सातत्याने पाठपुरावा केला. त्यांच्या प्रयत्नांमुळे स्थानकाला आधुनिक स्वरूप प्राप्त झाले असून, भविष्यात येथे लिफ्ट, स्वयंचलित जिने (एस्केलेटर) आणि अन्य प्रवासी सुविधा उपलब्ध करून देण्यासाठी प्रयत्न करण्यात येतील.
अत्याधुनिक सुविधांनी सज्ज स्थानक
अमृत भारत स्टेशन योजनेअंतर्गत नांदुरा रेल्वे स्थानकात आधुनिक स्थानक इमारत, प्रशस्त आरक्षण कार्यालय, चार आरक्षण कक्ष, वातानुकूलित प्रतीक्षागृह, पुरुष, महिला व दिव्यांगांसाठी स्वतंत्र प्रसाधनगृहे, नवीन प्रवेशद्वार, वाहनतळ, संरक्षक भिंत, आधुनिक प्रकाशयोजना, व्हिट्रिफाइड फरशी, पिण्याच्या पाण्याची सुविधा, टिकाऊ फर्निचर तसेच दृष्टीहीनांसाठी मार्गदर्शक पट्ट्यांची सुविधा उपलब्ध करून देण्यात आली आहे.
याशिवाय, फलाट क्रमांक १ वर १६० मीटर आणि फलाट क्रमांक २ वर २२४ मीटर लांबीचे नवीन शेड उभारण्यात आले आहे. दिव्यांगांसाठी अडथळामुक्त प्रवेश, कमी उंचीचे आरक्षण कक्ष, विशेष प्रसाधनगृहे, राखीव वाहनतळ आणि आधुनिक दिशादर्शक फलकांमुळे नांदुरा रेल्वे स्थानक अधिक प्रवासी-केंद्रित, सुसज्ज आणि सर्वसमावेशक बनले आहे.
